16
ሞኣቤስ ሂዶታ ꬋዮ
1 ባዞ ቢታፌ ሄ ፒንꬃን ዲዛ ሴላፔ
ጺዮኔ ማጫ ናይ ዙማን
ዴራ ሃሪዛይሳስ
ዶርሳ ላቃ ዬዲቴ።
2 ባንታ ኬꬃፌ ጎዴቲዲ
ዋዬቲዛ ካፎታ ማላ
ሞኣቤ ማጫሳቲ
ኣርኖኔ ሻፋ ፑርዴን
ሄሳꬆ ሃናና።
3 ሞኣቤ ኣሳይ ዩሁዳ ኣሳስ፥
«ኑስ ዞሬ ኢሚቴ፤
ኑስ ፒርዲቴ፤
ሴታ ጋላስ ኢንቴ ኤሾን
ኦማርሳ ꬉማ ማላ
ኑና ካሚቴ።
ባቃቲዳይታ ቆቲቴ፤
ጎዴቲዳይታካ
ኣꬂ ኢሞፍቴ።
4 ሞኣቤፔ ጎዴቲዳይቲ
ኢንቴኮን ታኬቶ፤
ኢስታ ꬋይሲዛይታፔ
ኢስቲ ቆቴቲ
ኣቲዛሶሆ ጊዲቴ» ጌስ።
ኡንኤꬂዛይሳስ ዉርሴꬂ ያና፤
ባሺ ኣታና፤
ኦቶራንቻይ
ቢታ ቦላፌ ꬋያና።
5 ኣራታይ ሲቆን ሚኔስ፤
ሄ ኣራታን
ዳዊቴ ኬꬃፌ ጊዲዳይ፥
ሱሬ ፒርዳ ኣሞቲዛይ፥
ጺሎቴꬅ ኤሶሲዛይ
ኢሲ ኣሲ ኣማኔቴꬃን
ኢዛ ቦላ ኡታና።
6 ዩሁዳ ኣሳይ፥ «ሞኣቤታ ሃላጫ፥
ኦቶሬቴꬃኔ ሞꬌቴꬃ፥
ጬቄቴꬃኔ
ካꬌዛ ሲዪዶስ፤
ጊዶ ኣቲን ኢስታ ኦቶሬቴꬂ
ሃዳ» ጋና።
7 ሄሳ ጊሻስ ሞኣቤቲ ዋሳና፤
ኢሲ ቦላ ሞኣቤስ ዬካና፤
ቂሬ-ሄሬሴቴ ካታማ
ኣሳ ጊሻስ
ዩሺ ቆፒዲ
ካዮቲሼ ዬካና።
8 ሃሴቦኔ ጎሻ ጋዴቲ
ሴባማ ዎይኔ
ሚꬃቲ ሹሊዳ፤
ካዎቴꬃታ ሃሪዛይቲ
ኢያዜሬ ኣꬊ ቢዲ
ባዞ ቢታ ካንꬂዲ
ባንታ ጻጶ
ኣባ ጋካናስ ዬዲዳይታ
ዶሬቲዳ ዎይኔ ሚꬃታ
ዬꬌቲዳ።
9 ሴባማ ዎይኔ ሚꬃ ጊሻስ
ኢያዜራ ዬኪዛ ማላ
ታኒካ ዬካይስ፤
ሃሴቦኔ! ኤልኤሌ!
ታኒ ታ ኣፉንꬃን
ኢንቴና ሎጺኪሳይስ።
ጋሶይካ ኢንቴስ ሚꬃ ኣይፌቲ
ጋኪዳ ዎዴ ዲዛ ሆምቦጫይኔ
ካꬅ ሺሺዛ ዎዴ ዲዛ
ኡፋይሲ ኣቲዴስ።
10 ኡፋይሳይኔ ኢሊሊሳይ
ኔ ኣታኪልቴይ
ዲዛሶፔ ኪቺዴስ፤
ዎይኔ ቶኪዛሶሆን ዬጺዛ
ዬꬃይ ዴና፤
ኢሊሲካ ኣቲዴስ።
ዎይኔ ቴራ
ጉምኢዛሶሆይ ዴና፤
ጉምኢዛይታ ሆምቦጫካ
ታ ꬋይሳዲስ።
11 ሄሳ ጊሻስ ታ ዎዚናይ
ሞኣቤ ጊሻስ
ቃꬌታ ሚላስ ሲሳዉስ፤
ቂሬ-ሄሬሴታ ጊሻስ
ታ ማራጬያ ዬካዉስ።
12 ሞኣቤይ ፑዴ
ባ ዙምቡላ ቦላ ኬዚኮካ
ዳቡራ ጻላ፤
ኢዛ ዎሳስ
ባ ኤቃ ኬꬅ ጌሊኮካ
ጎኣይ ዴና።
13 ጎዳይ ሞኣቤ ጊሻስ ካሴቲ ዮቲዳ ቃላይ ሃይሳ። 14 ሃኢ ጊዲኮ ጎዳይ፥ ቃጻሬቲ ኦꬂዛ ኦሳንቻይ ጋላስ ቆዲዛ ማላ ሞኣቤ ቦንቾይኔ ኣሳ ጮራቴꬃይ ሄꬑ ላይꬃ ጊዶን ካዉያና፤ ሄን ኣቲዳ ኣሳቲ ጉꬃታኔ ዎልቃይ ባይንዳይታ ጊዳና።