10
1 ኢስራኤሌ ኣሳይ ዳዪዳ
ዎይኔ ሚꬃ ማላ።
ኢስቲ ዳሮ ኣይፌ ኣይፊዳ፤
ኣይፌዚ ዳሪዳ ኬና
ዳሮ ያርሾሶሆ ሜꬊዳ።
ኢስታ ቢታያ ሎኦ ኣይፌ ኢማዳ
ኢስታ ዱሬሲዳ ማላ
ኢስቲ ጎይኒዛ ቱሳታ ኣሌቄሲዳ።
2 ኢስታ ዎዚናን ጌኔይ ኩሚዴስ፤
ኢስቲ ባ ኦꬂዳ ጌኔዛ
ዋጋ ኤካና።
ጎዳይ ኢስቲ ያርሾ
ያርሺዛሶሆታ
ኡባ ላላና።
ኢስቲ ጎይኒዛ ኤቃ ጾሳ
ቱሳታካ ሾዳና።
3 ኢስቲካ፥ «ኑስ ካዎይ ዴና፤
ኑኒ ጎዳ ቦንቾንታ
ጊሻስ ካዎይ ዲዛኮካ
ኢዚ ኑስ ኣይ ኦꬃኔ?» ጋና።
4 ኢስቲ ዎርዶራ ጫቂዲ
ቃላ ጌሌቴስ፤
ሃዳ ሂዶታ ኦꬄቴስ፤
ሄሳ ጊሻስ ካꬃ ጊዶን
ማርዜራ ዲዛ ሃሩማ ማታይ
ሞኪዛ ማላ
ኢስታ ጊዶን ጌኔ ፒርዳይ ዳራና።
5 ሳማሪያ ካታማን ዲዛ ዴሬይ
ቤቲ-ኣዌኔን ዲዛ
ማራ ሚስሌን ኦሴቲዳ
ኤቃ ጾሳስ ያዬስ።
ኢዛፔ ቦንቾይ ቃሬቲ
ኪቺዳ ጊሻስ
ኣሳይ ዬኬስ።
ሄ ኤቃ ሚስሌዛ ቄሴቲካ
ዋሴቴስ።
6 ሄ ኤቃ ሚስሌዚ ጊታ ጊዲዳ
ኣሶሬ ካዎስ ኪያቴꬅ ኢሜታና።
ኤፍሬሜይ ካዉያና፤
ኢስራኤሌይካ ባንታ ኤቃ
ጾሳ ጊሻስ ዬላታና።
7 ሳማሪያ ካዎይ
ሃꬃ ጎፖንቶ ማላ
ጮ ꬋያና።
8 ኢስራኤሌስ ናጋራ ጊዲዳ
ቤት-ኣዌኔን ጎይኒዛሶሆ
ዙምቡላዚ ꬋያና፤
ኦካይኔ ኦሃይ ሞካና፤
ሄ ዎዴ ዴሬይ ዙማታ፥
«ኑና ቆቲቴ!»
ዙምቡላታካ
«ኑና ካሚቴ!» ጋና። ሉቃ 23፡30፤ ኣጁ 6፡16
ጎዳይ ኢስራኤሌ ኣሳ ቃጻያና
9 ጎዳይ፥ «ኢስራኤሌ ኣሳዉ!
ጊቢኣን ናጋራ ኦꬆሶፔ
ሃች ጋካናስ
ጌባኦኔን ናጋራ ኦꬂዛይታ
ኦላይ ዉርሲቤኔ?ዳና 19፡1-30
10 ታኒ ኮይዛ ዎዴ ኢስታ ቃጻያና፤
ኢስቲ ኦꬂዳ
ዳኮ ናጋራ ጊሻስ
ቂጻቴይ ኢስታ ቦላ ጋካና፤
ካዎቴꬃቲ
ኢስታ ቦላ ዴንዳና።
11 ኢስራኤሌይ ካꬅ ቡካናስ
ዶሲዛ ሜሄ ማላ፤
ጊዶ ኣቲን ሎኢዛ ኢዚ ሞርጌ ቦላ
ቃምባራ ዎꬃና፤
ኤፍሬሜ ዋጻና፤
ዩሁዳይ ጎያና፤
ያቆቤ ናይቲ
ዋጼቲዲ ቢታ ፒጻና።
12 ጎዳይ ዪዲ ጺሎቴꬅ
ኢንቴ ቦላ ኢራ ማላ
ቡኪሳና ጋካናስ
ሃና ኢንቴ ኢዛ ኮይዛ ዎዴ
ጊዲዳ ጊሻስ ኦꬃ ጎዪቴ፤
ኢንቴስ ጺሎቴꬅ ዜሪቴ፤
ሚኖ ሲቆ ኣይፌ ማጺቴ። ኤር 4፡3
13 «ኢንቴ ጊዲኮ ኢንቴ ዎልቃኒኔ
ኢንቴ ኦላ ቃራታ ዳሮቴꬃን
ኣማኔቲዲ ኢታቴꬂ ዜሪዴታ፤
ናጋራ ሺሺዴታ፤
ዎርዶቴꬃ ኣይፌ ሚዴታ።
14 ሺሊማኔይ ቤቲ-ኣርቤሌ
ጌቴቲዛ ካታማ ኦላን ካሴ
ላሊዳይሳꬆኔ
ኣዬታ ናይታራ ጋꬂ
ቢታ ቦላ
ዲንጬሬꬂ ዉርሲዳ ማላ
ሺሮይ ዴራ ቦላ ያና።
ኢንቴ ዴሬ ኣሳ ቦላ ዎልቃማ
ኦላይ ያና፤
ኢንቴ ሚጻይ ላሌታና።
15 ቤቴሌ! ኔ ኢታቴꬂ
ጊታ ጊዲዳ ጊሻስ
ኔ ቦላካ ሄሳꬆ ሃናና፤
ሄ ጋላሳያ ጋኪዛ ዎዴ
ኢስራኤሌ ካዎይ
ሙሌራ ꬋያና» ጌስ።