1 ናምኡ ላይꬅ ኩሜꬅ ኣꬊዳ ዎዴ ጊብጼ ካዎይ ኣጉሞ ኣጉሜቲዴስ፤ ኣጉሞራ ኢዚ ኣባዬ ሻፋ ዶናን ኤቂ ዲሺን፥ 2 ላፑን ኦርዴኔ ሞꬎ ሚዛቲ ኣባዬ ሻፋፔ ኬዚዲ ሻፋ ኣቻን ማታ ሚሺን ቤኢዴስ። 3 ኢስታፌ ካሊዲ ሃራ ላፑን ማላ ኢታኔ ጊልቃ ሚዛቲ ኣባዬ ሻፋፔ ኬዚዲ ሻፋዛ ዶናን ዲዛ ሞꬎ ሚዛታ ኣቻን ኤቂዳ። 4 ሄ ሜꬎ ኢታኔ ጊልቃ ሚዛቲ ላፑን ኦርዴኔ ሞꬎ ሚዛታ ሚቲሺን ቤኢዴስ። ሄሳፌ ጉዬ ካዎይ ꬊስኮፌ ቤጊዴስ።

5 ኢዚ ቃሴካ ꬊስኪዲ ናምኣንꬆ ኣጉሜቲዲ ላፑን ሎኦኔ ሙሩታ ቲያቲ ኢሲ ማቃ ቦላ ዲጪዳይሳ ቤኢዴስ። 6 ኢስታፌ ካሊዲ ኣይፌ ላፋኔ ጫርኮን ሹሊዲ ሜሊዳ ላፑን ቲያቲ ኬዚዳ። 7 ሄ ላፋ ኣይፌ ቲያቲ ሎኦኔ ሙሩታ ቲያታ ሚቲዳ። ሄሳፌ ጉዬ ካዎዚ ቤጊዲ ኣጉሞ ጊዲዳይሳ ኤሪዴስ። 8 ጋዴይ ዎንቲሺን ኢዛ ዎዚናይ ሺሮትዴስ፤ ሄሳ ጊሻስ ጊብጼን ዲዛ ቢታንቻታሲኔ ኤራ ኣሳታ ኡባስ ኪቲዲ ጼይጊሲዴስ፤ ካዎይ ኢስታስ ባ ኣጉሞዛ ዮቲዴስ፤ ጊዶ ኣቲን ኢዛስ ሄ ኣጉሞዛ ቢርሻናስ ዳንዳይዛ ኣሲ ቤቲቤና። ዳኔ 2፡2

9 ሄ ዎዴ ኡሹ ዱቂዛይታ ሃላቃይ ጊብጼ ካዎስ፥ «ታኒ ታ ሞሮ ሃች ቆፓይስ። 10 ኢሲቶ ካዎይ ባ ኣይሌስ ሃንቄቲዲ ታናኔ ካꬅ ካꬂዛይታ ሃላቃዛ ቃሾ ኬꬃን ዬጊዴስ። 11 ኑኒ ሄን ዲሼ ኑስ ኑስ ኣጉሞ ኣጉሜቲዶስ፤ ኣጉሞዛስካ ዱማ ዱማ ቢርሼꬂ ዴስ። 12 ሄ ዎዴ ዛቤታ ሃላቃዛ ኣይሌ ጊዲዳ ኢሲ ኢብራዌ ፓንꬂ ኑናራ ቃሾ ኬꬃን ዴስ። ኑኒ ኑ ኣጉሞ ኢዛስ ዮቲን ኢዚ ኑስ ሁኤን ሁኤን ኑ ኣጉሞ ቢርሺዴስ። 13 ሂስቲን ሄ ዮኦቲ ኢዚ ኑስ ቢርሺዳ ማላ ሃኒዳ። ሄሲ ኣዜ ጊኮ ታኒ ካሴ ታ ኣላፌቴꬃን ሲማዲስ፤ ሃንኮይሲ ጊዲኮ ካቄቲዴስ» ጊዴስ።

