ጌሻ ማጻፋ ኢሳያሳ ቲንቢቴ 14

ዲኤቴꬃፌ ኢስራኤሌ ኣሳ ሲሞ

1 ጎዳይ ያቆቤስ

ናምኣንꬆ ቃꬌታና፤

ኢስራኤሌካ

ዛሬꬂዲ ዶራና።

ኢስታ ኢስታ ቢታን ዎꬃና፤

ኢማꬃቲ ዪዲ ያቆቤሶ

ኣሳራ ዋላኬታና።

2 ካዎቴꬃቲ ኤፊዲ

ኢስታ ኢስታ ቢታ ዛራና።

ኢስራኤሌ ኣሳይ ካዎቴꬃታ

ባስ ኦይኪዲ

ማጫሳኔ ኣቱማሳ

ኣይሌ ሂስቲዲ

ጎዳ ቢታን ሃራና።

ባና ዲኢዳይታ ዛሪ ዲኣና፤

ባና ኡንኤꬂዳይታ

ዛሪዲ ሃራና።

ባቢሎኔ ካዎይ ሃይቂዳይታ ቦላ ጉጄቴꬅ

3 ጎዳይ ኢንቴና ኢንቴ ዋዬፔ፥

ሜቶፔኔ ኡንኤቴꬃፌኔ

ኢታ ኣይሌቴꬃፌ

ኔና ሼምፒሲዳ ጋላሲ፥

4 ኢንቴ ባቢሎኔ ካዎ ቦላ

ቂልጪሼ፥ «ኡንኤꬂዛይሳስ

ዎዴይ ዋኒ ዉሪዴ?

ኢዛስ ጊሪሲዛይሲ ዋኒ ኤቂዴ!

5 ጎዳይ ኢታ ጻምኣኔ

ሃሪዛይታ ካዎቴꬃ

ጉፌ ሜንꬂዴስ።

6 ካዎቴꬃታ

ፓጬይ ባይንዳ ሾጪዳይሳ

ቃꬌታይ ባይንዳ ጎዲ ጎዲ

ቆጺዳይሳ ሜንꬂዴስ።

7 ቢታያ ሳሮኔ

ሼምፖ ዴማዱስ፤

ኡፋይሳ ማዛሙሬ ዬጻዉስ።

8 ሃራይ ኣቲን ዚጋቲካ፥

ሊባኖሴ ጺዳቲካ

ኡፋዬቲዳ፤

ኔካ ኩንዳዳሳ፤

ሚꬅ ቃንጺዛዴይካ ሃይሳፌ ጉዬ

ካልታ ኑ ቦላ ዴንꬄና።

9 «ኔኒ ዪዛ ዎዴ ሲኦሌይ

ኔና ሞካናስ ጊጌታዱስ፤

ኔና ሞኪ ኤካና ማላ

ሞይቲሌታ፥

ኣላሜ ቦላ ዴሬ ሃሪዛይታ

ኡባታ ዴንꬄꬃዱስ፤

ቃሴ ካዎቴꬃታ ቦላ

ካዎቲዳ ካዎታ

ኢስታ ኣራታፔ

ዴንꬃ ኤሳዱስ።

10 ኢስቲ ኔስ፥

‹ኔካ ኑ ማላ ዳቡራዳሳ፤

ኑ ማላካ ጊዳዳሳ።

11 ኔ ቦንቾይ ዲꬃ ጊሪሳራ

ዱጌ ሲኦሌ ዎꬊዴስ፤

ባዳቲ ኔስ ጋርሳራ ሂጼቲዳ፤

ጉጹኔቲ ኔስ ቦላራ

ማይኦ ጊዳና› ጋና» ጌታ።

12 ኔኖ ዎንታ ናዞ፥

ቶሮጄ ጾሊንቴዞ፥

ኔ ዋናዳ

ሳሎፔ ዱጌ ኩንዳዲ?

ካዎቴꬃታ ካዉሺዳ

ኔኒ ዋናዳ ዱጌ ዬጌታዲ!

13 ኔኒ ኔ ዎዚናን፥

«ታኒ ፑዴ ሳሎ ኬዛና፤

ታ ካዎቴꬃ ኣራታካ

ጾሳ ጾሊንቴታፔ ቦላራ

ꬎቃን ዎꬃና፤

ዙማ ቦላ ሺቂዛሶን

ኣንጄቲዳ ዙማ ቦላ

ꬎቃሶሆን

ታ ካዎቴꬃ

ኣራታ ቦላ ኡታና።

14 ታኒ ሻራቲ ዲዛ ꬎቃሶሆፔካ

ፑዴ ኣꬋና፤

ታኒ ታና ኡባፌ

ꬎቃ ጾሳ ማላ

ኦꬃና» ጋዳሳ።

15 ጊዶ ኣቲን ኔኒ ሲኦሌን

ዱጌ ጪማ ኦላን ዬጌታዳሳ።

16 ኔና ቤኢዛይቲ ኡባይ

ቲሺ ሂስቲ ጼሊዲ

ኔና፥ «ቢታ ቃꬂዳይሲኔ

ካዎቴꬃታ

ኮኮሪሲዳይሲ ሃይሴ?

