ኔ ቶሆቲ ኔኒ

ናጻላ ጫማ ኣꬃ ዲሺን

ቤኢዛ ዎዴ ኣይ ማላ ሎኢዞ!

ኔ ሼቻቲ

ሂላንቻ ዎጋጬይ ቆጺዲ

ሎኤꬂ ኣሌቂሲዳ

ኢንቁ ሚሳቴስ።

ቢሪሌ ሚሳቴስ፤

ኔ ጼሳይ

ሎኦ ጪሻን ቃሼቲዳ

ጊስቴ ሚርቄ ሚሳቴስ።

ዉሻ ላቃ ሚሳቴቴስ።

ዛሌን ኣሌቄቲዳ

ኣዱሳ ጊምቤ ሚሳቴስ፤

ኔ ኣይፌይ ጊታ ሃሴቦኔ

ካታማ ፔንጌ ማታን ዲዛ

ኤሌ ሃꬅ ሚሳቴስ፤

ኔ ሲꬌይ ዳማስቆ ጼሊሲዲ

ጊምቢዳ ሊባኖሴ

ጊምቤዛ ሚሳቴስ።

ዙማ ሚሳቴስ፤

ኔ ሁኤ ቢናናይ

ጻጼቲ ኡቲዳ

ጺላታ ሚሳቴስ፤

ኔ ሁኤ ዳꬃይካ

ካዎዛ ዎዚና ኤኪዴስ።

ኔ ኣይ ማላ ሎኣይ!

ኔ ኣይ ማላ ካይሻይ!

ኔ ሲቆይ ታና

ኣይ ማላ ኡፋይሲዜ!

ኔ ꬋንꬃይ

ዛምባ ዉርጮ ሚሳቴስ።

ኬዛዳ ኢዛ ኣይፌታ ማጻና፤

ኔ ꬋንꬃቲ ዎይኔ ኣይፌ ማላ

ዉርጮቲ ኡቲዳ፤

ቃሴ ኔ ፔኖይ

ኣፒሌ ኣይፌ ማላ ሳዌስ።

ኤሳ ኢሊሎ ማላ

ማልኤቴስ» ጊዴስ።

«ሂስቲኮ ሄ ሎኦ ኢሊሎይ

ታ ሲቆዛ ሜቴርሻታ ጊዶራኔ

ኣቻታ ጊዶራ ዱጌ

ዎሎሉ ጊ ጎጎ።

ኢዚካ ታና ኣሞቴስ።

ናምኣይ ካታማፔ ኬዚዲ

ኣኔ ጌዴ ጋጻሬ ቦስ፤

ሄን ኦማርስ ኣኔ ኢሲፌ ኣꬆስ።

ኣኔ ዎይኔ ኣታኪልቴ

ጊዶ ቦስ፤

ዎይኔይ ጪዪዳኮ፥

ኦሮማኔይካ ኣይፊዳኮ

ኣኔ ቤዮስ፤

ሄን ታኒ ታ ሲቆ

ኔስ ቆንጪሳና።

ዱማ ዱማ ኣይፌ

ኢሚዛ ኣታኪልቴቲ

ኑ ካሬን ኩሚዳ፤

ታ ሲቆዞ!

ሃ ኣይፌታፔ ቴሪዳይታኔ

ኦራꬅ ማጼቲዳይታ

ኔስ ዎꬃዲስ።