ጫቆ ቃላ ላሊዴስ፤

ታ ዎጋ ቦላካ ማካሊዴስ።

ሄሳ ጋሶን ሞርኬይ

ኣርጋንꬃ ማላ

ጎዳ ኬꬃ ቦላ

ኣላንꬄስ።

ሄሳ ጊሻስ

ኢስቲ ናጌታና ማላ

ዛዬ ፑና!

ኑ ኔና ኤሮስ› ጊሼ

ታኮ ዋሴቴስ።

ሎኦ ሚሽ ኢጺዳ ጊሻስ

ሞርኬይ ኢስታ ጎዳና።

ካዎታ ካዎꬂዳ፤

ታና ኦይቾንታ ዲሼ

ዳናታ ዶሪዳ፤

ባ ቢራፔኔ ባ ዎርቃፌ

ባና ꬋይሳና ኤቃ ጾሳታ

ባስ ኦꬂዳ።

ማሪ ሚሳቲሲ ኢንቴ ሜꬊዳ

ኤቃ ጾሳቲ ታና ሻቴቴስ።

ታ ሃንቆይ ኢንቴ ቦላ

ታማ ማላ ኤጼስ፤

ኢንቴ ሞሮ ኦሶን

ኣይዴ ጋካናስ ኢንቴ ጋምኣኔ?

ሜꬊዳ ኤቃ ጾሳቲ

ጾስ ጊዳናስ ዳንዳዬቴና።

ሄሳ ጊሻስ

ማር ሚሳቲ ኦሴቲዳ

ሳማሪያ ኤቃ ጾሳቲ

ሜቄሬቲ ዎꬋና።

ቡጻ ቦላ ኣይፌይ ዴና፤

ꬊሌይካ ቤቴና፤

ኣይፊኮካ ኣላጋቲ ማና።

ሃራ ካዎቴꬃታ ጊዶን

ሂራይሶ ሚሻ ማላ ጊዲዳ።

ሃርዲዳ ማላ

ጌዴ ኣሶሬ ዴሬ ቢዳ።

ባና ማዳና ማላ

ካዎታስ ሚሼ ኢሚዲ

ባስ ዳቦ ሻሚዳ።

10 ኢስቲ ባና ካዎታስ

ኣꬂ ባይዚኮካ

ሃኢ ታ ኢስታ ሺሻና፤

ካዎቲኔ ዳናቲ

ኢስታ ቦላ ጋꬂዛ

ሜቶፔ ዴንዲዳይሳን

ኢስቲ ጉጺ ጉጺ ባና።

ዳሮ ያርሾሶሆ ኦꬂዴስ፤

ጊዶ ኣቲን ሄ ያርሾሶሆቲ

ናጋራ ኦꬂዛሶ ጊዲዳ።

ዳሮ ሚሻታ ጻፋዲስ።

ኢስቲ ጊዲኮ

ሃዳ ሚሻ ማላ ቆዲዳ።

ሄ ያርሾ ኣሾዛካ ሜቴስ፤

ጊዶ ኣቲን ጎዳይ

ኢስታን ኡፋዬቲቤና።

ሄሳ ጊሻስ ኢዚ ኢስታ

ኢታቴꬃ ዛሪ ቆፓና፤

ኢስታ ናጋራ ጊሻስ ቃጻያና።

ኢስቲካ ጊብጼ ሲማና።

ባስ ጊታ ካዎቴꬃ

ኬꬃታ ኬጺዴስ፤

ጊዶ ኣቲን ባና ሜꬊዳይሳ ባሊዴስ።

ዩሁዳ ዴሬይካ ዳሮ ሚኖ

ካታማታ ኦꬂዴስ፤

ጊዶ ኣቲን ታኒ ሄ ካታማታ ቦላ

ታማ ዬዳና፤

ኢስታ ሚጻታካ

ታማይ ማና» ጊዴስ።