9
ኢስራኤሌ ቦላ ያና ቂጻቴ
1 ኢስራኤሌ ኣሳዉ! ኡፋዬቶፍቴ!
ሃራ ካዎቴꬃታ ማላ
ኡፋይስ ኖጮጩ ጎፒቴ!
ኣይስ ጊኮ ኢንቴ ኢንቴ ጾሳስ
ኣማኔቲቤኬታ
ካꬃ ባሌ ኡባን
ላይማቴꬃስ
ኢሚዛ ዋጋ ዶሲዴታ።
2 ሄሳ ጊሻስ ሃይሳፌ ጉዬ
ኢንቴ ካꬃ ባሌፔ ካꬅ፥
ዎይኔ ጉምኢዛሶሆፔ
ዎይኔ ኡሹ ዴሜኬታ።
ኦራꬃ ዎይኔ ኡሺካ
ኢንቴስ ፓጫና።
3 ኢስራኤሌ ዴሬይ ጎዳይ
ኢስታስ ኢሚዳ ቢታን ኡቴና።
ኤፍሬሜይ ዱጌ ጊብጼ ሲማና፤
ኣሶሬካ ቢዲ ቱኒዳ ካꬅ ማና።
4 ሄን ጎዳስ ዎይኔ ኡሹ
ያርሻናስ ዳንዳዬቴና፤
ኢስታ ያርሾይካ
ጎዳ ኡፋይሴና።
ሄሳ ጊሻስ ኢስታስ ያርሾዚ
ሾቻ ካꬅ ጊዳና፤
ኢዛ ሚዛ ኡባይ ቱናና።
ሄ ካꬃዚ ጮ ጋፋስ
ሚዛ ካꬅ ጊዳና ኣቲን
ጎዳ ኬꬅ ያርሾስ ሺቄና።
5 ሂስቲን ኢንቴ ዱማ ዱማ
ባኣሌ ጋላሳታኒኔ
ጎዳ ባኣሌ ጋላሳታን
ኣይ ኦꬄቲ?
6 ኢስቲ ባሻፌ ኣታናስ ቤቲኮካ
ጊብጼይ ኢስታ ሺሻና፤
ሜምፒሳ ጌቴቲዛሶን
ኢስታ ሞጋና፤
ኢስቲ ሃሪዳ ቢራይ ዉሪካ
ሻራፋ ማይኢ ኣታና፤
ኢስታ ዱሳሶ
ኡባ ኣጉንꬂ ላታና።
7 ቃጻያና ዎዴይ ጋኪዴስ፤
ፒርዳ ጋላሲካ ጋኪዴስ፤
ሄሳ ኢስራኤሌ ኣሳይ ኤሮ።
ኢንቴ ኦꬂዳ ናጋራይ
ዳሮ ጊዲዳ ጊሻሲኔ
ኢንቴ ሞርኬቴꬂ ጊታ ጊዲዳ
ጊሻስ ናቤይ ኤያ ማላ፥
ጾሳ ኣያናይ ኢዛ ቦላ
ሼምፒዳዴይ
ጎሻ ማላ ቆዴቲዴስ። ሉቃ 21፡22
8 ናቤይ ጾሳራ ጊዲዲ
ኤፍሬሜ ናጊዛዴ፤
ጊዶ ኣቲን ኢዛ ኦጌ
ኡባን ዎጺማዴይ፥
ኢዛ ጾሳ ኬꬃን ኢጾይ
ኢዛ ናጌስ።
9 ኢስራኤሌ ኣሳይ
ካሴ ጊቢኣ ዎዴ ዲዛ
ኣሳ ማላ ኬሂ ቱኒዴስ፤
ጾሲ ኢስታ ቆሆዛ ቆፒዲ
ኢስታ ናጋራ ጊሻስ
ኢስታ ቃጻያና። ዳና 19፡1-30
ናጋራ ጋሶን ኢስራኤሌ ኣሳ ኩንዴꬅ
10 ጎዳይ፥ «ታኒ ኢስራኤሌ ኣሳ
ዴሚዳ ዎዴ ታስ ባዞ ቢታን
ዎይኔ ሚꬃ ኣይፌ
ዴሚዳ ሚሳቲዴስ።
ታኒ ካሴ ኢንቴ ኣዋታ
ቤኢዳ ዎዴ
ታስ ኮይሮ ካጺዳ ባላሴ ሚꬃ
ኣይፌ ቤኢዳ ሚሳቲዴስ።
ኢስቲ ባኣሊ-ፔኦሬ ጋኪዳ ዎዴ
ባንታናቴꬃ ዬላቺዛ
ኤቃ ጾሳስ ዱማሲዳ።
ኢስቲካ ሄ ባ ሲቂዛ
ኤቃ ጾሳ ማላ ቱኒዳ። ታይ 25፡1-5
11 ኤፍሬሜ ቦንቾይ
ካፎይ ፒራꬊዛ ማላ
ፒራꬊ ꬋያና፤
ሃይሳፌ ጉዬ ና ቃንꬃቴꬂ፥
ሻራይኔ ና ዬሎይካ ዴና።
12 ና ዬሊዲ ዲቺኮካ
ኢስቲ ꬎማና ጋካናስ
ታ ኢስታ ዎꬋና።
ታ ኢስታፌ ታ ኣይፌሶ ዛሪዳ ዎዴ
ኢስታስ ኣዬ ኣና!
13 ኤፍሬሜይ ጺሮሴ ማላ
ሎኦ ጋዴን ቶኬቲን ቤኣዲስ፤
ሃኢ ጊዲኮ ኤፍሬሜይ
ባ ናይታ ሼምፖ ዎꬊዛይታስ
ኣꬂ ኢማና።
14 ጎዳዉ! ኔ ሃ ዴራስ
ኣይ ኢማኔ?
ኣዉጫዪዛ ኡሎኔ
ሹላ ꬋንꬅ ኢማ!
ኢስራኤሌ ኣሳ ቦላ ጾሳ ፒርዳ
15 «ኢስቲ ጌልጌላን
ኦꬂዳ ኢታቴꬃ
ጋሶን ታ ኢስታ ኢጻዲስ፤
ኢስቲ ኦꬂዳ ኢታ ኦሶ ጊሻስ
ታ ኬꬃፌ ታ ኢስታ ጎዳና፤
ሃይሳፌ ጉዬካ
ታ ኢስታ ዶሲኬ፤
ኢስታ ካሌꬂዛይቲ
ኡባይ ማካላንቻታ።
16 ኤፍሬሜይ ሾጬቲዴስ፤
ኢስታስ ጻጶይካ ሜሊዴስ፤
ኢስቲ ኢሻሎን ዲቺዳ ናይታ
ታ ዎꬋና» ጌስ።
ሆሴኤይ ኢስራኤሌ ኣሳ ሴሪዴስ
17 ኢስቲ ኣዛዜቶንታ ኢጺዳ ጊሻስ
ታ ጾሲ ኢስታ ዬጊ ኣጋና፤
ኢስቲካ ካዎቴꬃታ ጊዶን
ጮ ቶይላታና።