10
1 ጌላ ዎጋኔ
ኣስ ኡንኤꬂዛ ኣዋጃ
ኬሲዛይታስ ኣዬ ኣና!
2 ማንቆታ ፒርዳ ጌላሲዛይታስ፥
ኡንኤቲዳ ታ ዴሬዛ
ፒርዳ ቦካሲዛይታስ፥
ኣምኤታ ኣቆታ ቦንቂዛይታስ፥
ዪኦታ ኣቆታ ꬌቺ ሚዛይታስ
ኣዬ ኣና!
3 ኢንቴና ጾሞሲዛ ዎዴ
ኢንቴ ኣዋ ጌላንዴቲ?
ሃኮፔ ባሺ ዪዛ ዎዴ
ኣይ ሃናንዴቲ?
ማዶ ዴማናስ
ኦናኮ ባቃታንዴቲ?
ኢንቴ ኣቆታ ኣዋን ቆታንዴቲ?
4 ቃሼቲዳ ኣሳራ ኢሲፌ ቃሼቴꬃፌ
ሹኬቲዛ ኣሳራ ኢሲፌ
ሹኬቴꬃፌ ኣቲን
ሃራይ ኢንቴስ ኣታናሶይ ዴና።
ሄሲ ኡባይ ሃኒንካ
ጎዳ ሃንቆይ ዶቺቤና፤
ቃጻያናስ ኢዚ ባ ኩሼ
ዴንꬂ ዎꬂዴስ።
ኣሶሬ ቦላ ያና ጾሳ ፒርዳ
5 ጎዳይ፥ «ታ ሃንቆስ ጉፌ፥
ታ ኤሂዛ ባሻስ
ጻምኣ ጊዲዳ ኣሶሬ ቢታ
ኣሳስ ኣዬ ኣና!ኢሳ 14፡24-27፤ ናሆ 1፡1—3፡19፤ ሶፎ 2፡13-15
6 ኢስታ ኣቆታ ቦንቃና ማላ፥
ባንታስ ዲኦ
ቡሪ ሺሻና ማላ፥
ኢስቲ ኦጌ ኡርቃꬆ
ዬꬌታና ማላ፥
ጾስ ኤሮንታ
ካዎቴꬃ ቦላ ኪታና።
ታና ሃንቄꬂዳ ኣሳ ቦላ
ታኒ ኣሶሬታ ዬዳና።
7 ጊዶ ኣቲን ኣሶሬ ካዎይ
ሃይሳ ሃልቺቤና፤
ኢዛ ዎዚናን ሃይሳ ማላ
ቆፋይ ዴና፤
ኢዛ ሃልቾይ
ዳሮ ካዎቴꬃታ
ባሻናሲኔ
ሙሌራ ꬋይሳናሳ።
8 ኢዚ፥ ‹ታ ኦላ ጋዳዋቲ ኡባቲ
ካዎ ጊዴቴኔ?› ጊ ጬቄቴስ።
9 ‹ካልኖይ ካርካሚሼ ማላ፥
ሃማቴይ ኣርፋዴ ማላ፥
ሳማሪያይካ
ዳማስቆ ማላ ጊዴቴኔ?
