13
ባቢሎኔ ቦላ ዮቴቲዳ ቲንቢቴ
1 ኣሞጼ ና ኢሳያሳስ ጎዳይ ባቢሎኔ ጊሻስ ቆንጪሲን ኢዚ ቤኢዳይሲ ሃይሳፌ ካሊዛይሳ፤ ኢሳ 47፡1-15፤ ኤር 50፡1—51፡64
2 ኣይኮይ ባይንዳ ሜላ ዲዛ
ዙምቡላ ቦላ ማላታ ኤሲቴ፤
ኢንቴ ቃላ ꬎቁ
ሂስቲ ዋሲቴ፤
ኢስታ ሹሜታ ፔንጌራ
ጌላና ማላ ማላታ ቤሲቴ።
3 ታ ጾኖን ኡፋዬቲዛይታ
ታ ጌሻታ ኣዛዛዲስ፤
ታ ሃንቆ ኢስቲ ፖላና ማላ
ታ ኦላንቻታ ጼይጋዲስ።
4 ዳሮ ዴሬይ ዎጫሚዛ ማላ
ዙማታ ቦላ ዎጫሚዛ
ዎጫማ ሲዪቴ!
ካዎቴꬃታ ጊዶን
ሜቶቲዳ ዴሬይ
ጉጉሚዛ ጉጉንꬃ ሲዪቴ!
ኡባፌ ዎልቃማ
ጎዳይ ኦላንቻታ
ኦላስ ሳልፊሲዴስ።
5 ጎዳይኔ ኢዚ ባ ሃንቆ ፖሊሳናስ
ጎኤቲዛ ሚሻቲ
ቢታ ኡባ ꬋይሳናስ
ሃሆ ቢታፌ
ሳሎታ ጋጻፔ ዪዳ።
6 ጎዳ ጋላሲ
ማቲዳ ጊሻስ ዬኪቴ!
ሄ ጋላስ ኡባ ዳንዳይዛ
ጾሳ ማታፔ ባሺ ያና። ኢዩ 1፡15
7 ሄሳ ጊሻስ ኩሼ ኡባይ ሲላና፤
ኣሳ ኡባ ዎዚናይካ ሴራና።
8 ኢስቲ ሺሮታና፤
ኢስታ ዋዬይኔ ሜቶይ ጋካና፤
ሚጻይ ኦይኪዳ ማጫሳ ማላ
ኢስቲ ሚጻታና፤
ኢሶይ ኢሳራ ዳጋማን ጼሌታና፤
ኢስታ ኣይፌሶይ ዳጋማን
ሻላ ማይኢዴስ።
9 ቤኢቴ ጎዳ ጋላሳይ ሜንጼ ኢታ፤
ቢታ ሜላ ኣሻናስ
ኢዚን ዲዛ ናጋራንቻታ
ꬋይሳናስ ባሻራኔ
ጊታ ሃንቆራ ያና።
10 ሳሎ ጾሊንቴቲኔ
ኢስታ ቡቴቲ ፖኦ ኢሜቴና፤
ኣርሼይ ቡሮ
ሞኪዳ ማላ ꬉማና፤
ኣጊናይካ ባ ፖኦ ኢሙኩ። ሂዚ 32፡7፤ ማቶ 24፡29፤ ማር 13፡24-25፤ ሉቃ 21፡25፤ ኣጁ 6፡12-13
11 ጎዳይ፥ «ታኒ ኣላሜ
ኢዚ ኢታቴꬃ ጊሻስ
ቃጻያና፤
ኢታታካ ኢስታ
ናጋራ ጊሻስ ቃጻያና።
ታኒ ኦቶራንቻታ
ኦቶሬቴꬅ ሻራና፤
ሜንጼ ኢታታ ኦቶሬቴꬅ
ታ ካዉሻና።
12 ኣቲዳ ኣሳቲ ሙሩታ
ዎርቃፌ ቦላራ ኣልኦ ጊዳና፤
ኦፊሬ ዎርቃፌካ ኣልኦ ጊዳና።
13 ሄሳ ጊሻስ ታኒ ኡባፌ
ዎልቃማ ጎዳይ፥
‹ታኒ ታ ሃንቆ ቆንጪሲዛ ዎዴ
ሳሎ ቃꬃና፤
ሳኣካ ኢዚ ዴኢዛሶን
ኮኮርሳና› ጌስ።
14 ሻንካቲዛዴፌ
ባቃቲዛ ጌኔሳ ማላ፥
ሄሚዛዴይ ባይንዳ
ዶርሳ ዉዴ ማላ፥
ኣሲ ኡባይ
ባ ኣሳኮ ኣሳኮ ሲማና፤
ኢሶይ ኢሶይ ባ ዴሬ ባቃታና።
15 ዲኤቲዳ ኡባይ ጫዴታና፤
ኦይኬቲዳ ኡባይ
ማሻን ሃይቃና።
16 ኢስታ ኣይፌይ ቤኢሺን
ኢስታ ናይታ ቡሳካና፤
ኢስታ ኬꬃቲካ ቦንቄታና፤
ኢስታ ማቼታካ
ሃራይ ጋይታና» ጌስ።
17 ቤኢቴ፥ ቢራስ ዉዱ ጎንታይታ፥
ዎርቃንካ ኡፋዬቶንታይታ
ሜዶኔ ዴሬ ኣሳ
ታ ኢስታ ቦላ ዴንꬃና።
18 ኢስታ ዎንዳፌቲ ዎዳላታ ዉርሳና፤
ቄሪ ናይታካ ማሬቴና፤
ኢስታ ዎዚናይካ
ናይታስ ሚሼቴና።
19 ካዎቴꬃታስ ቦንቾ፥
ካላዳዌታስ
ጬቆ ጊዲዳ ባቢሎኔ
ጎዳይ ሶዶሜ ማላኔ
ጋሞራ ማላ ኢዞ ሺሪ ዬጋና። ሜꬌ 19፡24
20 ሄ ቢታን ሙሌካ ኣሲ ዴኤና፤
ኢዚን ኡቲዛ ኣሲካ ዴና፤
ኣራቤ ኣሲካ ሄን
ባ ዱንካኔ ቶኬና፤
ሜሄ ሄሚዛይቲካ
ባንታ ዉዴ
ሄን ሼምፒሴቴና።
21 ጊዶ ኣቲን ባዞ ዶኣቲ
ሄን ኢቻና፤
ኢዚ ኬꬃን ዎራካናቲ ኩማና፤
ሄን ጉቶቲ ዴኣና፤
ባዞን ዴይሽ ሚሳቲዛ
ዳይዳንꬃቲ
ኢዚ ቦላ ጉፓና። ኢሳ 34፡14፤ ሶፎ 2፡14፤ ኣጁ 18፡2
22 ኢዚ ሚጻን ጎዳሬቲ ዋሳና፤
ሎኢዛ ኢዚ ካዎቴꬃ
ኬꬃንካ
ዎራካናቲ ዋሳና፤
ኢዚ ዎዴይ ማቲዴስ፤
ኢዚ ጋላሳይካ ኣዱቄና።