1 ዳሪዮሲ ካዎቲዳ ናምኣንꬆ ላይꬃን ኡሱፑንꬃ ኣጊናይ ጌሊዳ ኮይሮ ጋላስ፥ ጎዳ ቃላይ ናቤ ሃጌ ባጋራ ዩሁዳ ዴሬ ሃሪዛ ሳላቲያሌ ና ዜሩባቤሌኮኔ ቄሴታ ሃላቃ ኢዮሳዶቄ ና ኢያሶኮ ሂዝጊሼ ዪዴስ። ኢዝ 4፡24—5፡2፤ 6፡14 2 ጎዳይ ኡባፌ ዎልቃማ ጾሳይ፥ «ሃይሲ ዴሬይ፥ ‹ጾሳ ኬꬂ ኬጼቲዛ ዎዴይ ቡሮ ጋኪቤና› ጌስ።»

3 ጎዳ ቃላይ ናቤ ሃጌ ባጋራ ሂዝጊሼ ዪዴስ። 4 «ታ ኬꬃይ ላሌቲ ዲሺን ኢንቴ ሎኦ ኬꬃን ዳናስ ሃይሲ ኢንቴስ ቤሲዛ ዎዴዬ?»

5 ሄሳ ጊሻስ ጎዳይ ኡባፌ ዎልቃማ ጾሳይ ኢንቴና፥ «ኣኔ ኢንቴ ኦꬆይሳ ቆፒቴ። 6 ዳሮ ዜሪዴታ ሺን ጉꬅ ማጺ ሺሺዴታ። ሚዴታ ሺን ካሊቤኬታ፤ ኡዪዴታ ሺን ኣሊቤኬታ፤ ማይኢዴታ ሺን ማይኦይ ኢንቴና ሆኢቤና፤ ዳሞዛ ኤኪዴታ ሺን ኢንቴ ኤኪዳ ዳሞዛይ ዳኬꬃ ካራጺቴን ዎꬂዳይሳ ማላ» ጌስ።

7 ጎዳይ ኡባፌ ዎልቃማ ጾሳይ፥ «ኣኔ ኢንቴ ኦꬂዳይሳ ቆፒቴ። 8 ፑዴ ዙማ ቦላ ኬዚዲ ሚꬅ ኤኪ ዪቴ፤ ኬꬃካ ኬጺቴ፤ ታኒካ ኢዛን ኡፋዬታናኔ ቦንቼታና» ጌስ። 9 ጎዳይ ኡባፌ ዎልቃማ ጾሳይ፥ «ኢንቴ ዳሮ ዴማና ጊዴታሺን ጉꬅ ዴሚዴታ፤ ሂኖካ ኢንቴሶ ጌልꬂዳ ዎዴ ታ ፑና ꬋይሳዲስ። ሄሳ ታ ኦꬂዳይ ኢንቴስ ኣይ ሚሳቲዜ? ታ ኬꬃይ ላሌቲ ኡቲን ኢንቴ ዉሪካ ኢንቴ ኬꬅ ኬጻናስ ዎጺዛ ጊሻሳ። 10 ሄሳ ጊሻስ ኢንቴ ጌዶን ሳሎፔ ፑሴይካ ዲጌቲዴስ፤ ቢታይካ ካꬅ ዲጊዴስ። 11 ታኒካ ጎሻታ ቦላኔ ዙማታ ቦላ፥ ካꬃ ቦላኔ ኦራꬃ ዎይኔ ኡሻ ቦላ፥ ዛይቴ ቦላ፥ ቢታይ ኢሚዛ ኣይፌ ኡባ ቦላ፥ ኣሳ ቦላ፥ ሜሄ ቦላኔ ኢንቴ ኩሼ ኦሶ ኡባ ቦላ ኮሻ ኤሃና» ጌስ።

12 ሄሳፌ ጉዬ ሳላቲያሌ ና ዜሩባቤሌይ ቄሴታ ሃላቃ ኢዮሳዶቄ ና ኢያሶይኔ ዲኤቴꬃፌ ሼምፖራ ፓጻ ሲሚዳ ኣሳይ ጎዳ ባንታ ጾሳ ቃላኔ ናቤ ሃጌ ባጋራ ጾሲ ኪቲዳ ቃላስ ኣዛዜቲዳ። ኣሳይካ ጎዳስ ያዪዴስ። 13 ቃሴካ ጎዳይ ኪቲዳ ሃጌይ ሄሳ ጎዳ ኪታ ዴሬዛስ፥ «ጎዳይ ታ ኢንቴናራ ዳይስ» ጌስ ጊዲ ዮቲዴስ። 14 ሄሳ ጊሻስ ጎዳይ ዩሁዳ ኣይሲዛ ሳላቲያሌ ና ዜሩባቤሌ፥ ቄሴታ ሃላቃ ኢዮሳዶቄ ና ኢያሶኔ ዲኤቴꬃፌ ሼምፖራ ፓጻ ሲሚዳ ዴሬዛ ኡባ ዎዚና ዴንꬄꬂዴስ። ኣሳይካ ዪዲ ባ ጎዳ ኡባፌ ዎልቃማ ጾሳ ኬꬅ ኬጾ ዶሚዴስ። 15 ሄሲካ ዳሪዮሲ ካዎቲዳ ናምኣንꬆ ላይꬃን ኡሱፑንꬃ ኣጊናይ ጌሊዳ ናምኡ ታማኔ ኦይዳንꬆ ጋላስ ሃኒዴስ።