1 ላፑንꬃ ኣጊናይ ጌሊዳ ናምኡ ታማኔ ኢሲንꬃ ጋላስ ጎዳ ቃላይ ናቤ ሃጌ ባጋራ ሂዝጊሼ ዪዴስ። 2 ጎዳይ ኡባፌ ዎልቃማ ጾሳይ ሃጌስ፥ «ዩሁዳ ኣይሲዛ ሳላቲያሌ ና ዜሩባቤሌስ፥ ቄሴታ ሃላቃ ኢዮሳዶቄ ና ኢያሶሲኔ ዲኦፔ ሼምፖራ ፓጻ ኣቲ ሲሚዳ ኣሳስ፥ 3 ‹ኢንቴ ጋርሳን ሃይሳ ኬꬃ ካሴ ኢዚ ቦንቾራ ዲሺን ቤኢዳዴይ ኦኔ? ሃኢ ቃሴ ኢንቴስ ኣይ ሚሳቲ ቤቲዜ? ሃይሲ ኢንቴ ኣቻን ቆዳን ጌሎንታዝ ጊዴኔ?ኢዝ 3፡12 4 ሃኢ ቃሴ ዜሩባቤሌ ሚና! ቄሴታ ሃላቃ ኢዮሳዶቄ ና ኢያሶ ሚና! ኢንቴኖ ሃ ዴሬ ኣሳቶ ዉሪካ ሚኒቴ! ታ ኢንቴናራ ዲዛ ጊሻስ ኦꬂቴ› ጋ ዮታኔ ኦይቻ። 5 ኢንቴ ጊብጼፔ ኬዚዛ ዎዴ ታ ኢንቴስ፥ ‹ታ ኣያናይ ኢንቴናራ ዲዛ ጊሻስ ባቦፍቴ› ጊዳ ቃላይ ሃይሳ። ኬሳ 29፡45-46

6 «ጎዳይ ኡባፌ ዎልቃማ ጾሳይ፥ ‹ማታ ዎዴ ታ ናምኣንꬆ ሳሎኔ ሳኣ፥ ኣባኔ ቢታ ኢሲቶ ቃꬃና።ኢብ 12፡26 7 ካዎቴꬃታ ኡባ ታ ቃሴꬃና። ካዎቴꬃታ ኡባ ሃሮይ ሃ ያና ማላ ታ ኦꬃና። ሃይሳ ሃ ኬꬃን ታ ኣንጆ ኩንꬃና። 8 ኩሜꬃ ኣላሜን ዲዛ ቢራይኔ ዎርቃ ኡባይ ታሳ። 9 ሃይሳ ሃ ኬꬃ ቦንቾይ ካሴ ኬꬃ ቦንቾፌ ኣꬋና። ታኒ ሃይሳን ኢንቴስ ኩሜꬃ ሳሮቴꬅ ኢማና› » ጌስ።

10 ዳሪዮሲ ካዎቲዳ ናምኣንꬆ ላይꬃን ኡዱፉንꬆ ኣጊናይ ጌሊዳ ናምኡ ታማኔ ኦይዳንꬆ ጋላስ ጎዳ ቃላይ ናቤ ሃጌ ባጋራ ሂዝጊሼ ዪዴስ። 11 ጎዳይ ኡባፌ ዎልቃማ ጾሳይ፥ «ሙሴ ዎጋይ ኣይ ጊዛኮ ቄሴታ ሃላቃታ ሂዝጋ ኦይቻ። 12 ኢሲ ኣሲ ጾሳስ ያርሼቲዛ ኣሾ ባ ኣፋላ ቃላምኦ ጊዶን ኤኪኮ ሄ ማይኦዛራ ዲዛ ኣሾይ፥ ዎይኮ ኡኬꬂ ዎይኮ ዎጼይ ዎይኮ ዎይኔፔ ኣጌቲዳ ጫጄይ ዎይኮ ዛይቴይ ዎይኮ ሃራ ኣይ ቆሞ ካꬅ ኢዚ ቦቺኮ ሄ ቦሼቲዳይሲ ጌሽ ጊዳንዴ?» ጊዲ ኦይቺን ቄሴቲካ፥ «ጌሽ ጊዴና» ጊዲ ዛሪዳ።

