4
ኢስራኤሌ ቦላ ዴንዲዳ ሞቶ
1 ሃኖ ቢታይ ቦላ ዲዛ ኣሳ ኡባ ቦላ
ጎዳይ ሺሺዛ ሞቶይ ዴስ።
ሄሳ ጊሻስ ኢስራኤሌ ኣሳዉ!
ኢዚ ኢንቴና ጊዛይሳ ሲዪቴ፤
«ሃኖ ቢታይ ቦላፌ
ኣማኔቴꬃይ፥
ሲቆይኔ ጾስ ኤሮይ ꬋይዴስ።
2 ሃን ዲዛይ ቃንጌꬅ፥ ዎርዶ፥
ሼምፖ ዎꬎ፥ ላይማቴꬂኔ
ጫቂዳ ቃላ ሙሲ ጻላ ዴስ።
ጌኔይኔ ሼምፖ ዎꬎይ
ዳሪ ዳሪ ቤስ።
3 ሄሳ ጋሶን ቢታይ ቦላ
ኮሻይ ዬስ፤
ኢዚ ቦላ ዲዛይ ዉሪ ጊልቄስ፤
ሜሄቲ፥ ዶኣቲ፥ ካፎቲኔ
ኣባ ጊዶን ዲዛ ሞሌቲ
ኡባይ ዉሬቴስ።»
ጎዳይ ቄሴታ ቦላ ሃንቄቲዴስ
4 ጎዳይ፥ «ኢንቴኖ ቄሴቶ
ታ ኢንቴና ሞቲዛ ሚሺ ዴስ፤
ሄሳ ጊሻስ ኦኒካ
ሃራ ኣሳራ ፓላሜቶፎ፤
ቃሴ ኦኒካ ሃራ ኣስ ሞቶፖ።
5 ኢንቴ ኦማርሲኔ ጋላስ
ꬉጴቴታ፤
ናቤቲካ ኢንቴናራ
ꬉጴቴቴስ።
ሄሳ ጊሻስ ታኒ ኢንቴ ኣዮ
ኢስራኤሌ ꬋይሳና።
6 ታ ዴሬዛስ ኤራቴꬂ
ፓጪዳ ጊሻስ ꬋይዴስ።
ኢንቴ ታና ኤራናስ
ኮዮንታ ጊሻስ
ታኒካ ኢንቴ ታስ ቄሴታ ጊዲ
ኦꬃና ማላ ኮይኬ።
ኢንቴ ታ ዎጋ ባሌቲዳ ጊሻስ
ታኒካ ኢንቴ ናይታ ባላና።
7 ቄሴታ ቆዳይ ዳሪ ዳሪ ቢሺን
ኢስቲ ታ ቦላ ኦꬂዳ ናጋራይ
ዳሪ ዳሪ ቢዴስ፤
ባንታ ቦንቾካ
ካዉሻን ላሚዳ።
8 ታ ዴሬዛ ናጋራይ
ኢስታስ ሙሳስ ኪዪዴስ፤
ሄሳ ጊሻስ ዴሬይ
ናጋራ ኦꬂዛይሳ
ኬሂ ዶሲዳ።
9 ኢንቴ ቄሴቲካ ዴራፔ
ዱማቴኬታ፤
ሄሳ ጊሻስ ታ ኡባካ
ኢዛዴ ሃኖ ማላ ኢዛ ቃጻያና፤
ኢዛ ኦሶ ማላካ ኢዛስ ኢማና።
10 ታ ዴሬይ ታና ጎዳ
ኣጊዳ ጊሻስ
ኢስቲ ማናሺን
ካሌቴና፤
ላይማታናሺን
ጮራቴቴና» ጌስ።
ጎዳይ ኤቃ ጾሳታስ ጎይኖ ኢጼስ
11 «ላይማቴꬃስ፥
ጫሊዳ ዎይኔ ኡሻስ፥
ማልኦ ዎይኔ ኡሻ ሱኬስ
ባንታና ኣꬂ ኢሚዳ፤
ሄሳንቲ ታ ዴሬዛ
ዎዚና ኤኪዳ።
12 ሄሳ ጊሻስ ሚꬃፌ ኦሴቲዳ
ኤቃ ጾሳ ዞሬ ኦይቼቴስ፤
ኢስቲ ኢዛን ማሮꬂዛ ጉፌዚካ
ኢስታስ ዛሮ ኢሚዛ ሚሳቴስ፤
ላይማቴꬃ ቆፋይ ባሌꬂዴስ፤
ባንታ ጾሳስ
ኣማኔቲቤቴና።
13 ዙማይ ዲዛሶን ዲዛሶን
ያርሾ ያርሼቴስ፤
ዙምቡላታ ቦላ፥
ጊታ ዳሻ ሚꬃታ
ኩዋ ጋርሳን
ጹጌቲዛ ያርሾ ያርሼቴስ።
ሄሳ ጋሶን ኢንቴ ማጫ ናይቲ
ላይማን ዳና፤
ኢንቴ ናይታ ማቼቲ ላይማታና።
14 ኢንቴ ማጫ ናይቲኔ
ኢንቴ ናይታ ማቼቲ
ላይማቲሺን ታኒ ኢስታ ቃጻይኬ፤
ጋሶይካ ኢንቴ ኣቱማሳቲ
ላይማ ማጫሳታራ ሱኬቴቴስ፤
ኤቃ ጾሳታስ ላይማቴꬃ
ያርሾ ሺሺዛይታራ
ኢንቴካ ኢዛꬆ ያርሼታ።
ሄሳ ጊሻስ ኣኬካይ ባይንዳ
ዴሬይ ꬋያና።
15 «ኢንቴኖ ኢስራኤሌ ኣሳቶ!
ኢንቴ ላይማቲኮካ
ዩሁዳ ኣሳይ
ላይማታና ማላ ኦꬆፍቴ፤
ሄሳ ጊሻስ ታስ ጎይናናስ
ጌልጌላ ዎይኮ
ቤቲ-ኣዌኔ ጌቴቲዛሶ ቦፒቴ፤ *ቤት-ኣዌኔ፡ ቤት-ኣዌኔ ጉሲ ኢታቴꬃ ኬꬅ ጊዲሺን ቤትኤሌስ ኢሜቲዳ ጫቻ ሱንꬃ።
‹ዴኦ ጎዳይ ቤዪን› ጊዲ
ታ ሱንꬃን ጫቆፍቴ።
16 ኢስራኤሌ ዴሬይ ማካላንቻ
ኡሳ ማላ ማካሊዴስ፤
ሂስቲን ጎዳይ ኢስታ
ዶርሳ ላቃታ ማላ
ሎኦሶን ዎስቲ ሄማኔ?
17 ኤፍሬሜይ ኤቃ ጾሳታ ጎይኖን
ኦይኬቲዳ ጊሻስ
ኢስታ ጌዴ ኣጋጊቴ።
18 ዎይኔ ኡሹ ኡዪዳፔ ጉዬ
ላይማቴቴስ።
ኢስታ ኣይሲዛይቲካ
ዬላቺዛ ሚሽ ዶሴቴስ።
19 ኢስታ ጎቴ ጫርኮይ ፒቲ ኤፋና፤
ኢስታ ያርሾይ ኢስታ ቦላ
ዬላ ኤሃና።