10 ዬሩሳላሜኒኔ
ሳማሪያን ዴኢዛ
ኤቃ ሚስሌታፔ
ዳሪዛ ሚስሌታ ጎይኒዛ
ካዎቴꬃታ ሴራናስ
ታኒ ታ ኩሼ ዬዳዲስ።
11 ሳማሪያ ቦላኒኔ
ኢዚ ሚስሌታ ቦላ
ታ ኦꬆይሳꬆ ዬሩሳላሜ ቦላኔ
ኢዚ ሚስሌታ ቦላ
ታ ኦꬂኪና?› ጌስ» ጊዴስ።
12 ጎዳይ ጺዮኔ ዙማ ቦላኔ ዬሩሳላሜ ቦላ ባ ኦꬃና ኦሶ ኡባ ፖሊዳፔ ጉዬ፥ «ኣሶሬ ካዎ ኢዛ ዎዚና ኦቶሬቴꬃ ጊሻሲኔ ኢዚ ካꬌ ኣይፌን ጼሊዛ ጊሻስ ታ ኢዛ ቃጻያና» ጌስ።
13 ኣሶሬ ካዎይ፥
«ሃይሳ ኡባ
ታኒ ታ ሚኖ ቄሴን ኦꬃዲስ፤
ቃሴካ ታኒ ኣꬎ ኤራንቻኔ
ኣኬካንቻ፤
ታኒ ካዎቴꬃታ
ዛዋ ላላዲስ፤
ታኒ ኢስታ ኣቆታ ቦንቃ ኤካዲስ፤
ታ ቃራቴꬃን
ኢስታ ካዎታ ካዉሻዲስ።
14 ኣሲ ባ ኩሼ ካፎ ኬꬃን ዬዲዛ ማላ
ታኒካ ታ ኩሼ
ካዎቴꬃታ ኣቆታን ዬዳዲስ።
ቃሴ ኣሲ ዶጌቲ ኣቲዳ
ጱጱሌታ ሺሺዛ ማላ
ታኒካ ዴሬ ኡባ ሺሻዲስ።
ፓላናስ ባ ቄፌ
ሚጪዳይ ዴና፤
ዋሳናስ ባ ዶና
ዶይዳይ ዴና» ጊዴስ።
15 ካልታይ ባናን
ቃንጺዛዴ ቦላ ጬቄቲዜ?
ማጋዜይ ባና
ጎቺዛዴ ቦላ ኦቶሬቲዜ?
ጻምኣይ ባና ኦይኪዳ ኣሳ ቦላ
ባ ሁኤ ቃꬃና ዳንዳይዜ?
ጉፌይ ኣሲ ባይንዳ ባርካ
ሄሜቲ ኤሪዜ?
16 ሄሳ ጊሻስ ጎዳይ፥
ኡባፌ ዎልቃማ ጎዳይ፥
ሞꬊዳ ኢዛ ኦላንቻታ ቦላ
ጊልቂሲዛ ሃርጌ ዬዳና፤
ኢዛ ቦንቾዛፔ ጋርሳራ
ላጪዛ ታማ ዬዳና።
17 ኢስራኤሌ ፖኦይ ታማ ጊዳና፤
ጌሻዚካ ታማ ላጮ ጊዳና፤
ኢሲ ጋላሳን ኢዛ ኣጉንꬃኔ
ኪንዲቾዛ ታማይ ማና።
18 ሃርጋንቻይ ጊልቂዲ
ሃይቂዛ ማላ
ባ ዎራ ቦንቾኔ
ኣራዳ ቢታ፥
ኣሾኔ ሼምፖ
ሙሌራ ꬋይሳና።
19 ኢዛ ዎራን ጉꬃ ሚꬃቲ
ጫሻ ኣታና፤
ሄይታካ ቄሪ ናይ
ቆዲ ዉርሳና ዳዳዬስ።
ጫሻ ኣቲዳ ኢስራኤሌ ዛሬታ
20 ሄ ዎዴ ኢስራኤሌ ዛሬፔ
ጫሻ ኣቲዳይቲ፥
ያቆቤ ኬꬃፌ ኣቲዳይቲ
ሃይሳፌ ጉዬ ባንታና
ሾጪዳይታ ቦላ ዜምፔቴና፤
ጊዶ ኣቲን ጎዳን
ኢስራኤሌ ጌሻን
ቱማፔ ኣማኔታና።
21 ጫሻ ኣቲዳይቲ ሲማና፤
ያቆቤ ኬꬃፌ
ጫሻ ኣቲዳይቲ
ኡባፌ ዎልቃማ
ጾሳኮ ሲማና።
22 ኔኖ ኢስራኤሌ! ኔ ኣሳይ
ኣባ ሻሚንታ ማላ ጊዲኮካ
ጫሻ ኣቲዳይቲ ጻላ ሲማና።
ጺሎቴꬃን ኩሚዳ
ጊታ ባሺ ኣዋጄቲዴስ።
23 ጎዳይ፥ ኡባፌ ዎልቃማ
ጎዳይ ሳኣ ኡባ ቦላን
ኤሃና ቃቺዳ
ባሽ ኤሃና። ኦሮ 9፡27
ኣሶሬ ቦላ ያና ጾሳ ፒርዳ
24 ሄሳ ጊሻስ ጎዳይ፥ ኡባፌ ዎልቃማ ጎዳይ፥
«ጺዮኔን ዲዛ ታ ዴሬዞ!
