13
ኢስራኤሌ ቦላ ያና ዉርሴꬃ ፒርዳ።
1 ኤፍሬሜይ ኢስራኤሌ ዴሬዛ ጊዶን
ቦንቼቲ ዲዛ ጊሻስ
ኢዚ ሃሳይሺን ኣሳይ
ኡባይ ኮኮሬስ።
ጊዶ ኣቲን ባኣሌስ
ጎይኒዳ ጊሻስ
ቆሂዴስ፤ ሃይቂዴስ።
2 ሃኢካ ናጋራ ቦላ
ናጋራ ጉጂዳ፤
ባንታ ጪንጫቴꬃን ሚስሌታ
ባስ ጊግሲዳ፤
ቢራፔ ኤቃ ጾሳታ
ባንታስ ሜꬊዳ፤
ሄይቲ ዉሪካ
ኣሳ ኩሼን ኦሴቲዳይታ፤
ሃይታ ሃ ኣሳታ ጊሻስ፥
«ኣስ ያርሾ ሂስቲ ሺሼቴስ፤
ማራ ሚስሌን ኦሴቲዳ ኤቃ
ጾሳታ ዬሬቴስ» ጌቴቲዴስ።
3 ሄሳ ጋሶን ኢስቲ ዎንታ
ማላዶ ሻራ ማላ
ጮ ቲምኢ ጋና፤
ማላዶ ጻዛ ማላካ ጮ
ዎꬊ ꬋያና፤
ዎይኮ ባንጋ ቡኪዛ ባሌፔ
ጎቴ ጫርኮይ ኤፊዛ
ሱላ ማላ ጊዳና፤
ዎይኮ ኬꬃፌ
ኬዚዲ ቤቲሼ
ጮ ꬋይዛ ጩዋ ማላ ጊዳና።
4 ጎዳይ፥ «ኔና ጊብጼፔ ኬሲዳይ
ታና ጎዳ ኔ ጾሳ፤
ኔስ ታፔ ኣቲን
ሃራ ጾሲ ዴና፤
ኔና ኣሺዳይ ታፔ ኣቲን
ሃራ ጾስ ጊዴና።
5 ባዞ ቢታን ካꬂኔ ሃꬂ ባይንዳሶን
ኔና ኢሻልሳ ዎꬃዲስ።
6 ጊዶ ኣቲን ታ ሚዚን
ኢስቲ ካሊዳ፤
ካሊዲ ኦቶሬቲዳ፤
ሄሳፌ ጉዬ ታና ባሊዳ። ዛሬ 8፡11-17
7 ሄሳ ጊሻስ ታኒ ኢስታ ቦላ
ጋሞ ማላ ያና፤
ማሄ ማላ ኦጌ ቦላ
ዛማዳ ኡታና።
8 ኢዚ ማራቲ ቦንቄቲዳ ዛርዶ ማላ
ታ ኢስታ ሾጫናኔ
ፑዜሬꬃና፤
ታ ኢስታ ጋሞ ማላ
ፑዜሬꬃ ሚታና፤
ዎራ ዶኣ ማላ ዱሴሬꬃና።
9 «ኢስራኤሌ ዴሬዞ!
ኔ ታ ቦላ ዴንዲዳ ጊሻሲኔ
ኔና ማዲዛ ታናራ
ኔ ኤቄቲዳ ጊሻስ
ኔ ꬋያና፤
10 ኔ ታና፥ ‹ታስ ካዎኔ
ሃላቃታ ኢማ› ጋዳሳ፤
ሂስቲን ሃኢ ኔና ኣሻና
ካዎይ ኣዋን ዲዜ?
ኔ ካታማታን ዲዛ
ሃላቃቲ ኡባይ
ሃኢ ኣዋን ዲዞ?1ሳሜ 8፡5-6
11 ታ ሃንቄታሼ
ኢንቴስ ካዎ ኢማዲስ፤
ጊዶ ኣቲን ታኒ ቦሻንካ
ኢዛ ሻራዲስ። 1ሳሜ 10፡17-24፤ 15፡26
12 «ኤፍሬሜ ቆሆይ ዶሬቲዴስ፤
ኢዛ ናጋራይካ
ማዝጋቤን ጻፌቲዴስ።
13 ሚጻይ ኦይኪዳ ማጫሳ ማላ
ኢዛ ቦላ ሜቶይ ያና፤
ኢዚ ጊዲኮ
ኣꬎ ኤራቴꬂ ባይንዳ
ኤያ ና፤
ዬሌቲዛ ዎዴይ ጋኪን
ባ ኣዬይ ኡሎፔ ዬሌታናስ
ኮዮንታ ና ማላ።
14 ታኒ ኔና
ዱፎ ዎልቃፌ ኣሻና፤
ሃይቆፔካ ዎዛና።
ሃይቆ! ኔ ዎꬊዛ
ዎልቃይ ኣዋን ዲዜ?
ዱፎዞ! ኔኒ ኣስ ꬋይሲዛ ዎልቃይ
ኣዋን ዲዜ?
ታኒ ኢዛስ ቃꬌቲኬ።1ቆሮ 15፡55
15 ኢዚ ባ ኢሻታ ጊዶን
ዱሬ ጊዲኮካ
ጎዳፔ ኪቴቲዳ ጫርኮይ
ኣርሼይ ሞኪዛ ባጋራ
ባዞ ቢታፌ ዴንዲዲ ያና።
ፑልቶይ ቶኣና፤
ሃꬃ ኦላይካ ሜላና፤
ኢዛስ ዲዛ ኣልኦ ኣቆታይ
ሚንጃ ኬꬃፌ ቦንቄታና።
16 ሳማሪያ ኣሳይ
ባንታ ጾሳ ቦላ
ማካሊዳ ጊሻስ
ባንታ ቆሆ ቶካና፤
ማሻንካ ሲፌታና፤
ቄሪ ናይቲ ቢታ ቦላ
ዲንጬታና፤
ቃንꬃራ ዲዛ ማጫሳታ
ኡሎይ ዳኬታና» ጌስ።