6
ላጌቲ
1 «ማጫሳ ኡባፌ ሎኦዬ!
ኔ ሲቆ ላጌዚ ኣዋ ቢዴ?
ኑኒካ ኔናራ ኢሲፌ ኮያናስ፥
ኢዚ ኣዋ ባጋራ ቢዳኮ
ኑስ ዮታ» ጊዳ።
ጌላኦያ
2 «ታ ሲቆዚ ዶርሳ ዉዴ ሄማናስ
ሎኦ ጪሻታ ማጻናስ
ሺቶስ ጎኢዛ ሳዎ
ማታይ ዲዛሶ
ዱጌ ኣታኪልቴ ጊዶ ዎꬊዴስ።
3 ታኒ ታ ሲቆዛሳ፤
ኢዚካ ታሳ፤
ኢዚ ዉዴዛ ጪሊላ ማታን
ሄሜስ» ጋዱስ።
ፓንꬃዚ
4 «ታ ጎዴ! ኔኒ ቲርጻ ካታማይ
ሎኢዛ ማላ ሎኣሳ፤
ዬሩሳላሜ ማላ ኬሃ ካይሻሳ፤
ባንዲራ ቶኪዲ ቢዛ
ኦላንቻ ማላ
ያሺሲዛ ቴማራ ዳሳ።
5 ዎዜ ኔና ኔ ኣይፌ
ታፔ ዴንꬃርኪ!
ኢስቲ ታና ዲኢዲ
ቃሾ ኣስ ኬሲዳ፤
ኔ ቢናናይ ጋላኣዴ ዙማፔ
ዱጌ ዎꬊዛ
ዴይሻ ዉዴ ሚሳቴስ።
6 ኢስታ ጊዶን ማይኔይ ባይንዳ
ሜንቴ ሜንቴ ዬሊዛ ኢስኬይ
ዲሬቲን ሜጬቲ ኬዚዛ
ቦꬃ ዶርሳ ዉዴታ ማላ
ኔ ኣቻቲ ታና ኡፋይሴቴስ።
7 ኔ ሻጋላቲ ኣይፌሶ ካሚዛ
ቁራጬ ጊዶራ ጼሊዛ ዎዴ
ኦሮማኔ ናምኡ ኬሲ
ጳልቂዳ ሚሳቴቴስ።
8 ኡሱፑን ታሙ ማጫ ካዎቲ፥
ኦስፑን ታሙ
ላጌꬆ ማጫሳቲ፥
ቃሴ ቆዳይ ባይንዳ
ጌላኦቲ ዴቴስ።
9 ታኒ ጊዲኮ
ኢሲኒዮ ጻላ ዶሳይስ፤
ኢዚ ቦላ ኣይ ዎሶይ ዴና፤
ኢዛ ሃራጴ ማላ
ካይሻ ኡታዱስ፤
ኢዛ ባ ኣዬይስካ ሜጺ ኢሲኖ፤
ኢዞ ዬሊዳ ኣያ ኢዞ
ኡባፌ ኣꬃ ሲቃዉስ።
ጌላኦቲካ ኢዞ
ጼሊዲ ጼሊዲ ሳቤቴስ፤
ካዎ ማቼቲኔ
ኢዛ ላጌꬆቲ ኢዞ ናሼቴስ።
ላጌቲ
10 ሃና ማላዶ
ጻልቄ ማላ ሞኪዛራ፥
ኣጊና ማላ ጶሊዛራ፥
ኣዋ ማላ ፖኢዛራ፥
ባንዲራ ቶኪዲ ቢዛ
ኦላንቻ ማላ
ያሺሲዛራ
ኢዛ ኦኔ?» ጌቴስ።
ፓንꬃዚ
11 «ታኒ ሾባን ቶኬቲዳ
ኣታኪልቴታ ቤኣናስ፥
ዎይኔይ ኣጪዳኮ፥
ኦሮማኔይካ ጪዪዳኮ
ጼላናስ
ዱጌ ኦቾሎኔይ
ቶኬቲዛሶ ዎꬋዲስ።
12 ታኒ ቆፖንታ ዲሺን፥
ታ ኣሞይ ታና ኤፊዲ
ካዎ ፓራ-ጋሬታ ቦላ
ኡቲሲዴስ» ጊዴስ።
ላጌቲ
13 «ሃኔ ሹላሜ ማጫሳዬ!
ሃ ሲማ፤
ኔና ኑ ሎኤꬂ ጼላና ማላ
ሃ ሲማ» ጊዳ።
ጌላኦያ
«ዳሮ ኣሳ ሲንꬃን
ዬጺዛ ኣሳ ማላ፥
ታና ሹላሜ ማጫሳዮ
ኣይስ ጼሌቲ?» ጋዱስ።