1 ጉꬃ ዎዴፔ ጉዬ ጊብጼ ካዎ ኡሹ ዱቂዛይታ ኣላፌይኔ ቁማ ካꬂዛይታ ኣላፌይ ባ ጎዳ ጊብጼ ካዎ ቆሂዳ። 2 ካዎይ ኡሹ ዱቂዛይታ ሃላቃኔ ቁማ ካꬂዛይታ ሃላቃታ ናምኣታ ቦላ ኬሂ ሃንቄቲዴስ። 3 ሄሳ ጊሻስ ዛቤታ ሃላቃዛ ኬꬃን ዮሴፌይ ቃሼቲዳ ዎይኔ ኬꬃን ዬጊዴስ። 4 ዛቤታ ሃላቃይ ኢስታ ዮሴፌስ ሼꬊን ኢዚ ኢስታስ ኮሺዛ ሚሻን ማዲዴስ፤ ኢስቲካ ቃሾ ኬꬅ ጌሊዲ ጉꬅ ጋምኢዳ ማላ፥

5 ጊብጼ ካዎስ ኡሹ ዱቂዛይታ ሃላቃይኔ ቁማ ካꬂዛይታ ሃላቃይ፥ ናምኣይካ ቃሾ ኬꬃን ዲሼ ኢሲ ቃማ ኦማርስ ባስ ባስ ኣጉሞ ኣጉሜቲዳ። ናምኣታ ኣጉሞ ቢርሼꬂካ ዱማ ዱማ። 6 ዮሴፌይ ማላዶ ኢስታኮ ጌሊዳ ዎዴ ኢስቲ ሙዞቲ ኡቲዳይታ ቤኢዴስ። 7 ሄሳ ጊሻስ ባ ጎዳ ቃሾ ኬꬃን ባናራ ዲዛ ካዎ ኦሳንቻታ፥ «ሃች ኢንቴ ኣይፌሶይ ኣዛስ ꬉሚዴ?» ጊ ኦይቺዴስ።

8 ኢስቲካ ኢዛስ፥ «ኑኒ ናምኣይ ኣጉሞ ኣጉሜቲዶስ፤ ጊዶ ኣቲን ኑስ ቢርሺዛ ኣሲ ꬋይዴስ» ጊዳ።

ዮሴፌይካ ኢስታስ፥ «ኣጉሞ ቢርሺዛይ ጾሳ ጊዴኔ? ኢንቴ ኣጉሞዛ ኣኔ ታስ ዮቲቴ» ጊዴስ።

9 ሂስቲን ኡሹ ዱቂዛይታ ሃላቃይ ባ ኣጉሞ ዮሴፌስ፥ «ታኒ ታ ኣጉሞን ኢሲ ዎይኔ ሚꬅ ታ ሲንꬃን ዲዛይሳ ቤኣዲስ። 10 ቃሴ ሄ ዎይኔ ሚꬃስ ሄꬑ ሃጋይ ዴስ። ሄራካ ኣጫዳ ጪያዱስ፤ ሎኤꬃ ዉርጫዳ ኣይፋዱስ። 11 ሄ ዎዴ ፓሮኔ ኡሻ ጹኣይ ታ ኩሼን ዴስ፤ ታኒካ ዎይኔዛ ኣይፌ ማጻዳ ጹኣዛ ጊዶን ጉምኣዳ ኡሻ ፓሮኔስ ኢማዲስ» ጊ ዮቲዴስ።

12 ሂስቲን ዮሴፌይካ ዛሪዲ፥ «ሄሳ ቢርሼꬂ ሃይሳ፤ ሄꬑ ሃጋቲ ሄꬑ ጋላሳታ። 13 ሄꬑ ጋላሳታ ጊዶን ካዎይ ኔና ዴንꬂዲ ኢዚ ኔና ካሴ ኔ ዲዛ ኣላፌቴꬃን ዎꬃና፤ ካሴ ኔኒ ኡሹ ዱቂዛ ዎዴ ኦꬂዳ ማላ ኔኒ ካዎ ዋንጫ ኢዛ ኩሼን ዎꬃና። 14 ጊዶ ኣቲን ኔስ ዎዴይ ሎኢዳ ዎዴ ታና ባሎፓ፤ ታስካ ኪያ፤ ታ ጊሻስ ካዎስ ዮታዳ ሃ ቃሾ ኬꬃፌ ታና ኬሲሳ፤ 15 ጋሶይካ ታና ኢብራዌታ ቢታፌ ዎልቃራ ሻሚ ኤሂዳ፤ ጊዶ ኣቲን ሃይሳꬆ ታና ቃሾስ ጋꬂዛ ሚሽ ኣይኮካ ኦꬃቤኬ» ጊዴስ።

16 ካꬅ ካꬂዛይታ ሃላቃይ ዮሴፌይ ኡሹ ዱቂዛይታ ኣጉሞ ሎኤꬂ ቢርሺዳይሳ ቤኢዲ ዮሴፌስ፥ «ታኒካ ኣጉሞ ኣጉሜታዲስ፤ ሄሲካ፥ ‹ታ ሁኤን ሄꬑ ማሶቤ ቶካ ኦይካዲስ። 17 ቦላ ባጋ ማሶቤን ጊብጼ ካዎስ ኡኬቲዳ ዱማ ዱማ ቁማይ ዴስ። ጊዶ ኣቲን ካፎቲ ሄሳ ታ ሁኤን ዲዛ ማሶቤዛፔ ሚዳ› » ጊ ዮቲዴስ።

18 ሂስቲን ዮሴፌይ፥ «ሄሳ ቢርሼꬃይ ሃይሳ፤ ሄꬑ ማሶቤቲ ሄꬑ ጋላሳታ። 19 ሄꬑ ጋላሳታ ጊዶን ካዎይ ኔና ዴንꬂዲ ኔ ቆꬌ ሙጪዲ ሚꬃ ቦላ ካቂሳና፤ ኔ ኣሾካ ካፎቲ ማና» ጊዴስ።

20 ሄꬓንꬆ ጋላስ ጊብጼ ካዎይ ባ ዬሌቲዳ ጋላስ ባ ካዎቴꬃን ዲዛ ሹሜታ ኡባስ ጊቢራ ጊግሲዴስ። ኡሹ ዱቂዛይታ ሃላቃኔ ካꬅ ካꬂዛይታ ሃላቃ ቃሾ ኬꬃፌ ኬሲዲ ባ ሹሜታ ሲንꬃን ኤሲዴስ። 21 ኡሹ ዱቂዛይታ ሃላቃዛ ካሴ ኢዛ ሹሜቴꬃን ዛሪን ኢዚ ካዎ ኩሼን ዋንጫ ዎꬂዴስ። 22 ጊዶ ኣቲን ካዎዚ ካꬅ ካꬂዛይታ ሃላቃ ዮሴፌይ ኢዛ ኣጉሞ ቢርሺዳ ማላ ኢዛ ካቂሲዴስ። 23 ኡሹ ዱቂዛይታ ሃላቃይ ጊዲኮ ዮሴፌ ቆፖንታ ዶጊ ኣጊዴስ።