ጊብጼቲ ኔ ቦላ
ኦꬂዳይሳꬆ
ጉፌ ኔ ቦላ ዴንꬂዳይታ
ዱርቃን ኔና ቆጺዳ
ኣሶሬ ኣሳስ ባቦፋ።
25 ታ ኔ ቦላ ኤሂዳ ቂጻቴዛ
ጉꬃ ዎዴ ጋርሳን ታ ኤሳና፤
ታ ኢስታ ቦላካ
ቦሻ ኤሃና» ጌስ።
26 ኡባፌ ዎልቃማ ጎዳይ፥
«ሚዲያሜ ኣሳ
ሄሬቤ ዛላ ኣቻን
ሾጮይሳꬆ
ኢዚ ኢስታ ጹርቃፌራ ዋꬋና፤
ኢዚ ጊብጼታ ቦላ
ኦꬂዳይሳꬆ
ባ ጉፌዛ
ኣባ ቦላ ዴንꬃና።
27 ሄ ጋላስ ኢስታ ቶሆይ
ኔ ሃሼፔ፥
ኢስታ ቃምባራይ
ኔ ሞርጌፌ ኪቻና፤
ኔ ኦርዴቴꬃፌ ዴንዲዳይሳን
ኢዛ ቃምባራይ ሜቃና» ጌስ።
ዎራጂዛይቲ ዬጊዳ ኦላ
28 ኢስቲ ኣያቴራ ቢዲ
ሚጌሮኔ ካንꬂ ቤቴስ፤
ባስ ዲዛ ሚሻ
ማኪማሴን ሺሼቴስ።
29 ኢስቲ ፒኒዛሶራ ኣꬊ ቢዲ፥
ኑኒ ጌባን ዱንካኒ ኣቃና፤
ኤራማይ ዳጋማዱስ፤
ሳኦሌ ካታማ
ጊቢኣይ ባቃታዱስ።
30 ጋሊሜ ናዬ ኔ ዋሳ!
ላይሻ ኤዝጋ ሲያ!
ማንቆ ጊዲዳ ኣናቶቴ፥
ኔ ኢዚስ ዛሮ ኢማ።
31 ማዲሜናሃ ባቃታ ቦላ ዳዉስ፤
ጌባ ዴሬይ ቆቴታና
ዎꬃን ዴስ።
32 ኢስቲ ሃች ኖቤ ጋካና፤
ኢስቲ ባንታ ኩሼ
ዬሩሳላሜ ዙምቡላ ቦላ፥
ጺዮኔ ማጫ ናይ ዙማ ቦላ
ጬቄቴꬃን ማንዳና።
33 ቤኢቴ ጎዳይ፥
ኡባፌ ዎልቃማ ጎዳይ
ባ ጊታ ዎልቃን
ሃጋታ ቃንጼሬꬃና፤
ኣዱሳ ሚꬃቲካ
ሺሬቲ ዎꬋና፤
ꬎቁ ꬎቁ
ጊዳይቲካ ኩንዳና።
34 ጊርዲ ጊዳ ዎራካ
ካልታራ ቄጻና፤
ሊባኖሴ ዚጋቲካ
ዎልቃማዛ ሲንꬃን ኩንዳና።