9
ሲንꬃፌ ካዎታና ሳሮቴꬃ ካዎ
1 ጬጪሼ ዲዛይታስ ሃይሳፌ ጉዬን ሂዶታይ ꬋዬና፤ ቤኒ ዎዴ ዛቢሎኔ ቢታኔ ኒፍታሌሜ ቢታ ካዉሺዴስ፤ ሲንꬃፌ ያና ዎዴን ጊዲኮ ሜዲቴራኔ ኣባ ኦጌን ዴኢዛ ቢታኔ ዮርዳኖሴ ሻፋፔ ሄ ፒንꬃን ዴኢዛ፥ «ኣይዛቤቲ ዴኢዛ ጋሊላ ቢታ» ኢዚ ቦንቻና። ማቶ 4፡15
2 ꬉማን ዴኢዛ ዴሬይ
ዎልቃማ ፖኦ ቤኢዴስ፤
ሃይቆ ኩዋ ጋርሳን ዲዛ ዴሬታስ
ፖኦይ ፖኢዴስ። ማቶ 4፡16፤ ሉቃ 1፡79
3 ኔኒ ካዎቴꬃ ዳርሳዳሳ፤
ኢስታስ ኡፋይሳ ቦላ
ኡፋይስ ጉጃዳሳ፤
ኣሳይ ካꬅ ሺሺሼኔ
ዲኢ ኤኪዳ ሚሽ ጊሼቲሼ
ኡፋዬቲዛ ማላ
ኢስቲካ ኔ ሲንꬃን ኡፋዬታና።
4 ካሴ ኔኒ ሚዲያሜ ቢታ
ጾኒዳ ማላ
ኢስታ ዴጺዛ ቃምባራ፥
ኢስታ ሃሼ ቦላ
ዎꬊዳ ዱርቃኔ
ኢስታ ዋዪሲ ሃሪዳ
ጉፌ ሜንꬃዳሳ።
5 ኦላንቻታ ጫማይ ኡባይ፥
ሱꬃን ሞሬቲዳ
ማይኦ ኡባይካ
ታማን ዱኔ ጊዲ ኤጻና።
6 ሄኮ ኑስ ናይ ዬሌቲዴስ!
ኣቱማ ናይካ ኑስ ኢሜቲዴስ!
ሃላቃቴꬂ
ኢዛ ሃሼ ቦላ ጊዳና፤
ኢዛ ሱንꬂ፥
«ማላሊሲዛ ዞራንቻ፥
ዎልቃማ ጾሳ፥
ሜርና ኣዋ፥
ሳሮቴꬃ ሃላቃ» ጌቴታና።
7 ኢዛ ካዎቴꬃ ኣኮቴꬃሲኔ
ኢዛ ሳሮቴꬃስ ዛዋይ ዴና፤
ሃቺፌ ዶሚዲ
ሜርና ጋካናስ
ባ ካዎቴꬃ፥
ሱሬ ፒርዳኒኔ
ጺሎቴꬃን ኤሳና፤
ሎኤꬂ ኦይኪዲ ሚንꬃና፤
ዳዊቴ ካዎቴꬃ ኣራታን
ኢዚ ኡታና፤
ዴራ ኡባ ሃራና፤
ኡባፌ ዎልቃማ
ጎዳ ቃናቴይ
ሄሳ ፖላና። ሉቃ 1፡32-33
ኢስራኤሌ ቦላ ጾሳ ሃንቆ
8 ጎዳይ ያቆቤ ዛሬታ ቦላ
ፒርዳ ቃላ ኪቲዴስ፤
ኢዚካ ኢስራኤሌ ቦላ ፖሌታና።
9 ኤፍሬሜኒኔ ሳማሪያን ዴኢዛ
ዴሬ ኡባይ
ሄሳ ጾሲ ኦꬂዳይሳ ኤራና፤
ኦቶሮኒኔ
ሞꬌቴꬃን ዴንዲዲ፥
10 «ጹቤፔ ኦሴቲዳ
ጊምቤቲ ላሌቲዳ፤
ኑኒ ጊዲኮ
