3
ዬሩሳላሜ ቦላኔ ዩሁዳ ቦላ ያና ፒርዳ
1 ቤኢቴ፥ ጎዳይ ኡባፌ ዎልቃማ ጎዳይ
ኣሳስ ኮሺዛ ካꬅ፥
ሃꬂኔ ማዶ ኡባ
ዬሩሳላሜፔኔ
ዩሁዳፔ ዲጋና።
2 ቃራታኔ ኦላንቻታ፥
ፒርዲዛይታኔ ናቤታ፥
ሙሬኒዛይታኔ ጪማታ፥
3 ሃምሳ ሃላቃታኔ ኦላ ጋዳዋታ፥
ዞራንቻታኔ ሂላንቻታ፥
ጪንጫቴꬃን ቢቲዛይታ
ኡባ ꬋይሳና።
4 ታኒ ዬላጋ ናይታ
ኢስታ ቦላ ሹማና፤
ቄሪ ናይቲ ኢስታ ሃራና።
5 ዴሬይ ዴሬ ቦላ፥
ኣሲ ኢሶይ ኢሳ ቦላ፥
ሾሮይ ሾሮ ቦላ፥
ዬላጋ ናይቲ ጪማታ ቦላ፥
ሹፉሮይ ቦንቼቲዳይታ ቦላ
ዴንዳና።
6 ኣሲ ባ ኣዋ ኬꬃን
ባ ኢሻንታፌ ኦይኪዲ፥
«ኔስ ማይኦይ ዲዛ ጊሻስ
ኑና ካሌꬂዛይሳ ጊዳ፤
ሃ ላሌቲዳ ሶሆዛ ኣዋቴꬅ
ኔ ኤካ» ጋና።
7 ሂስቲን ኢዚ ሄ ዎዴ
ባ ቃላ ꬎቁ ሂስቲዲ፥
«ታኒ ኣይኮካ ማዲኬ፤
ታሶን ማይኦይኔ ሚዛ ካꬂ
ባይንዳ ጊሻስ ታና
ዴሬ ካሌꬂዛዴ
ሂስቶፍቴ» ጋና።
8 ዬሩሳላሜይ ጋንዲጋራዉስ፤
ዩሁዳይካ ኩንዳና ማታዱስ፤
ጋሶይካ ኢስቲ
ባንታ ሃሳያኒኔ
ኦሶን ጎዳራ ኤቄቲሼ
ኢዛ ቦንቾዛ ቶቼቴስ።
9 ኢስታ ኣይፌሶይ
ኢስታ ቦላ ማርካቴስ፤
ኢስቲ ሶዶሜ ኣሳ ማላ
ባንታ ናጋራ ቆቶንታ
ቆንጬን ሃሳዬቴስ፤
ኢስቲ ባንታ ቦላ ኢታ ሚሽ
ኤሂዛ ጊሻስ
ኢስታስ ኣዬ ኣና!
10 ጺሎታስ፥ «ጺሎቲ ባ ሎኦ ኦሶ
ኣይፌ ማና፤
ሄሳ ጊሻስ
ኢስታስ ሎኦ ጊዳና» ጋ ዮታ።
11 ኢታታስ ኣዬ ኣና!
ኢስታ ቦላ ኢታ ሚሺ ያና፤
ኣይስ ጊኮ ኢስቲ
ባንታ ኦሶ ማላ ኤካና።
12 ዬላጋቲ ታ ዴራ ኡንኤꬄቴስ፤
ማጫሳቲካ ኢስታ ሃሬቴስ፤
ታ ዴሬዞ! ኢንቴና ካሌꬂዛይቲ
ኢንቴና ባሌꬂዳ፤
ኢንቴ ቢዛ ኦጌፔካ
ኢንቴና ካሬ ኬሲዳ።
ጎዳይ ባ ኣሳ ቦላ ፒርዳና ፒርዳ
13 ጎዳይ ፒርዳናስ ሺሎታን ኡቲዴስ፤
ዴራ ቦላ ፒርዳናስ ዴንዲዴስ።
14 ጎዳይ ዴሬ ጪማታኔ
ካሌꬂዛይታ ፒርዳናስ
ኢሲ ቦላ ሺሺዲ፥
«ታኒ ዎይኔ ቶኪዛሶሆዛ
ኢሲዴታ፤
ማንቆታፔ ኢንቴ ቦንቂዳይሲ
ኢንቴ ቆልኣን ዴስ።
15 ታ ዴራ ኣይስ ሜቶን ሊቂሲዴቲ?
ማንቆታ ኣይስ ዬሴቲ?
ሃይሳ ዮቲዳይ ታና ጎዳ፥
ኡባፌ ዎልቃማ
ጎዳ ጾሳ» ጌስ።
ጺዮኔ ማጫሳታስ ኢሜቲዳ ሴራ
16 ጎዳይ፥ «ጺዮኔ ማጫሳቲ
ኦቶሬቲዳ፤
ባንታ ቆꬌ ዋርጺ ሂስቲሼ፥
ባንታ ኣይፌን ሶምኢ ቤሲሼ፥
ባንታ ዱጫ ቃꬂሼ፥
ባንታ ቶሆን ዲዛ ሳጋዮ
ጊሪሲሼ ሄሜቴቴስ።
17 ሄሳ ጊሻስ ታኒ ጎዳይ
ጺዮኔ ማጫሳታ ሁኤ
ጪቶን ጎኢሳና፤
ታኒ ጎዳይ ኢስታ ሁኤ
ቦኣሳና» ጌስ።
18 ሄ ጋላስ ጎዳይ ጺዮኔ ማጫሳታ ኣሌቆ ሚሻታ፥ ሄይቲካ ቶሆ ሳጋዮታ፥ ሁኤ ኣሌቆታ፥ ቆꬌ ጎዝዳታ፥ 19 ሃይꬃ ጉቲቻታ፥ ኩሼ ሳጋዮታ፥ ኣይፌሶ ካሚዛ ቁራጬታ፥ 20 ሁኤ ጎሴታ፥ ሳጋዮታ፥ ሁኤ ኣሌቆታ፥ ጼሳን ዳንጪዛ ዳንጮታ፥ ሺቶ ቢልቃጼታ፥ ኣሼንኪታቤታ፥ 21 ሲꬌ ሚዲጋታ፥ ቢራꬌ ሚዲጋታ፥ 22 ሴሎ ማይኦታ፥ ጋርሳራ ማይኢዛ ማይኦታ፥ ካባታ፥ ኩሼ ካራጺቴታ፥ 23 ሄሬጋታ፥ ላይኖታ፥ ጊዶራ ማይኢዛ ማይኦታ፥ ቢናና ቃቺዛ ኣሌቆታኔ ኣይፌሶ ካሚዛ ቆሌታ ኡባ ዳፊ ኤካና።
24 ሺቶ ጺንቆን፥ ዳንጮ ዎዶሮን፥
ጎፋሬ ቦኣን፥
ሴሎ ማይኦ ማቃን፥
ፑላቴꬅ ፒጌን ላማና።
25 ኢንቴስ ኣቱማ ኣሳቲ ጊꬃ ማሻን፥
ኦላንቻቲ ኦላን ሃይቃና።
26 ጺዮኔ ፔንጌቲ
ካሎ ጋዴን ዎꬋ ኡታዳ
ዬኪዛ ማጫሳ ማላ
ዬካናኔ ዚላላና።