11
ኢስራኤሌስ ጎዳ ሲቆ
1 ጎዳይ፥ «ኢስራኤሌይ ቡሮ
ዪꬋን ዲሺን ዶሳዲስ።
ሂስታዳ ታ ናዛ
ታ ጊብጼ ቢታፌ ጼይጋዲስ። ኬሳ 4፡22፤ ማቶ 2፡15
2 ጊዶ ኣቲን ታ ኢስታ ጼይጊዳ ኬና
ኢስቲ ታፔ ጌዴ
ሃኪ ሃኪ ቢዳ።
ባኣሌስ ያርሾ ሺሺዳ፤
ኢዛ ሚስሌታሲካ
ኤጻኔ ጩዋሲዳ።
3 ኤፍሬሜስ ኩሼዛ ኦይካዳ
ሄሜꬅ ታማርሲዳይ ታና፤
ጊዶ ኣቲን ኢስታ ፓꬂዳይ
ታና ጊዲዳይሳ
ኢስቲ ኤሪቤቴና።
4 ታ ኢስታ ቃꬌታ ዎዶሮኒኔ
ሲቆ ሳንሳላታን
ታኮ ሺሻዲስ፤
ኢስታ ሞርጌፌ
ቃምባራ ዴንꬃዲስ፤
ዚቂ ጋ ሆካዳ ኢስታ ሚዛዲስ።
5 «ሂስቲን ኢስቲ
ማሮቴꬃን ጌሎንታ ጊሻስ
ዱጌ ጊብጼ ሲሜቴኔ?
ኣሶሬይ ኢስታ ሃሬኔ?
6 ኢስታ ኢታ ሃልቾ ጊሻስ
ሞርኬ ቶራይ ኢስታ
ካታማታ ኦላና፤
ኢስታ ካታማታ ፔንጌታካ
ሜንꬄሬꬂ ዬጋና።
ኢስቲካ ሙሌራ ꬋያና።
7 ታ ዴሬይ
ታፔ ሃካናስ ኮዪዴስ፤
ጊዲኮካ ኢስቲ ታኮ ኡባፌ
ዎልቃማ ጾሳኮ ዋሲኮ
ታ ኢስታ ኣሺኬ።
8 «ኤፍሬሜ! ታ ኔና
ዎስታ ኣጋጋኔ?
ኢስራኤሌ ታ ኔና
ዎስታ ኣꬃ ኢማኔ?
ታ ካሴ ኣዳማኒኔ
ጻቦይሜን ኦꬂዳይሳꬆ
ዎስታ ኔ ቦላ ኦꬆ?
ታ ዎዚናይ ጊዶን ቃጺዴስ፤
ታ ማሮቴꬃይ
ኔና ኣሻና ዴንዲዴስ። ዛሬ 29፡23
9 ታኒ ኢንቴ ጊዶን ዲዛ ጌሻ
ጾሳ ኣቲን ኣስ ጊዲኬ።
ታ ሃንቆራ ኢንቴኮ ዪኬ፤
ታ ቦሻ ሃንቆ
ኢንቴ ቦላ ዬዲኬ፤
ኤፍሬሜ ዛራዳ ꬋይሲኬ።
10 «ታኒ ጎዳይ ኢስታ ኣሻናስ
ጻጊዛ ጋሞ ማላ
ታኒ ታ ቃላ ሲሲሺን
ኢስቲ ታና ካላና፤
ታ ናይቲ ኮኮሪሼ
ኣርሼይ ሞኪዛ ባጋፌ ያና።
11 ጊብጼፔ ካፎ ማላ
ኣሶሬፔ ሃራጴ ማላ
ፒራꬊ ያና።
ታኒ ኢስታ ኢስታሶሆን
ዎꬃና» ጌስ።
ኢስራኤሌ ናጋራኔ ዩሁዳ ናጋራ
12 ጎዳይ፥ «ኤፍሬሜ ዎርዶን
ኢስራኤሌይካ ጌኔን
ታና ጊዶꬂዴስ፤
ዩሁዳይ ጾሳስ
ሃሬቶንታዴ፤
ኣማኔቲዳ ጌሻዛራ
ኤቄቲዛዴ» ጌስ።