ኣስ ኡንኤꬂዛይታ ካታማይስ

ኣዬ ኣና!

ኦኒ ዞሪንካ ኤኩኩ፤

ጎዳንካ ኣማኔቱኩ፤

ባ ጾሳኮካ ሺቁኩ።

ጻጊዛ ጋሞ ማላ።

ኢዞ ኣይሲዛይቲካ ዎንቶስ ኣሾንታ

ሚዛ ካና ሱይቴ ማላ።

ኣስ ባሌꬂዛይታ።

ቄሴቲ ጾሳ ኬꬃ

ቱኒሴቴስ፤

ዎጋ ቦላካ ማካሌቴስ።

ሙሌካ ባሌቲ ኤሬና፤

ማላዶ ማላዶ ሱሬ ፒርዴስ፤

ኡባ ጋላሲካ ዳቡሪ ኤሬና፤

ጊዶ ኣቲን ማካላንቻታስ

ዬላይ ዴና።

ኢስታ ሚጻይ ሙሌራ ꬋይዴስ፤

ኦኒካ ኢዛራ ኣꬎንታ ማላ

ኢስታ ኦጌ ካይዚሳዲስ፤

ኢስታ ካታማቲ ሙሌራ ꬋይዳ፤

ኢሲ ኣሲካ ዴና፤

ኢስታን ዴኣናይካ ዴና።

ቱማፔ ኔኒ ታስ ያያና፤

ታ ሴሪሺን ኔ ኤካና ጋዲስ ሺን፤

ሄሳ ጊሻስ

ኢዚ ዱሳሶይ ꬋዬና፤

ኢዚ ቦላ ቂጻቴይ ጋኬና።

ጊዶ ኣቲን ታ ዴሬይ ኢታ ኦሶን፥

ካሴፔ ጌዴ

ሚኒ ሚኒ ቢዴስ» ጌስ።

ጋላሳይ ጋካናስ ዲሺቴ፤

ታኒ ዴሬ ኣሳኔ

ካዎታ ሺሻናስ ቃቻዲስ።

ታኒ ታ ሚኖ ሃንቆዛ ኢስታ ቦላ

ጉሳናስ ቃቻዲስ።

ታ ሃንቆ ታማን

ኩሜꬃ ቢታይ ኤጻና።

ጎዳ ሱንꬅ ጼይጋና ማላኔ

ሲጋን ኢዛስ ሃጋዛና ማላ

ታ ኢስታ ዶና ጌሻና።

ሄ ፒንꬃን ላሌቲ ዲሼ

ታስ ጎይኒዛ ታ ዴሬይ

ታስ ያርሾ ኤሃና።

ኡባፌ ዴንዲዳይሳን፤

ሄ ጋላስ ዬላቴኬታ፤

ባ ኦቶሬቴꬃን ኡፋዬቲዛይታ፥

ሃኖ ሃ ካታማይፔ ታ ዲጋና።

ሄሳፌ ጉዬ ታ ጌሻ ዙማን፥

ኢንቴ ታ ቦላ ኦቶሬቴኬታ።

ኣሽኬታኔ ባንታና

ካዉሺዛይታ፤

ታ ኢንቴ ጊዶን ኣሻና።

ናጋራ ኦሴቴና።

ዎርዶ ሃሳዬቴና፤

ኢስታ ዶናንካ

ጌኔ ሃሳያይ ዴና።

ሄሳ ጊሻስ ኢስቲ ሚዲ

ሳሮን ዴኣና፤

ኢስታ ባቢሳና ሚሺካ ዴና። ኣጁ 14፡5

ኢስራኤሌ ኣሳዉ ኣኔ ኢሊሊቴ!

ሃኔ ዬሩሳላሜ ናዬ!

ኩሜꬃ ዎዚናፔ ኡፋዬታ!

ኡፋዬታሼ ሃሹ ጋ!

ዪዛ ቂጻቴዛ ዲጊዴስ፤

ኔ ሞርኬታካ ኔፔ ዛሪዴስ።

ጎዳይ ኢስራኤሌ ካዎይ

ኔናራ ዴስ፤

ሃይሳፌ ጉዬ

ኣይ ኢታሲካ ባባካ።

‹ጺዮኔ ኔ ባቦፋ፤

ኔ ቄሴይ ዳቡሮፖ።

ኢዚ ኣሺዛ ሚኖ ኦላንቻ።

ኢዚ ኔናን ዳሮ ኡፋዬቴስ፤

ኢዚ ባ ሲቆን ኔና ዎፒሳና፤

ኔ ዬꬃን ኢዚ ቦንቼቲዲ

ኡፋዬታና› ጋና።

ኣቲዳ ጊሻስ

ኔኒ ሙዞቲዳይሳኔ፥

ኔስ ቶሆ ጊዲዳ ዬላ

ታ ኔፔ ዲጋና።

ታ ቃጻያና።

ዎቤታ ታ ኣሻና፤

ላሌቲዳይታካ

ታ ሺሻና።

ኢስቲ ካዉዪዳ ዴሬ ኡባን

ታ ኢስታ ቦንቾሲኔ

ሳባስ ጋꬃና።

ኢንቴ ዴሬ ታ ኢንቴና ዛራና።

ኢንቴ ኢንቴ ኣይፌራ ቤዪሺን፥

ኢንቴፌ ዲኤቲዳ ሚሻ

ታ ኢንቴስ ዛሪዛ ዎዴ

ቢታ ቦላ ዲዛ

ዴሬ ኡባ ሲንꬃን

ታ ኢንቴስ ሳባኔ

ቦንቾ ኢማና» ጌስ።