ማሴቲዳ ሹቻን
ዛሪ ጊምባና፤
ኤꬃቲ ቃንጼቲዳ፤
ኑኒ ጊዲኮ ኢስታሶሆን
ዚጋ ላማና» ጊዳ።
11 ሄሳ ጊሻስ ጎዳይ
ኤራሶኔ ሞርኬታ ሚንꬃና፤
ኢስታ ሞርኬታ ኢስታ ቦላ
ዴንꬄꬂዲ ኤሃና።
12 ኣርሼይ ሞኪዛ ባጋፌ
ኣራሜ ቢታ ኣሳቲኔ
ኣርሼይ ዉሊዛ ባጋፌ
ፊሊስጼሜ ቢታ ኣሳቲ
ባንታ ዶና ሃንጊዲ
ኢስራኤሌ ሚታና።
ሄሲ ኡባይ ሃኒንካ
ጎዳ ሃንቆይ ኢርጺቤና፤
ኢዛ ኩሼይካ
ዴንዲዳሶፔ ሲሚቤና።
13 ዴሬዚ ጊዲኮ ባና ሾጪዳ
ጎዳኮ ሲሚቤና፤
ኡባፌ ዎልቃማ
ጎዳካ ኮዪቤና።
14 ሄሳ ጊሻስ
ጎዳይ ሁኤኔ ጎይና፥
ዛምባ ሃጋኔ ማቃ
ኢስራኤሌፔ ኢሲ ጋላስ ቄጻና።
15 ጪማቲኔ ቦንቼቲዳይቲ ሁኤ፤
ዎርዶ ታማርሲዛ ናቤቲ ጎይና።
16 ሃይሳ ዴራ ካሌꬂዛይቲ
ባሌꬄቴስ፤
ካሊዛ ዴሬይካ ኦጌፔ
ካሬ ኬዚዲ ቶይላቴስ።
17 ሄሳ ጊሻስ ጎዳይ
ናቴꬃ ናይታን ኡፋዬቴና፤
ዪኦታሲኔ
ኣምኤታስ ቃꬌቴና፤
ኡባይካ ኢታ ኦꬂዛይታኔ
ጾሳ ያሻቴꬅ ባይንዳይታ፤
ኡባ ኣሳ ዶናፔ
ሃራሲዛ ቃላይ ኬዜስ፤
ሄሲ ኡባይ ሃኒንካ
ጎዳ ሃንቆይ ኢርጺቤና፤
ኢዛ ኩሼይካ
ዴንዲዳሶፔ ሲሚቤና።
18 ዴራ ኢታቴꬂ ኪንዲቾኔ
ኣጉንꬅ ጹጊዛ ታማ ማላ፤
ꬊፒ ጊዳ ዎራይ ጹጌቲሺን
ኬዚዛ ጩዋ ቱሳ ማላ
ሲቲ ጊዲ ፑዴ ኬዜስ።
19 ኡባፌ ዎልቃማ ጎዳ ሃንቆን
ቢታይ ጹጌታና፤
ዴሬይካ ታማን ጌሊዛ
ሚꬃ ማላ ጊዳና፤
ኢሻይ ኢሻስ ቃꬌቴና።
20 ኡሻቻ ባጋራ ቱጻና፤
ጊዶ ኣቲን ጋፋ ቴቄና።
ሃዲርሳ ባጋራ ማና፤
ጊዶ ኣቲን ካሌቴና።
ኢሶይ ኢሶይ ባ ዬሊዳ
ናይታ ማና።
21 ሚናሴይ ኤፍሬሜ ማና፤
ኤፍሬሜይካ ሚናሴ ማና፤
ኢስቲ ኢሲፌ ጊዲዲ
ዩሁዳ ቦላ ዴንዳና።
ሄሲ ኡባይ ሃኒንካ
ጎዳ ሃንቆይ ኢርጺቤና፤
ኢዛ ኩሼይካ ዴንዲዳሶፔ
ሲሚቤና።