13 ሃጌይ ቃሴካ፥ «ኣሃ ቦቺዲ ቱኒዳ ኣሲ ሄይታፔ ኢሳ ቦቺኮ ሄ ቦሼቲዳ ካꬃይ ቱናንዴ?» ጊ ኦይቺን ቄሴቲካ፥ «ኤ ቱናና» ጊዲ ዛሪዳ። ታይ 19፡11-22

14 ሄሳፌ ጉዬ ሃጌይ፥ « ‹ሃይሲ ዴሬይኔ ሃይሳ ባጋ ኣሳይካ ሄሳ ማላ፤ ኢስታ ኦሶይኔ ኢስቲ ታስ ሺሺዛ ኢሞታይ ዉሪካ ሄሳ ማላ ታ ሲንꬃን ቱና› ጌስ ጎዳይ።

15 «ጎዳይ፥ ‹ሃቺፌ ዶሚዲ ጾሳ ኬꬃ ጊምቤታ ዶማናፔ ካሴ ኢንቴ ቦላን ጋኪዳይሳ ኣኬኪቴ። 16 ኢንቴ ናምኡ ኮንታሌ ካꬅ ኤካና ጊዲ ካꬃ ዶሬኮ ቢዴታ ሺን ኢሲ ኮንታሌ ጻላ ዴሚዴታ። ኢሲ ጼቱ ሊቲሮ ጊዲዛ ዎይኔ ኡሹ ኤካናስ ጊዲ ዎይኔ ኡሹ ጉምኢዛሶሆ ቢዴታ ሺን ፔጺ ኦይዱ ታሙ ሊቲሮ ጻላ ዴሚዴታ። 17 ታኒ ኢንቴ ኩሼይ ኦꬂዳዝ ዉርሳ ኩቱልኤን፥ ቆሻኒኔ ሻቻን ꬋይሳዲስ፤ ጊዲኮካ ኢንቴ ቃሴ ሃ ታኮ ሲሚቤኬታ። 18 ሃኖ ሃ ኡዱፉንꬃ ኣጊናይፔ ሃች ሃ ናምኡ ታማኔ ኦይዳንꬆ ጋላሳፌ ሃ ሲሚን ጾሳ ኬꬃስ ዮቺ ዬጌቲዳ ጋላስ ጋካናስ ዲዛ ዎዴዛ ዎዚናን ዎꬂቴኔ ዩሺ ቆፒቴ። 19 ሃኢ ዜሬꬃስ ጊዲዛ ካꬅ ጎታራን ꬋይኮ፥ ቃሴካ ዎይኔይኔ ባላሴ ሚꬂ፥ ኦሮማኔይኔ ዎጋራ ሚꬂ ኡባይ ሃች ጋካናስ ኣይፌ ኣይፎንታ ኣጊኮካ፥ ሃቺፌ ዶማዳ ታኒ ኢንቴና ኣንጃና› ጌስ» ጊዴስ።

20 ሄ ኣጊናን ናምኡ ታማኔ ኦይዳንꬆ ጋላስ ጎዳ ቃላይ ቃሴካ ሂዝጊሼ ሃጌኮ ዪዴስ። 21 ጎዳይ ሃጌስ፥ «ዩሁዳ ሃሪዛ ዜሩባቤሌስ፥ ‹ታኒ ሳሎኔ ሳኣ ቃꬃና› ጊዴስ ጋዳ ዮታ። 22 ካዎታ ታ ኢስታ ኣራታፔ ዲጋና፤ ኣላጋ ካዎታስ ዲዛ ዎልቃ ታ ꬋይሳና፤ ፓራ-ጋሬታኔ ኢስታ ቶጋንቻታ ታ ሺራ ዬጋና፤ ፓራቲኔ ፓራ ቶጊዛይቲ ኢሶይ ኢሳራ ባንታ ጊዶን ሃይቄታና።