14
ኣሳይ ማሬታና ማላ ኣዋጄቲዳ ኣዋጃ
1 ኢስራኤሌ ዴሬዞ!
ኢንቴ ኢንቴ ናጋራ ጋሶን
ኩንዲዳ ጊሻስ
ጎዳ ኢንቴ ጾሳኮ ሲሚቴ።
2 ፓጼꬃ ቃላ ኤኪ
ጎዳኮ ሲሚዲ፥
«ኑ ናጋራ ኡባ ኣቶ ጋ፤
ኑኒ ኑ ዶናፔ ጋላታ
ሺሻና ማላ
ኔ ማሮቴꬃን ኑና ኤካ።
3 ኣሶሬይ ኑና ኣሼና፤
ኑኒ ኦላ ፓራታንካ
ኣማኔቶኮ፤
ሃይሳፌ ጉዬ ኑኒ
ኑ ኩሼን ሜꬊዳ
ኤቃ ጾሳታ፥
‹ሃይቲ ኑ ጾሳታ› ጎኮ።
ማንቆቲ ኔፔ ቃꬌቴꬅ
ዴሜቴስ» ጊቴ።
ኦራꬃ ዴኦስ ሂዶታይ ኢሜቲዴስ
4 ጎዳይ፥ «ታ ሃንቆይ
ኢስታ ቦላፌ ሲሚዳ ጊሻስ
ታስ ኣማኔቶንታ ኢጺዳ
ታ ዴራ
ታ ፓꬃና፤
ታ ኢስታ ጮ ሜላ ሲቃና።
5 ታኒ ኢስራኤሌ ኣሳስ
ፑሴ ኢራ ማላ ጊዳና፤
ኢስቲካ ሎኦ ጪሻ ማላ ጪያና፤
ሊባኖሴ ዚጋ ማላ
ጻጶ ዬዳና።
6 ኢስታ ሃጋይ ዲጫና፤
ዎጋራ ሚꬃ ማላ
ኢስቲ ሎኣና፤ ሊባኖሴ ዚጋ ማላ
ሎኦ ሳዎ ሳዋና።
7 ኢስቲ ሲሚዲ
ታ ኩዋ ጋርሳን ኡታና፤
ጫሬቻ ካꬃ ማላ
ኢስቲ ጪሊላና፤
ዎይኔ ሚꬃ ማላ ኢስቲ ጪያና።
ኢስታ ሱንꬂ ሊባኖሴ
ዴሬ ዎይኔ
ኡሻ ማላ ኡባሶን ኤሬታና።
8 ኤፍሬሜ! ታሲኔ ኤቃ ጾሳታስ
ኣይ ጋይቶቴꬂ ዲዜ?
ኔ ዎሳ ሲዪዛይኔ
ኔና ናጊዛይ ታና፤
ታኒ ኡባ ዎዴ ጪሊሊ ኡቲዳ
ሚꬃ ማላ፤
ኔ ኣይፊዛይ
ታፔ ዴንዲዳይሳና» ጌስ።
ኩሻ ቃላ
9 ኣꬎ ኤራንቻይ
ሃ ዮኦታ ኣኬካና።
ኣኬኪዛዴይ ሃ ዮኦታ ኤራና፤
ጎዳ ኦጌይ ሱሬ፤
ጺሎቲ ኢዛን ሄሜቴቴስ።
ናጋራንቻቲ ጊዲኮ
ኢዛን ꬉጴቴቴስ።