8
1 ኔ ታ ኣዬይ ꬋንꬅ ꬋሚ ዲጪዳ
ታ ኢሻ ማላ ጊዲዳኮ
ታ ኔና ኦጌን
ዴማዳ ዬራ ኤኪዳኮ
ታና ኦኒካ ካꬌናኮሺን!
2 ታና ታማርሲዳ ታ ኣዬይሶ
ታ ኔ ኩሼ
ኦይካዳ ኤፋናኮሺን፤
ኔ ኡያናስ
ኦሮማኔፔኔ ዎይኔፔ
ጉምኤቲዳ ሎኦ ኡሹ
ታ ኔስ ኢማናኮሺን።
3 ባ ሃዲርሳ ኩሼ ቦላ
ታና ቦርኮቲሴስ፤
ኡሻቻ ኩሼንካ
ታና ቆሜስ።
4 ኢንቴኖ ዬሩሳላሜ ጌላኦቶ!
ሲቆዚ ባስ ዶሲዲ
ዴንዳና ጋካናስ
ኢዛ ኢንቴ ቤጎꬆንታ ማላ
ታኒ ኢንቴና
ሃዳራ ጋይስ» ጋዱስ።
ላጌቲ
5 «ባ ሲቆ ላጌዛ ቦላ ዜምፓዳ፥
ባዞፌ ዪዛራ
ሃና ኦኔ?» ጊዳ።
ጌላኦያ
«ቤኒ ኔ ኣያ
ኔና ሚጻታ ዬሊዳ
ኣፒሌ ሚꬃ ጋርሳፌ
ታ ኔና ቤጎꬃ ዴንꬃዲስ።
6 ሜርና ሲቆን
ኔ ዎዚናን ታና ዎꬃ፤
ታና ጻላ ኔ ቄሴ ቦላ
ማታሜ ማላ ሾጫ፤
ኣይስ ጊኮ ሲቆይ
ሃይቆ ማላ ሚኖ፤
ቃናቴይ ዱፎ ማላ
ሜንጼ ኢታ፤
ኢዚ ላጮይካ ታማ ላጮ ማላ
ፖፖልኡ ጌስ።
7 ሃꬃ ዳሮይ ሲቆ ታማ
ቶይሳናስ ዳንዳዬና፤
ዲኦይካ ሜጪዲ ኤፌና፤
ኣሲ ባስ ዲዛ ሚሽ ኡባን
ሲቆ ሻማናስ ኮይኮ
ሲቆይ ሚሻን
ቤቶንታ ጊሻስ
ኣሳይ ቂልጪ ካኤስ» ጋዱስ።
ላጌቲ
8 «ꬋንꬂ ኡቶንታ ቄሪ ሚቻ
ኑስ ዳዉስ፤
ኣዚናይ ኢዞ ኦይቺኮ
ኑ ኢዚስ ኣይ ኦꬃኔ?
9 ኢዛ ጊምቤ ጊዲዳኮ
ኑኒ ኢዚ ቦላ ቢራፔ
ሻኮ ኦꬃና፤
ኢዛ ጌሊዛ ፔንጌ ጊዲዳኮ
ኑኒ ኢዚ ቦላ
ሊባኖሴ ዚጋፔ
ሳንቃ ኬሳና» ጊዳ።
ጌላኦያ
10 «ቤኢቴ ታኒ ጊምቤ፤
ታ ꬋንꬃቲካ ሻኮ ማላ፤
ታኒ ታ ሲቆዛራ ዲዛ ዎዴ
ኢዚ ኡፋይሲኔ
ሳሮቴꬅ ዴሜስ።
11 ሶሎሞኔስ ባኣሊ-ሃሞኔን
ዎይኔ ቶኪዛሶሆይ ዴስ፤
ሄ ዎይኔ ቶኪዛሶሆዛ
ኦሳንቻታስ
ኪራ ኢሚዴስ፤
ኢስቲካ ሁኤን ሁኤን
ሺ ቢራ ኢዛስ ኤሄቴስ።
12 ጊዶ ኣቲን ታስ ቡዞ ጊዲዳ
ዎይኔ ቶኪዛሶሆይ ዴስ፤
ሶሎሞኔ ኔኒ ሺ ቢራ ኤካ፤
ኦሳንቻቲ 200 ቢራ
ኤኬቶ» ጋዱስ።
ፓንꬃዚ
13 «ሃኔ ታ ሚሺራዬ!
ኔ ኣታኪልቴ ጊዶን
ዳሼ ሃሳይዛ
ቃላ ታ ላጌቲ ሲያና ኮዬቴስ፤
ኣኔ ታናካ ኔ ቃላ
ጬንጉርሳ ሲሳ» ጊዴስ።
ጌላኦያ
14 «ታ ሲቆዞ!
ታኮ ኤሶን ሃ ያ!
ሳዎ ኣታኪልቴቲ ሞኪዛ
ዙማታ ቦላራ ጉፒዛ
ጌኔሳ ዎይኮ ዉሻ
ላቃ ሚሳታ» ጋዱስ።