1. ሼም 1-39 ጋካናስ ዲዛ ኪፊሌዚ ዱጌሃ ባጋ ካዎቴꬅ ዩሁዳ ዴሬ ቦላ ኣሶሬ ጌቴቲዛ ዎልቃማ ካዎይ ጋꬂዳ ቆሆ ጊሻስ ዮቴስ፤ ዩሁዳ ዴሬ ሜቶን ዬጊዳይ ኣሶሬ ዎልቃ ጊዶንታ ዴሬዛ ናጋራኔ ኣሳይ ጾሳስ ኣዛዜቶንታ ኢጾ፤ ሄሳꬆካ ኣሳይ ጾሳን ኣማኔቶንታ ኣጊዳይሳ ቤዪዴስ። ናቤዚ ዴሬዚኔ ዴራ ካሌꬂዛይቲ ጺሎቴꬃኮኔ ቱማቴꬂ ዲዛሶ ሲማና ማላ ዮቲዴስ፤ ቃሴካ ጾሳስ ኣዛዜቶንታ ኢጾይ ፓጬኔ ꬋይስ ኤሃናይሳ ኢስታስ ቆንጪሲዴስ፤ ሄሳꬆካ ቡሮፔ ያና ላይꬃታን ኣላሜ ዩሾን ሳሮቴꬂ ኩማናይሳኔ ኩሜꬃ ሎኤቴꬃን ኣይሳናስ ዳዊቴ ዜሬꬃፌ ካዎታናዴይ ያናይሳ ናቤ ኢሳያሲ ካሴቲ ዮቲዴስ።

2. ሼም 40-55 ጋካናስ ዲዛ ኪፊሌዛፔ ዳሪዛ ባጋይ ዩሁዳ ኣሳይ ዲኤቲ ባቢሎኔ ቢን ሄን ኢስታ ቦላ ካዉሻቴꬂ ጋካናይሳኔ ሂዶታይ ኢስታስ ꬋያናይሳ ዮቴስ። ናቤዚ ጾሲ ባ ዴሬዛ ዎዚን ኣሳይ ሎኦ ኦራꬃ ዱስ ዳናስ ኢስታ ኢዚ ዬሩሳላሜ ዛራናስ ዎዴይ ማቲዳይሳ ዮቲዴስ። ሃይታ ሼምፖታ ጋርሳን ኬሂ ቆንጪ ቤቲዛ ኣይፌ ዮኦይ ጾሲ ሃኖ ኡባስ ኣዋ ጊዲዳይሳኔ ባ ዴራስ ኢዚ ሃልቺዳ ሃልቾይ፥ ጾሳ ኪታይ ኢስራኤሌ ኣሳ ባጋራ ዴሬ ኡባስ ጋካናይሳ ዮቴስ። «ጾሳ ኦሳንቻ ጊሻስ» ዮቲዛ ካሴ ጋልኣ ጫቆን ዲዛ ኤሬቲዳ ኪታታራ ኢሲፌ ቆዴቴቴስ።

3. ሼም 56-66 ጋካናስ ዲዛ ኪፊሌዛፔ ዳሪዛ ባጋይ ዮቲዛይ ጉዬ ባ ዴሬ ዬሩሳላሜ ሲሚ ቢዳይታ ጊሻሲኔ ጾሲ ኢስራኤሌ ኣሳስ ኢሚዳ ሂዶታ ቃላ ኡባ ፖላናኮ ጊዲ ናጌ ቦላ ዲዛ ኣሳስ ማርካ ጊዳና ማላሳ፤ ቲሺ ሂስቲ ጼላናስ ቤሲዛይቲ ጺሎቴꬂኔ ቱማ ፒርዳ፥ ሳምባታ ቦንቾኔ ያርሾ ሺሾ፥ ቃሴካ ሚኒ ዎሶ። ሃይሳ ሃ ኪፊሌዛን ኤሬቲዳ ሼምፖይ 61፡1-2 ጊዲሺን ዬሱሲ ኮይሮ ኦሶ ኦይኪሼ ባ ጼይጌቴꬃስ ማርካ ሺሺዳ ቃላቲ ዴቴስ።