14 ሂስቲን ጊብጼ ካዎይ ዮሴፌ ኪቲዲ ጼይጊሲዴስ። ኢስቲ ኢዛ ቃሾ ኬꬃፌ ኤሶን ኤኪ ዪን ባ ሁኤ ሜዴቲዲ ማይኦ ላሚዲ ካዎዛኮ ጌሊዴስ። 15 ካዎይ ዮሴፌ፥ «ታ ኣጉሜቲዳ ኣጉሞዛ ቢርሻናስ ኦኒካ ዳንዳይቤና። ጊዶ ኣቲን ታኒ፥ ‹ዮሴፌይ ኣጉሞ ሲዪኮ ቢርሻናስ ዳንዳዬስ› ጊዛዝ ሲያዲስ» ጊዴስ።

16 ሂስቲን ዮሴፌይ፥ «ታኒ ሄሳ ዳንዳይኬ፤ ጊዶ ኣቲን ጾሳይ ካዎስ ሎኦ ቢርሼꬅ ኢማና» ጊዴስ።

17 ካዎይካ፥ «ታኒ ታ ኣጉሞን ኣባዬ ሃꬃ ሻፋ ዶናን ኤቂዲሺን፥ 18 ላፑን ጊታኔ ሞꬎ ሚዛቲ ኣባዬ ሻፋፔ ኬዚዲ ሃꬃ ዶናን ማታ ሚሺን። 19 ቃሴካ ኢስታፌ ሃራ ላፑን ሜꬋ ኢታ፥ ጊልቃኔ ላፋ ሚዛቲ ሻፋፔ ኬዚዳ፤ ታኒ ሄሳ ማላ ሜꬋ ኢታ ሚዝ ጊብጼ ቢታን ሙሌካ ቤኣ ኤሪኬ። 20 ሜꬋ ኢታኔ ላፋ ሚዛቲ ኮይሮይታ ላፑን ሞꬎ ሚዛታ ሚቲ ኣጊዳ። 21 ጊዶ ኣቲን ኢስቲ ሚቲዳፔ ጉዬካ ኢስታ ሜꬋይ ካሴ ማላካ ኢቲ ኡቲዳ ጊሻስ ኢስቲ ሚቲዳይሳ ኣሲ ኤራናስ ዳንዳይቤና። ሄሳፌ ጉዬ ታኒ ꬊስኮፌ ቤጋዲስ።

22 «ቃሴካ ኣጉሞራ ላፑን ሎኦኔ ሙሩታ ቲያቲ ኢሲ ማቃ ቦላ ዲጪዳይታ ቤኣዲስ። 23 ቃሴካ ኢስታፌ ሃራ ኣይፌ ላፋኔ ጫርኮን ሹሊዳ ላፑን ቲያቲ ኬዚዳ። 24 ሄ ሹሊ ኡቲዳ ቲያቲ ላፑን ሎኦ ቲያታ ሚቲዳ። ታኒ ሃ ኣጉሞዛ ማሮታስ ዮታዲስ፤ ጊዶ ኣቲን ታስ ኣጉሞዛ ቢርሺዛ ኣሲ ቤቲቤና» ጊዴስ።

25 ሄሳፌ ጉዬ ዮሴፌይ ጊብጼ ካዎዛ፥ «ናምኣይካ ኔ ቤኢዳ ኣጉሞታ ቢርሼꬃይካ ኢሲኖ። ጾሲ ባ ኦꬃና ሃኒዛይሳ ካዎስ ቆንጪሲዴስ። 26 ሄ ላፑን ሎኦ ሚዛቲ ላፑን ላይꬃታ፤ ቃሴ ላፑን ሎኦ ቲያቲ ላፑን ላይꬃታ፤ ናምኣይካ ኢሲ ማላ። 27 ሄ ላፑን ሜꬋ ኢታኔ ላፋ ሚዛቲ ላፑን ላይꬃታ፤ ቃሴ ጫርኮን ሹሊዳ ፓꬆንታ ላፑን ቲያቲ ላፑን ኮሻ ላይꬃታ።

28 «ታኒ ካዎስ ዮቲዳ ማላካ ጾሲ ባ ኦꬃና ሃኒዛይሳ ካዎስ ቤሲዴስ። 29 ላፑን ዳሮ ካሎ ላይꬃቲ ጊብጼ ቢታስ ኡባስ ያና፤ 30 ጊዶ ኣቲን ላፑን ኮሻ ላይꬃቲ ኢዛፔ ካሊዲ ያና። ሄ ዎዴ ጊብጼ ካሎይ ዉሪ ዶጌታና፤ ቢታይ ኮሻን ሾጬታና። 31 ካሎ ላይꬃታፔ ጉዬ ዪዛ ጋፋ ላይꬃቲ ኬሂ ኢታ ጊዲዳ ጊሻስ ካሴ ካሎይ ሙሌካ ቆፌቶንታ ኣታና። 32 ናምኡቶ ካዎስ ሄ ኣጉሞይ ቤቲዳይ ኣዛሴ ጊኮ ሃይሳ ዮኦዛ ጾሲ ሚንꬂዲ ኩዪዳ ጊሻሳ፤ ጾሲ ሄሳ ኤሶን ኦꬃና።

