ጌሻ ማጻፋ ኢሳያሳ ቲንቢቴ 11

11

ሳሮቴꬂ ኩሚዳ ካዎቴꬅ

1 ኢሴዬ ዱሩማፔ

ኣጫይ ፑርጫና፤

ኢዛ ጻጶታፔ

ኢሲ ሃጋይ ኣይፌ ኢማና።

2 ጎዳ ኣያናይ፥

ኣꬎ ኤራቴꬂኔ

ኣኬካ ኣያናይ፥ ዞሬ ኣያናይኔ

ዎልቃ ኣያናይ፥

ኤራቴꬃ ኣያናይኔ

ጎዳስ ያሺሲዛ ኣያናይ

ኢዛ ቦላ ሼምፓና።

3 ጎዳስ ያሻን ኢዚ ኡፋዬታና፤

ባ ኣይፌን ቤኢዳ ማላኔ

ባ ሃይꬃን

ሲዪዳ ማላ ፒርዴና።

4 ጊዶ ኣቲን ሂዬሳታስ

ጺሎ ፒርዳና፤

ሳኣ ቦላ ማንቆታስ

ሱሬ ፒርዳና፤

ባ ኢንጻርሳ ጻምኣን

ሳኣ ሾጫና፤

ባ ዶና ፔኖን

ኢታታ ዎꬋና።

5 ጺሎቴꬂ ኢዛስ

ጼሳ ዳንጮ ጊዳና፤

ኣማኔቴꬃይ ኢዛስ

ዳባላ ዳንጮ ጊዳና።

6 ካና ሱይቴይ ዶርሳ ላቃራ

ኢሲፌ ዳና፤

ማሄይካ ዴይሻ ላቃራ

ኢሲፌ ኢቻና፤

ሚዛ ማሪ፥ ጋሞ ማሪኔ

ሞꬎ ሜሄይ

ኢሲፌ ሄሜታና፤

ጉꬃ ናይ ኢስታ ሄማና።

7 ሚዚኔ ዛርዶይ ኢሲፌ ሄሜታና፤

ኢስታ ማራቲካ ኢሲፌ ኢቻና፤

ጋሞይ ቦራ ማላ ሃፓ ማና።

8 ꬋሚዛ ናይ

ኢታ ሾሻ ኦላን ካኣና፤

ꬋንꬅ ዱꬆንታ ናይ

ባ ኩሼ ጎፔ ሾሻ

ኦላን ዬዳና።

9 ጌሺ ጊዲዳ

ታ ዙማ ቦላ ቆሄቴና

ዎይኮ ኦኒካ ꬋዬና፤

ሃꬂ ኣባ ኩሚዛ ማላ

ሳኣ ኡባይ ጎዳ ኤሮን ኩማና።

ዲኤቲ ቢዳይታ ሲሞ

10 ሄ ዎዴ ኢሴዬ ዜሬꬂ ካዎቴꬃታስ ማላታ ጊዲ ኤቃና፤ ካዎቴꬃቲ ኢዛኮ ያና፤ ኢዛ ሼምፖሶይ ቦንቼታና። 11 ሄ ዎዴ ጎዳይ ናምኣንꬆ ባ ኩሼ ሚጪዲ ኣቲዳ ኣሳ ኣሶሬፔ፥ ፑዴሃ ጊብጼፔ፥ ዱጌሃ ጊብጼፔ፥ ቶጵያፔ፥ ኤላሜፔ፥ ሳናኦሬፔ፥ ሃማቴፔኔ ኣባ ጋጻን ዲዛ ዴሬታፔ ሺሻና።

12 ካዎቴꬃታስ ማላታ ኤሳና፤

ꬎቁ ኦꬂዲ ዴንꬃና፤

ኢስራኤሌፔ ጎዴቲ ቢዳይታ

ዛሪ ኤሃና፤

ላሌቲዳ ዩሁዳ ኣሳ

ኦይዱ ባጋ ቢታ ጋጻፔ

ኢዚ ሺሻና።

13 ኤፍሬሜ ቃናቴቴꬂ ኤቃና፤

ዩሁዳ ሞርኬቲካ

ቃንጼታና፤

ኤፍሬሜይ ዩሁዳ ቦላ

ቃናቴና፤

ዩሁዳይካ ኤፍሬሜ ኢጼና።

14 ኢስቲ ኣርሼይ ዉሊዛ ባጋራ

ፊሊስጼሜታ ዱጉንꬃ

ዎꬋና፤

ናምኣይካ ኢሲፌ ጊዲዲ

ኣርሼይ ሞኪዛ ዴሬዛ ቦንቃና፤

ኢስቲ ኤዶሜ ቦላኔ

ሞኣቤ ቦላ

ባንታ ኩሼ ዴንꬃና፤

ኣሞኔ ኣሳይ ኢስታስ ሃሬታና።

15 ጎዳይ ኢታ ጫርኮን

ጊብጼ ኣባ ሜሊሳና፤

ኢዚ ባ ኩሼ ኤፊራጺሴ

ሻፋ ቦላ ዬዳና፤

ላፑን ኬሲ

ሻኬሬꬂ ዬጋና፤

ሄሳ ጊሻስ

ኣሳይ ቶሆፔ ጫማ

ኬሶንታ ፒናና።

16 ካሴ ኢስራኤሌይ ጊብጼፔ

ኬዚሺን ሃኒዳይሳꬆ

ኣሶሬን ኣቲዳ ኣሳይ

ኬዛና ኦጌ ኢስታስ ጊጊሳና።

11:1 ኣጁ 5፡5፤ 22፡16

11:4 2ታሶ 2፡8

11:5 ኤፌ 6፡14

11:9 ኢሳ 65፡25

11:9 ኢም 2፡14

11:10 ኦሮ 15፡12

11:15 ኣጁ 16፡12