17 ሳኣ ባዞ ኬሲዳይሲ፥

ካታማታካ ላሊዳይ፥

ዲኤቲዳይቲ ባ ዴሬ

ሲሚ ቦንታ ማላ

ዲጊዳይ ሃይሴ?» ጋና።

18 ካዎቴꬃታ ካዎቲ ኡባይ

ቦንቾን ꬊስኪዳ፤

ባ ዱፎን ዱፎን ሼምፒዳ።

19 ኔ ጊዲኮ ኮዬቶንታ ሃጋ ማላ

ዱፎፔ ዎራ ኦሌታዳሳ፤

ማሻን ጫዴቲዳይታን፥

ዱጌ ጪማ ሹቻ

ኦላን ዎꬊዳይታን፥

ኣሳ ኩሼን ሃይቂዳይታን

ካሜታዳሳ፤

ኔኒ ቶሆን ዬꬌቲዳ

ኣሃ ማላ ጊዳዳሳ።

20 ኔኒ ኢስታራ ዱፎን ዳካ፤

ጋሶይካ ኔ ቢታ

ባሻዳሳ፤

ኔ ዴሬዛ ኔ ꬋይሳዳሳ፤

ኢታ ኦꬂዛይታ ዜሬꬂ

ሙሌካ ኣኬኬቴና።

21 ኢስቲ ዴንዲዲ

ቢታ ላቶንታ ማላ፥

ኣላሜን ባ ካታማ

ኢስቲ ኩንꬆንታ ማላ

ካሴ ኢስታ ኣዋታ ናጋራ ጋሶን

ኣቱማ ናይቲ

ሲፌታናሶሆ ጊግሲቴ።

22 ኡባፌ ዎልቃማ ጎዳይ፥

«ታኒ ኢስታ ቦላ ዴንዳና፤

ሂስታዳ ኢስታ ሱንꬃ፥

ኢስታፌ ኣቲዳይታ፥

ኢስታ ዜሬꬃኔ

ዬሌታ ባቢሎኔፔ ꬋይሳና።

23 ታኒ ባቢሎኔ ቁጻርሳ ኣቆሶኔ

ጫሬ ኬሳና፤

ባሻ ፔይጻን ታኒ ኢዞ

ፒታ ꬋይሳና» ጌስ።

ኣሶሬ ቦላ ዮቴቲዳ ቲንቢቴ

24 ኡባፌ ዎልቃማ ጎዳይ፥

«ታኒ ሃልቺዳ ማላ ፖሌታና፤

ታ ቆፒዳ ማላካ ሃናና።

25 ታኒ ኣሶሬ ታ ቢታ ቦላ ሊቂሳና፤

ታኒ ኢዛ

ታ ዙማ ቦላ ዬꬋና፤

ኢዛ ቃምባራይ

ታ ዴሬዛ ቦላፌ ዴንዳና፤

ኢዛ ቶሆይካ

ኢስታ ሃሼፔ ኪቻና»

ጊ ጫቂዴስ።

26 ሳኣ ኡባስ ቆፌቲዳ

ቆፋይ ሃይሳ፤

ካዎቴꬃታ ኡባ ቦላን

ሚጬቲዳ ኩሼይ ሃይሳ።

27 ኡባፌ ዎልቃማ ጎዳይ

ሃይሳ ቆፒዴስ፤

ሄሳ ኢዛ ኦኔ ዲጋናይ?

ኢዚ ባ ኩሼ ዴንꬂዴስ፤

ሄሳ ዛራናይ ኦኔ?

ፊሊስጼሜታ ቦላ ዮቴቲዳ ቲንቢቴ

28 ካዎ ኣካዜይ ሃይቂዳ ላይꬅ ሂዝጊዛ ቃላይ ዪዴስ፤

29 ኢንቴኖ ፊሊስጼሜ ኣሳቶ፥

ኢንቴና ሾጪዳ ጉፌይ

ሜቂዳ ጊሻስ

ኡባቲ ኡፋዬቶፍቴ፤

ሾሻ ጋርሳፌ

ሃሶ ሾሺ ኬዛና፤

ኢዛ ዜሬꬂካ

ጾንጌቲዛ ማርዜራ

ዲዛ ሃሶ ሾሽ ጊዳና።

30 ፑቴሳ ማንቆቲ

ዱሳሶ ዴማና፤

ሜቶታንቻቲ

ዎፑ ጊዲ ኢቻና።

ጊዶ ኣቲን ታኒ ኔ ዛሬ

ኮሻን ዉርሳና፤

ቃሴ ኔፔ ኣቲዳይታካ

ዲፒ ሂስታና።

31 «ኔኖ ፔንጌዞ! ዉ! ዉይ ጋ፤

ኔኖ ካታማዞ! ዋሳ፤

ኢንቴኖ ፊሊስጼሜ ኣሳቶ!

ኢንቴ ኡባይካ ሂርጋን ሴሪቴ!

ጋሶይካ ፑዴሃ ባጋፌ

ጩዋይ ኢንቴ ቦላ ዪዴስ፤

ሄ ጪፍራፔ

ዱጺ ኣታናይ ዴና።

32 ሄ ካዎቴꬃታፔ

ኪቴቲ ዪዛ ቃስታኔታስ

ኣይ ጊ ዛራኔ?

‹ጎዳይ ጺዮኔ

ሚንꬂ ኤሲዴስ፤

ዋዬ ኤኪዳ ዴሬይ

ኢዚ ጋርሳን ሼምፖሶ

ዴሚዴስ› ጊ ዛሮ።»

14:12 ኣጁ 8፡10፤ 9፡1

14:15 ማቶ 11፡23፤ ሉቃ 10፡15

14:24 ኢሳ 10፡5-34፤ ናሆ 1፡1—3፡19፤ ሶፎ 2፡13-15

14:28 2ካዎ 16፡20፤ 2ታሪ 18፡27

14:31 ኤር 47፡1-7፤ ሂዚ 25፡15-17፤ ኢዩ 3፡4-8፤ ኣሞ 1፡6-8፤ ሶፎ 2፡4-7፤ ዛካ 9፡5-7