33 «ሃኢ ሄኮ ኤሶን ካዎይ ኣꬎ ኤራቴꬂኔ ኣኬካይ ዲዛ ኣስ ኮዪዲ ጊብጼ ቢታን ሱንꬆ። 34 ሄሳꬆካ ላፑን ካሎ ላይꬃታፔ ኢቻሻንꬆ ኩሼ ሺሺዛ ኣላፌታ ካዎይ ሹሞ። 35 ኢስቲ ዪዛ ካሎ ላይꬃታን ካꬅ ሺሺዲ ካዎ ኣዋቴꬃን ሚንጄቶ፤ ሄ ካꬃካ ካታማታን ናጌቶ። 36 ቢታይ ኮሻን ቆሄቶንታ ማላ ሃ ካꬃይ ጊብጼ ቢታን ላፑን ላይꬃን ዴንዳና ኮሻስ ሚንጄቲዲ ዴኦ» ጊዴስ።

37 ሂስቲን ሃ ዮኦዚ ጊብጼ ካዎሲኔ ኢዛ ኦሳንቻታስ ሎኦ ጊዲዲ ቤቲዴስ። 38 ሄሳ ጊሻስ ካዎይ ኢስታስ፥ «ኑኒ ጾሳ ኣያናራ ዲዛ ሃይሳ ማላ ሃራ ኣስ ኦና ዴማኔ?» ጊ ኦይቺዴስ።

39 ሄሳፌ ጉዬ ካዎይ ዮሴፌ፥ «ጾሲ ሃይሳ ኡባ ኔና ኤሪሲዳ ጊሻስ ኔ ማላ ኣꬎ ኤራቴꬂኔ ኣኬካይ ዲዛ ኣሲ ኦኒካ ባዋ። 40 ታኒ ኔና ታ ኬꬃን ሹማይስ፤ ታ ኣሳይ ዉሪ ኔስ ኣዛዜታና፤ ታኒ ኔፔ ኣꬋናይ ታ ካዎቴꬃ ኣልጋን ጻላ ጊዳና» ጊዴስ። ሃዋ 7፡10

41 ሄሳ ጊሻስ ካዎይ ዮሴፌ፥ «ቤያ! ታኒ ኔና ጊብጼ ቢታ ኡባ ቦላን ሹማዲስ» ጊዴስ። 42 ሄሳፌ ጉዬ ካዎይ ባ ካዎቴꬃ ቃላባቴ ባ ቢራꬌፌ ኬሲዲ ዮሴፌ ቢራꬌን ኣꬂዴስ፤ ቃሴካ ላይኖፔ ዳዴቲዳ ማይኦ ማይዚዲ ኢዛ ቆꬌንካ ዎርቃ ሎታ *ሎታ፡ ሎታይ ቆꬌን ኣꬂዛ ኣሌቆ ሚሽ። ኣꬂዴስ።ዳኔ 5፡29 43 ካዎይ ባ ናምኣንꬆ ፓራ-ጋሬዛ ዮሴፌ ቶጊሲዴስ፤ ኣይሌቲካ፥ «ዚጊቴ! ዚጊቴ!» ጊዲ ኢዛፔ ሲንꬃራ ቢዳ። ሄሳꬆ ኦꬂዲ ካዎይ ኢዛ ጊብጼ ቢታ ኡባ ቦላ ሹሚዴስ።

44 ሄሳፌ ጉዬ ካዎይ ዮሴፌ፥ «ታኒ ካዎ! ጊዶ ኣቲን ኔኒ ቃጻ ጎንታ ጊብጼ ቢታ ኡባን ኦኒካ ኩሼ ዎይኮ ቶሆ ቃꬄና» ጊዴስ። 45 ካዎይ ዮሴፌ፥ «ጻፊናቴ-ፓኢናሄ» ጊ ሱንꬂዴስ፤ ኢዚ ኢዛስ ኦና ጌቴቲዛ ካታማ ቄሴ ጲጺፋራ ናዮ ኣሲናቶ ማቾ ኢሚዴስ። ሂስቲን ዮሴፌይ ኩሜꬃ ጊብጼ ቢታ ዩዪ ጼሊዴስ።

