2
1 ታኒ ናጌ ናጊዛሶን ኤቃና፤ ሚጻ ጊምቤ ቦላ ኬዛዳ ሄን ታካና። ታ ኦይሻስ ጎዳይ ኣይ ዛሮ ኢማናኮ ታ ዲዛሶን ዳዳ ኢዛ ናጋና።
ኢምባቆ ኦይሻስ ጎዳይ ኢሚዳ ዛሮ
2 ጾሲ ኢምባቆስ፥
«ዋዪሶንታ ናባቤታና ማላ
ኔስ ኣጁታን ቆንጪዳይሳ
ሳሌዳ ቦላ
ሎኤꬃ ዎጫ ጻፋ።
3 ኔ ኣጁታዚ
ባስ ኢሜቲዳ ዎዴ ናጌስ፤
ኢዚካ ዉርሴꬃ
ጊሻስ ዮቴስ፥
ዎርዶቴና።
ጋምኣና ሚሳቲኮካ ናጋ፤
ኢዚ ቱማፔ ያና፤
ሙሌካ ጋምኤና። ኢብ 10፡37
4 «ሄኮ ኢዚ ኦቶሬቲዴስ፤
ኢዛ ኣሞይ ሱሬ ጊዴና፤
ጺሎ ኣሲ ጊዲኮ ኣማኖን ዴስ። ኦሮ 1፡17፤ ጋላ 3፡11፤ ኢብ 10፡38
5 ዱሬቴꬂ ኣስ ባሌꬄስ፤*ሃይሳን ዱሬቴꬅ ጊዛይሳ ኢሲ ኢሲ ቢርሼꬃቲ ዎይኔ ኡሹ ጌቴስ።
ኦቶራንቻስ ሙሌካ
ሼምፖይ ዴና፤
ኢዚ ዱፎ ማላ ዮራ፤
ዎꬊዛ ሃይቆ ማላካ
ካሎ ኤሬና፤
ዴሬ ኡባ ሺሼሲኔ
ዲኢ ኤኪ ቤስ።
6 ሂስቲን ሄሳ ማላ
ኣሳ ቦላ ቂꬌኒኔ
ካꬌን ኣሳይ፥ ‹ባ ካይሲ ኤኪዳ
ሻቃጬዛ ባስ ሺሺዛዴስ፥
ጌኔን ዱሬቲዛዴስ ኣዬ ኣና!
ሄሳꬆ ኣይዴ ጋካናስ
ሺሻኔ?›
ጊ ኢዛ ቦላ ሚጬኔ?
7 ኔ ኣጮን ዬጊዳ ኣሳቲ
ኔ ቆፖንታ ኔ ቦላ
ዴንዴቴኔ?
ኢስቲ ቤጊዲ
ኔና ዳጋንꬄቴኔ?
ሄሳፌ ጉዬ
ኔ ኢስታ ኩሼን ኩንዳና።
8 ኔ ዳሮ ዴሬ ሚሽ
ቦንቂዳ ጊሻስ
ሃንኮ ቦንቄቶንታይቲ
ኔና ቦንቃና፤
ኔ ኣሳ ሱꬅ ጉሳዳሳ፤
ዴራ፥ ካታማኔ
ኢዛን ዲዛይታ ዉርሳ ꬋይሳዳሳ።
9 «ዎርዶራ ባሌꬂ ኤኪዳ ሚሻን
ባስ ዳና ኬꬅ
ኬጺዛዴሲኔ
ባ ሞርኬ ኩሼፔ ኣታናስ
ባ ኬꬅ ꬎቃሶሆን ኬጺዛዴስ
ኣዬ ኣና!
10 ዳሮ ኣሳ ሼምፖይ
ꬋያና ማላ ቃቻዳሳ፤
ኔ ኬꬃ ቦላኔ
ኔ ቦላ ꬋይሲዛዝ ኤሃዳሳ።
11 ጊምቤ ጊዶን ሹቺ ዋሴስ፤
ጊዶን ጎዳ ኤቂዳ ሚꬃቲካ
ኢዛስ ዛሮ ኢሜቴስ።
12 «ሱꬅ ጉሲዲኔ ኢታ ኦꬂዲ
ካታማ ኤሲዛይታስ ኣዬ ኣና!
13 ኣሳ ኦሶይ ኡባይ
ታማን ጹጌታና ማላ
ዴሬይካ ሜላ ዳቡራና ማላ
ጎዳይ ኡባፌ
ዎልቃማ ጾሳይ
ኡባ ዎꬂቤኔ?
14 ኣባይ ኩሚዛ ማላ ቢታይ
ጎዳ ጊታቴꬅ ኤሮን ኩማና። ኢሳ 11፡9
15 «ኣሳ ካሎቴꬅ ቤያናስ
ባ ላጌታ ኡሹ
ኡሺዛዴሲኔ
ኢስቲ ኡዪዲ ማꬆታና ጋካናስ
ዎይኔ ኡሹ ዱቂዛዴስ
ኣዬ ኣና!
16 ኔኒ ቦንቾ ጊሻስ ዬላታና፤
ሄሲካ ሃኢ ታራይ ኔስ ጊዲዳ
ጊሻስ ኡያዳ ጋንዲጋራ፤
ኔ ካሎታ።
ጎዳ ኡሻቻ ኩሼን ዲዛ
ሃንቆ ጹኣይ ኔ ቦላ ሲማና፤
ካሴ ኔስ ዲዛ ቦንቾዛ
ካዉሻቴꬃን ላማና።
17 ኔ ሊባኖሴ ቦላ
ኦꬂዳ ጌኔይ
ኔና ሚታና፤
ኔኒ ሜዶሳታ ꬋይሲዳይሲ
ዛሪ ኔና ዳጋንꬃና፤
ሄሲካ ኔ ኣሳ ሱꬅ ጉሲዳ
ጊሻሲኔ
ዴሬታ፥ ካታማታኔ
ኢስታን ዲዛይታ
ኔ ኡባ ꬋይሲዳ ጊሻሳ።
18 «ኣሳ ኩሼይ ማሲ ጊግሲዳ ኤቃኔ
ዎርዶ ሃሳይዛ ሚስሌስ
ኣይ ጎኣይ ዲዜ?
ሂስቲን ኢዛ ኦꬂዳዴይ
ባርካ ባ ኦሶን ኣማኔቲዛ
ጊሻሲኔ
ኢስቲካ ሃሳያናስ ዳንዳዮንታ
ኤቃ ኦꬂዛ ጊሻሳ።
19 ሚꬃ፥ ‹ኔ ቤጋ!›
ሼምፖይ ባይንዳ ሹቻካ፥
‹ኔ ዴንዳ!› ጊዛዴስ ኣዬ ኣና!
ቱሙካ ኢዚ ታማርሳና
ዳንዳይዜ?
ሄኮ ኢዚ ቦላራ ዎርቃኒኔ
ቢራን ቲዬቲዴስ፤
ኢዛስ ሼምፖይካ ዴና።
20 ጎዳይ ጊዲኮ ባ ጌሻ
ኬꬃን ዴስ።
ቢታ ቦላ ዲዛ ዴሬይ ዉሪካ
ኢዛ ሲንꬃን ጮኡ ጎ» ጊዴስ።