2
ሜርና ሳሮ
(ሚኪ 4፡1-3)
1 ኣሞጼ ና ኢሳያሲ ዩሁዳ ዴሬ ጊሻሲኔ ዬሩሳላሜ ካታማ ጊሻስ ቤኢዳ ኣጁታይ ሃይሳ።
2 ዎዴ ዉርሴꬃን ጾሳ ኬꬂ
ኢዛ ቦላ ኬጼቲዳ ዙማይ
ሃራ ዙማ ኡባፌ
ꬎቂ ቤታና።
ዙምቡላታ ኡባፌ ꬎቁ
ꬎቁ ጋና፤
ኡባ ካዎቴꬃቲ
ሄ ጎቻና።
3 ዳሮ ኣሳይ ዪዲ፥
«ዎጋይ ጺዮኔፔ፥
ጎዳ ቃላይ ዬሩሳላሜፔ
ኬዚዛ ጊሻስ ሃ ዪቴ!
ጎዳ ዙማ፥
ያቆቤ ጾሳ ኬꬅ
ኣኔ ፑዴ ኬዞስ።
ኢዚ ኮይዛይሳꬆ
ኑኒ ባና ማላ
ኢዚ ኑና ባ ኦጌ ታማርሳና» ጋና።
4 ኢዚ ካዎቴꬃታ ጊዶን ፒርዳና፤
ዳሮ ኣሳታ ጋርሳን ዲዛ ፓላማ
ኢዚ ዲጋና።
ኢስቲ ባንታ ጊꬃ
ማሻ ማራሻ፥
ባንታ ቶራካ
ባጫ ቆጺ ኬሳና።
ዴሬይ ዴሬ ቦላ
ማሻ ዴንꬄና፤
ሄሳፌ ጉዬ
ኢስቲ ኦላ ታማሬቴና። ኢዩ 3፡10
5 ኢንቴኖ ያቆቤ ዛሬቶ!
ሃ ዪቴ!
ኣኔ ጎዳ ፖኦን ሲሜሬቶስ።
ጎዳ ጋላስ
6 ጎዳዉ! ኔኒ ኔ ኣሳ
ያቆቤ ዛሬታ ኣጋዳሳ።
ኢስቲ ኣርሼይ ሞኪዛ ባጋራ ዲዛ
ኣሳታ ማላ ቢታን ኩሚዳ፤
ፊሊስጼሜ ኣሳ ማላ
ሙሬኔቴስ።
ኢስቲ ኣላጋራ ኢሲፌ ዙፔቴቴስ።
7 ኢስታ ቢታን ቢራይኔ
ዎርቃይ ኩሚዴስ፤
ኢስታ ዱሬቴꬃስ ዛዋይ ባዋ፤
ኢስታ ቢታን ፓራይ ኩሚዴስ፤
ኢስታ ፓራ-ጋሬታስ
ዛዋይ ዴና።
8 ኢስታ ቢታን ኤቃ ጾሳቲ ኩሚዳ፤
ባንታ ኩሼን ኦꬂ ኬሲዳ
ሚሻስ ጎይኔቴስ።
9 ሄሳ ጊሻስ ኣሲ ኡባይ
ዚቂ ጋናኔ ካዉያና።
ኢስታ ቆሆ ኣቶ ጎፓ።
10 ያሺሲዛ ጎዳ ሃንቆፌኔ
ኢዛ ቴማፔ ኣታናስ
ዛላታኮ ቢዲ
ቢታ ጊዶን ቆቴቲቴ!ኣጁ 3፡10ኣጁ 6፡15፤ 2ታሶ 1፡9
11 ኦቶራንቻ ኣይፌይ ጉካና፤
ሞꬌቲዛይቲ ካዉያና፤
ሄ ዎዴ ጎዳይ ጻላ
ꬎቁ ꬎቁ ጋና።
12 ኡባፌ ዎልቃማ ጎዳይ
ኦቶራንቻታ፥
ሞꬌቲዛይታኔ
ጬቄቲዛይታ ካዉሻናስ
ጋላስ ባሪ ዎꬂዴስ።
13 ኣዱሲኔ ꬎቃ ጊዲዳ
ሊባኖሴ ዚጋታኔ
ባሳኔ ዎላታ ኡባ፥
14 ጊታ ዙማታኔ
ꬎቃ ዙምቡላታ ኡባ፥
15 ካታማ ናጊዛ
ኣዱሳ ሚጻታኔ
ካታማ ዩሾን ዲዛ
ሚኖ ጊምቤታ ኡባ፥
16 ታርሴሴ ማርካቤታኔ
ቦንቾ ዎጎሎታ ኡባ
ኢዚ ካዉሻና ዎዴይ ዴስ።
17 ሞꬌቲዛዴይ ካዉያና፤
ኦቶራንቻይ ኩንዳና፤
ሄ ጋላስ ጎዳይ ጻላ
ꬎቁ ꬎቁ ጋና፤
18 ኤቃ ጾሳቲ ኡባይ
ሙሌራ ꬋያና።
19 ጎዳይ ሃይሳ ቢታ
ቃꬃናስ ዴንዲዛ ዎዴ
ያሺሲዛ ጎዳ ሃንቆፌኔ
ኢዛ ቴማፔ ኣታናስ
ኣሳይ ቆቴታናስ
ሹቻ ጋርሲኔ
ኦላይ ዲዛሶ ባቃታና።
20 ሄ ጋላስ ኣሳይ ጎይናናስ
ሜꬊዳ ባንታ ቢራ፥
ዎርቃ ሚስሌታ
ጊሮሲኔ ካፎታስ ኦላና።
21 ጎዳይ ሃ ቢታ ቃꬃናስ
ዴንዲዛ ዎዴ
ኢዛ ያሺሴꬃፌኔ
ኢዛ ቴማፔ ዴንዲዳይሳን
ሹቻ ጎንጎሎይኔ
ዛላ ዛኣይ ዲዛሶ ባቃታና።
22 ሼምፖይ ሲꬌራ ኬዚን
ኣሃ ጊዲዛ ኣሳን ኣማኔቶፍቴ፤
ኣሲ ኣይ ማዳኔ?