12
1 ኤፍሬሜይ ጫርኮ ሄንꬃንቻ፤
ጋላስ ኩሜꬅ ኣርሼይ ሞኪዛ
ባጋ ጫርኮ ካሌስ፤
ዎርዶኔ ማካላ ዳሪሴስ።
ኣሶሬ ዴራራ
ጫቆ ቃላ ጌሌስ፤
ዎጋራ ዛይቴ ጊብጼ ቢታ ዬዴስ።
2 ጎዳይ ዩሁዳ ዴራ ቦላ
ሺሺዛ ሞቶይ ዴስ፤
ኢዚ ያቆቤ ኢዛ
ሃኖታ ማላ ቃጻያና።
ኢዛ ኦሶ ማላ ኢዛስ ኢማና።
3 ያቆቤይ ቡሮ
ባ ኣዬይ ኡሎን ዲሼ
ባ ኢሻ ቶሆ ቂርጴ ኦይኪዴስ፤
ኣሳ ዛዋ ጋኪዳፔ ጉዬ
ጾሳራ ባጼቲዴስ። ሜꬌ 25፡26ሜꬌ 32፡24-26
4 ኪታንቻራ ባጼቲዲ
ኢዛ ጾኒዴስ፤
ኢዛ ሲንꬃን ቴማ ዴማናስ
ዬኪ ዎሲዴስ፤
ኢዛካ ቤቴሌን ዴሚዴስ፤
ሄን ኢዛራ ሃሳዬቲዴስ። ሜꬌ 28፡10-22
5 ጎዳይ ኡባፌ ዎልቃማ ጾሳይ
ኢዛስ ኤሬቲዳ ሱንꬃይ ጎዳ።
6 ሄሳ ጊሻስ ኔ ጾሳኮ ሲማ፤
ሲቆኔ ቱሙ ፒርዳ
ሎኤꬃ ኦይካ፤
ኡባ ዎዴ
ኔ ጾሳን ኣማኔታ።
7 «ዛልኣንቻቲ
ዎርዶ ጌዳራን ባይዜቴስ፤
ሾጬቾካ ዶሴቴስ።
8 ኤፍሬሜይ፥ ‹ታኒ ዱሬ፤
ታ ዱሬታዲስ፤
ታስ ሃይሲ ኡባይ ዲሺን
ኣይ ቆሆይካ
ዎይኮ ናጋራይ
ታ ቦላ ጋኬና›
ጊ ጬቄቴስ።
9 «ኢንቴና ጊብጼ ቢታፌ ኬሲዳ
ጎዳ ኢንቴ ጾሳይ ታና፤
ላይꬃ ባኣሌ ጋላስ
ካሴ ኢንቴ ኦꬂዛ ማላ
ኢንቴ ኢንቴ ዱንካኔን ዳና ማላ
ታ ኦꬃና።ሌዌ 23፡42-43
10 «ታኒ ካሴታዳ ናቤታስ ዮታዲስ፤
ዳሮ ኣጁታ ታ ኢስታ ቤሳዲስ፤
ኢስታ ባጋራ ሌሚሶን ዮታዲስ።
11 ጋላኣዴን ኢታቴꬂ ኩሚዴስ፤
ኣሳይካ ሹፉሮ ጻላ።
ጌልጌላን ሚርጎታ ያርሾስ
ሺሺዞ?
ኢስታ ያርሺዛሶይ ሜቄሬቲዲ
ጎሻ ጊዶን ኮሬቲዳ
ሹቻ ማላ ጊዳና» ጌስ።
12 ያቆቤይ ሜስጴጾሚያ
ባቃቲዴስ፤
ኢስራኤሌይ ማቾ ኤካናስ
ሄን ሃጋዚዴስ፤
ኢዚስ ኢማና ጪሎሻ ጊሻስ
ዶርስ ሄሚዴስ። ሜꬌ 29፡1-20
13 ጎዳይ ናቤ ባጋራ ኢስራኤሌ
ጊብጼፔ ኬሲዴስ፥
ናቤዛ ባጋራ ኢስታ
ኢሻልሲ ኦይኪዴስ። ኬሳ 12፡50-51
14 ጊዶ ኣቲን ኤፍሬሜይ
ኢዛ ኬሂ ሃንቄꬂዴስ፤
ኢዛ ጎዳይ ኢዚ ሱꬅ ጉሲዳ ማላ
ቆሆዛ ኢዛ ቦላ ጋꬃና፤
ኢዚ ሌቂዛ ሌቆዛ ጊሻስ
ኢዛስ ቤሲዛዝ ቃንጻና።