5
1 ኢንቴኖ ቄሴቶ ሃይሳ ሲዪቴ!
ኢስራኤሌ ኣሳቶ ኣኬኪቴ!
ካዎ ኬꬃ ኣሳቶ
ሃይሳ ኤዝጊቴ!
ሄኮ ፒርዳይ ኢንቴ ቦላ ዪዴስ፤
ጋሶይካ
ኢንቴ ሚጺጳን ናርጻ፥
ታቦሬ ዙማን ጊቴ ጊዲዴታ።
2 ማካላንቻቲ ሼምፖ ዎꬎ
ካሴፔ ሃ ዳርሲዳ፤
ሄሳ ጊሻስ ታኒ ኢስታ
ኡባካ ቃጻያና።
3 ታኒ ኢስራኤሌ ኣሳ ኡባ ኤራይስ።
ኢስራኤሌይ ታ ኣይፌፔ
ጌማቤኩ፤
ኤፍሬሜ፥ ኔኒ ላይማቴꬃ
ጎይኖን ቱናዳሳ። *ኤፍሬሜ፡ ኤፍሬሜ ጌቴቲዛይሲ ኢስራኤሌስ ናምኣንꬆ ሱንꬃ።
4 ኢስራኤሌ ኣሳይ ኦꬂዳ ሞሮይ
ኢስቲ ባ ጾሳኮ
ሲሞንታ ማላ ዲጊዴስ።
ላይማቴꬃ ኣያናይ
ኢስታ ዎዚና ኩሚዴስ።
ሄሳ ጊሻስ
ኢስቲ ጎዳ ኤሬቴና።
5 ኢስራኤሌ ኣሳ ኦቶሮይ
ኢስታ ቦላ ሲሚ ማርካቴስ።
ኢስቲ ባንታ ናጋራን ꬉጴታና።
ዩሁዳይካ ኢስታራ ኢሲፌ
ꬉጴቲ ኩንዳና።
6 ኢስቲ ጎዳ ኮያናስ
ባንታ ዉዴ ሜሄታኔ
ሚዛታካ ላጊ ኤፋና፤
ጊዶ ኣቲን ኢዚ ኢስታፌ
ሻኬቲዳ ጊሻስ
ኢስቲ ኢዛ ዴሜቴና።
7 ኢስቲ ኤቃ ጾሳታስ
ጎይኒዛ ጊሻስ
ጎዳስ ኣማኔቲቤቴና፤
ኢስቲ ላይማን ናይታ ዬሊዳ።
ሄሳ ጊሻስ ኢስቲ ኣጊና ጼሮን
ቦንቺዛ ባኣሌይ
ኢስታኔ ኢስታ ናይታ
ኢሲፌ ꬋይሳና።
ኢስራኤሌኒኔ ዩሁዳ ጊዶን ዴንዳና ኦላ
8 ኣሳይ ኦላስ ኬዛና ማላ
ጊቢኣን ዛዬ ዛዪቴ፤
ኤራማን ጹሩምባ ፑኒቴ።
ቤቲ-ኣዌኔን፥
‹ቢኒያሜ ባጋቶ!
ኑ ኢንቴናራ ዶስ› ጊሼ ዋሲቴ።
9 ቂጻቴይ ዪዛ ዎዴ
ኤፍሬሜይ ቡላ ጊዳና፤
ሃይሲ ኢስራኤሌ ቦላ
ጋካናይሳ
ታ ሎኤꬃ ኤሪሳይስ» ጌስ።
10 ጎዳይ፥ «ዩሁዳ
ካሌꬂዛይቲ ꬋስ
ሾዲዛ ኣሳ ማላ
ጊዲዳ ጊሻስ
ታኒ ታ ሃንቆ ሃꬃ ዲኦ ማላ
ኢስታ ቦላ ዬዳና።
11 ኢስራኤሌ ኣሳይ ሃዳ ጾስ
ካሎን ሚኒዴስ።
ሄሳ ጋሶን ናቄቲዴታኔ
ፒርዳን ቆሄቲዴታ።
12 ሄሳ ጊሻስ ታኒ
ኢስራኤሌ ኣሳ ፒኖ ማላ፥
ዩሁዳ ኣሳስ ቃሴ
ቁኖ ማላ ጊዳና።
13 ኢስራኤሌይ ባ ሳኮዛ፤
ዩሁዳይካ ባ ማዱንꬃ ቤኢዲ
ኢስራኤሌይ ኣሶሬኮ
ባ ኣይፍሶ ዛራዱስ፤
ኢስራኤሌይ ማዶ ዴማናስ
ጊታ ኣሶሬ ካዎኮ
ቃስታኔ ኪታዱስ።
ጊዶ ኣቲን ኢዚ ኢንቴና ኣሻናስ
ዎይኮ ኢንቴ ማዱንꬃ
ፓꬃናስ ዳንዳይቤና።
14 ሄሳፌ ዴንዲዳይሳን
ታኒ ኢስራኤሌስ ጋሞ ማላ
ዩሁዳስካ ዎዳላ
ጋሞ ማላ ጊዳና፤
ታ ኢስታ ኒፊፊ ሂስታ
ሜንꬄሬꬃ ዬጋና፤
ቦንቃ ኤካዳ ባና፤
ኦኒካ ኢስታ ታ ኩሼፔ
ኣሻናስ ዳንዳዬና።
15 ኢስቲ ባ ባላ ኤሪዲ ታኮ ሲማና ጋካናስ
ታኒ ኢስታፌ ሃካና።
ኢስታ ቦላ ሜቶይ ዳሪዛ ዎዴ
ኢስቲ ታና ሚንꬂ ኮያና» ጌስ።