46 ዮሴፌይ ጊብጼ ካዎስ ኦꬃናስ ዶሚዛ ዎዴ ኢዛስ ላይꬃይ ሄꬑ ታማ። ቃሴ ዮሴፌይ ካዎ ሲንꬃፌ ኬዚዲ ጊብጼ ቢታ ኡባ ዩዪ ጼሊዴስ። 47 ሄ ላፑን ካሎ ላይꬃታን ቢታይ ኬሂ ዳሮ ካꬅ ኢሚዴስ። 48 ዮሴፌይ ጊብጼ ቢታን ሄ ላፑን ካሎ ላይꬃ ካꬅ ኡባ ሺሺዲ ካታማታን ሚንጂዴስ። ኢሲ ኢሲ ካታማታ ዩሾን ካጺዳ ካꬅ ኡባ ሄ ካታማን ካታማን ሚንጂዴስ። 49 ዮሴፌይ ኣባ ሻሚንታ †ኣባ ሻሚንታ፡ ኣባ ሻሚንታ ኢሲ ኢሲ ባጋ ጋሞꬆ ቃላን ኣባ ሻይታ ዎይኮ ኣባ ኣጬ ጌቴቲ ጼይጌቴስ። ማላ ዳሮ ካꬅ ሚንጂዴስ፤ ካꬃይ ዎጋፔ ዳሪን ማካናስ ዳንዳይቤና ጊሻስ ማኪ ማኪ ቆሊዛይሳ ኣጋጊዴስ።

50 ላፑን ኮሻ ላይꬃይ ያናፔ ካሴ ኦና ጌቴቲዛ ካታማ ቄሴ ጲጺፋራ ናዮ ኣሲናቲፔ ዮሴፌይ ናምኡ ኣቱማ ናይታ ዬሊዴስ። 51 ዮሴፌይ፥ «ጾሲ ታና ታ ሜቶኔ ታ ኣዋ ሶ ኣሳ ኡባ ዶጊሲዴስ» ጊሼ ባ ኮይሮ ናዛ ሚናሴ ጊ ሱንꬂዴስ። 52 ናምኣንꬆ ናዛካ፥ «ጾሲ ታስ ታ ቱጋቲዳ ቢታን ታና ኣይፊሲዴስ» ጊሼ ኤፍሬሜ ጊ ሱንꬂዴስ።

53 ጊብጼ ቢታን ዲዛ ሄ ላፑን ካሎ ላይꬃቲ ዉሪዳ። 54 ቃሴ ዮሴፌይ ካሴቲ ዮቲዳ ማላ ላፑን ኮሻ ላይꬃቲ ዶሚዳ። ሃራ ቢታ ኡባን ኮሻይ ዴንዲዴስ፤ ጊዶ ኣቲን ጊብጼ ቢታ ኡባን ካꬂ ዴስ። ሃዋ 7፡11 55 ጊብጼ ዴሬይ ዉሪ ኮሻቲዳ ዎዴ ኣሳይ፥ «ካꬅ ኢማ» ጊ ካዎስ ዋሲን ካዎዚ ጊብጼ ኣሳ ኡባ፥ «ዮሴፌኮ ቢዲ ኢዚ ዮቲዛይሳ ኦꬂቴ» ጊዴስ። ዮሃ 2፡5

56 ኮሻይ ጊብጼ ቢታ ኡባ ጋኪዳ ዎዴ ዮሴፌይ ካꬅ ሚንጂዳ ኬꬃታ ኡባ ዶይዲ ካꬅ ጊብጼ ኣሳስ ባይዚሲዴስ፤ ጋሶይካ ኮሻይ ኩሜꬃ ጊብጼን ሚኒዴስ። 57 ሳኣ ኡባን ኮሻይ ሱሊዳ ጊሻስ ቢታን ዲዛ ኣሳይ ዉሪ ካꬅ ዮሴፌፔ ሻማናስ ጊብጼ ዪዴስ።