7
1 «ታኒ ታ ዴሬ ኢስራኤሌ
ኣሳ ፓꬃናሲኔ
ዛራዳ ዱሬሳናስ ኮይዛ ዎዴ፤
ኤፍሬሜ ናጋራይኔ
ሳማሪያ ኣሳ ኢታቴꬂ
ኬሂ ዳሪ ቤቲዴስ።
ኢስቲ ኢሶይ ኢሳስ ዎርዶቴቴስ፥
ካይሶቲ ኬꬄ ቦኪ ጌሊዲ
ካይሶቴቴስ፥
ፓንጋቲ ኦጌ ቦላ
ኣꬎሶን ኣꬎሶን
ቦንቄቴስ።
2 ጊዶ ኣቲን ታኒ ሃይሳ
ኢስታ ኢታቴꬃ ዉርሳ ኤሪዛይሳ
ኢስቲ ኣኬኪቤቴና።
ሄሳ ጊሻስ ኢስታ
ኢስታ ናጋራይ ጊዶꬂ
ዎꬂዴስ፤
ኢስታ ኢታ ኦሶይ
ታፔ ጌሚቤና» ጌስ።
ካዎ ኬꬃን ዴንዲዳ ኢታ ማቆ
3 ጎዳይ፥ «ኢስቲ ካዎዛ ባ ኢታቴꬃን
ሃላቃታካ ባንታ ዎርዶን
ባሌꬄቴስ።
4 ኢስቲ ዉሪካ ላይማቲዛይታ፥
ቡኬሶይ ዴንዳና ጋካናስ
ዳቦ ኡኪዛዴይ
ታማ ኤꬃናስ
ኮሾንታ ሴሊሲዳ ጮጬ ማላ።
5 ኑ ካዎዛ ባኣሌ ጋላስ
ሃላቃቲ ዎይኔ ኡሻን
ማꬆ ሌላ ጊዳ።
ኢዚካ ቂꬊዛይታራ ዙፔቲዴስ።
6 ኢስታ ዎዚናይ
ጮጬ
ታማ ማላ ሴሊዴስ፤
ጌኔን ኢዛኮ ሺቄቴስ።
ኢስቲ ኦማርሲ ኩሜꬂ
ሃንቆ ጩዋቲሼ ኣቄቴስ
ዎንቴꬃ ጋላስ ኤጺዛ ታማ ማላ
ፖፖልኡ ጌቴስ።
7 ዉሪካ ታማ ጮጬ ማላ ሴሊዳይታ፤
ባንታና ኣይሲዛይታ
ዲፒ ሂስቲ ዉርሲዳ።
ኢስታ ካዎቲካ ኩንዲዳ፤
ኢስታፌ ኦኒካ
ታኮ ሺቂቤና።
ኢስራኤሌ ኣሳይ ሃራ ካዎቴꬃታራ ዋላኬቲዴስ
8 «ኤፍሬሜይ ሃራ ካዎቴꬃታራ ዋላኬቲዴስ፤
ኢዚ ሺሬቶንታ ኣቲዳ
ኡኬꬃ ማላ።
9 ኣላጋቲ ኢስታ ዎልቃ ሚዳ፤
ጊዶ ኣቲን ኢስቲ ሄሳ
ኤሪቤቴና።
ኢዛ ሁኤይ ፑሉንꬅ ጫዲዴስ፤
ጊዶ ኣቲን ኢዚ ሄሳ ኤሪቤና።
10 ኢስራኤሌ ኣሳ ኦቶሬቴꬂ
ኢስታ ቦላ ማርካቴስ፤
ሄሲ ዉሪ ሃኒንካ
ኢስቲ ጎዳ ባንታ ጾሳኮ
ሲሚቤቴና፤
ኢዛካ ኮዪቤቴና።
11 «ኢስራኤሌ ኣሳይ ኤሌ ባሌቲዛኔ
ቆፋይ ባይንዳ
ሃራጴ ካፎ ማላ።
ኢሲቶ ጊብጼ ጼይጌስ፤
ሃራ ዎዴ
ቃሴ ኣሶሬኮ ሲሜስ፤
12 ኢስቲ ፒራꬊሺን ታ ጊቴ
ኢስታ ቦላ ዬጋና፤
ሳሎ ካፎታ ማላ
ዱጌ ጎቻ ዎꬃና፤
ኢስቲ ኦꬂዳ ኢታ ኦሶ ጊሻስ
ታ ኢስታ ዴሬ ሲንꬃን
ቃጻያና።
13 ኢስቲ ታፔ ሃኪ ቢዳ ጊሻስ
ኢስታስ ኣዬ ኣና!
ታ ቦላ ኢስቲ ማካሊዳ ጊሻስ
ኢስታ ቦላ ꬋይሲዛዚ ዮ፤
ታኒ ኢስታ ዎዛና ኮያዲስ፤
ኢስቲ ጊዲኮ ታ ቦላ
ዎርዶ ሃሳዬቴስ።
14 ኢስቲ ባ ሂጻ ቦላ
ኢቺዲ ዬኬቴስ፤
ጊዶ ኣቲን ዎዚናፔ
ታኮ ዎሴቴና፤
ካꬃሲኔ
ኡሻስ ሺቄቴስ፤
ጊዶ ኣቲን ታፔ ሼርኢ ጊዳ።
15 ታኒ ኢስታ ታማርሳዲሲኔ
ኢስታ ሚንꬃዲስ፤
ኢስቲ ጊዲኮ ታ ቦላ ዴንዲዳ።
16 ታፔ ሃኪዲ
ሃዳ ሚሻኮ ሲሚዳ፤
ኢስቲ ጫዳና ጾንጊን
ዎራ ቢዛ ቶራ ማላ።
ኢስታ ካሌꬂዛይቲካ
ባንቲ ሃሳይዛ ኢታ
ቃላ ጋሶን
ማሻን ዉራና፤
ሄሳፌ ዴንዶይሳን ኢስቲ ጊብጼ
ቢታን ቂꬌስ ኣታና።