15
ሞኣቤ ቦላ ዮቴቲዳ ቲንቢቴ
1 ሞኣቤ ቢታ ጊሻስ ጎዳይ ዮቲዳ ቃላይ ሃይሳ፤ ኢሳ 25፡10-12፤ ኤር 48፡1-47፤ ሂዚ 25፡8-11፤ ኣሞ 2፡1-3፤ ሶፎ 2፡8-11
ቂሬ-ሞኣቤን ዲዛ
ኤሬያ ላሌታዱስ፤
ኢሲ ጋላሳ ኦማርሳን ዲፒ ጋዱስ፤
ቃሴ ቂሬ-ሞኣቤን ዲዛ
ቂሬያ ላሌታዱስ፤
ኢሲ ጋላሳ ኦማርስ ዲፒ ጋዱስ።
2 ዲቦኔ ኣሳይ ጾሳ ኬꬅ ኬዚዴስ፤
ዬካናስ ፑዴ
ዙምቡላታ ቦላ ኬዚዴስ፤
ሞኣቤ ኣሳይ ኔቦ ጊሻሲኔ
ሜዴባ ጊሻስ ዋሴስ፤
ሁኤይኔ ቡቻይ
ሚልጺ ጊ ሜዴቲዴስ።
3 ኦጌይ ዲዛሶ ኡባን
ማቃ ማይኤቴስ፤
ፖቄታ ቦላኒኔ
ዳባባይ ዲዛሶን ዬኬቴስ፤
ኣፉንꬅ ጉሴቴስ።
4 ሃሴቦኔይኔ ኤልኤሌይ ዋሲዳ፤
ኢስታ ዋሶይካ
ያሃጼ ጋካናስ ሴቴቲዴስ።
ሄሳ ጊሻስ
ሞኣቤ ኦላንቻቲ ዋሲዳ፤
ኢስታ ዎዚናይካ ኮኮሪዴስ።
5 ታ ዎዚናይ ሞኣቤ
ጊሻስ ዬኪዴስ፤
ኢዚፔ ጎዴቲዳ ኣሳቲ
ዞኣሬ ጋካናስ፥
ኤጊላቴ-ሻሊሺያ
ጋካናስ ባቃቲዳ፤
ኢስቲ ኣፉንꬅ ጉሲሼ
ፑዴ ሉሂቴ ኬዚዳ፤
ቃሴ ሆሮናይሜ
ኤፊዛ ኦጌራ ቢሼ
ባንቲ ꬋያናይሳስ ዋሲዳ።
6 ኒሚሪሜ ሃꬃቲ ሚጪዳ፤
ማታይ ሹሊዴስ፤
ጫሬቻይካ ꬋይዴስ፤
ጪሊላ ሚሺካ ቤቴና።
7 ሄሳ ጊሻስ
ኢስቲ ሃሪዳ ኣቆታኔ
ኢስቲ ሺሺዳ ሃሮ
ኣሃያ ሻፋ
ቶኪ ፒንꬄቴስ።
8 ኢስታ ዋሶይ
ሞኣቤ ዛዋ
ጋካናስ ሴቴቴስ፤
ኢስታ ዋሶይ ኤጊላይሜ ጋካናስ
ኢስታ ዚላሳይካ
ቢኤሪ-ኤሊሜ ጋኬስ።
9 ዲሞና ሻፋቲ
ሱꬃን ኩሚዳ፤
ጊዲኮካ ታኒ ዲሞና ቦላ
ሄሳፌ ኣꬊዛዝ ኤሃና።
ሞኣቤፔ ባቃቲዛይታ ቦላ
ቢታይን ጫሻ ኣቲዳይታ ቦላ
ጋሞ ዬዳና።