17
ዳማስቆ ቦላኔ ኢስራኤሌ ቦላ ጾሳ ቂጻቴ
1 ዳማስቆ ጊሻስ፥
«ቤኢቴ፥ ሃይሳፌ ሲንꬃን
ዳማስቆ ካታማቴꬂ ኣታና፤
ላሌꬃ ዶሬ ጊዳና።
2 ኣሮኤሬ ካታማቲ ካይስ ጊዳና፤
ሜሄ ሄንꬃሶሆ ጊዳና፤
ኢስታ ባቢሲዛ ሚሺካ ዴና።
3 ጊምቤቲዳ ካታማይ ኤፍሬሜፔ፥
ካዎቴꬃ ማታይ
ዳማስቆፌ ꬋያና፤
ኣራሜፔ ጫሻ
ኣቲዳይታ ቦንቾይ
ኢስራኤሌታይሳ ማላ
ካዉያና» ጌስ
ኡባፌ ዎልቃማ ጎዳይ። ኤር 49፡23-27፤ ኣሞ 1፡3-5፤ ዛካ 9፡1
4 «ሄ ዎዴ ያቆቤ
ቦንቾይ ሻሩማታና፤
ኢዛ ሞꬎቴꬃይካ
ሹማና።
5 ካꬅ ማጺዛዴይ
ኤቂዳ ካꬃ ሺሺዲ
ሞꬌ ባ ኩሼን ማጺዛ ማላ
ኤራፋይሜ ሾባፌ ማጼቲዛ
ፑሹሎ ማላ ጊዳና።
6 ዎጋራ ሚꬅ ሾጪን
ናምኡ ዎይኮ ሄꬑ ኣይፌቲ
ሃጋ ጼራ ቦላ ኣቲዛ ማላ
ኦይዱ ዎይኮ ኢቻሽ ኣይፌቲ
ꬊፒ ጊዳ ሃጋታ ቦላ
ኣቲዛ ማላ
ጉꬃ ሃጋቲ ኣታና»
ጊ ጎዳ ኢስራኤሌ
ጾሳይ ሃሳይዴስ።
7 ሄ ዎዴ ኣሳይ
ባና ሜꬊዳይሳኮ ጼላና፤
ኢስታ ኣይፌይ
ኢስራኤሌ ጌሻኮ ጼላና።
8 ኢስቲ ባንታ ኩሼን ኦꬂዳ
ያርሾሶሆታ ጼሌቴና፤
ኢስቲ ባንታ ኤቃታስ
ኤጻኔ ጩኣሲዛሶሆታሲኔ
ኣሼሪስ ጎይናና ኤሲዳ
ቱሳታስ ቦንቾ ኢሜቴና።
9 ሄ ዎዴ ኢስራኤሌ ኣሳ ጋሶን
ቦሼቶንታ ኣቲዳ ሚኖ ካታማቲ
ዎራኔ ኣይኮይ ባይንዳሶ ጊዳና።
10 ኔና ኣሺዛ ጾሳ ባላዳሳ፤
ኔ ኢዛን ቆቴታ ኣቲዛ
ኔ ዛላካ ኣኬካቤካ፤
ሄሳ ኔኒ ዶሬቲዳ
ኣታኪልቴ ቶኪኮካ፥
ኦራꬃ ዜሬꬅ ኔ ዜሪኮካ፥
11 ኔ ቶኪዳ ጋላስ
ኢዚ ሞካና ማላ
ኔ ኦꬂኮካ፥
ኔ ዜሪዳ ዎንቴꬃ ጋላስ
ኢዚ ጪያና ማላ ኔ ኦꬂኮካ
ሄ ካꬃይ ሃርጌኒኔ
ፓጾንታ ሳኮን ሙሌራ ꬋያና።
ሞርኬ ካዎቴꬃታ ጾኔቴꬅ
12 ቤኣ፥ ዳሮ ኣሳ ሃንቆ ጊሪሲ
ኣባ ዳምባላ ማላ ጊሬስ፤
ቤኣ፥ ኣሳ ዋሶ ዳሮይ
ዎልቃማ ሃꬃ ማላ
ጉሜስ።
13 ኣሳይ ዎልቃማ
ሃꬃ ማላ ጉሚኮካ፥
ኢዚ ኢስታ ሴሪኮ
ዙምቡላ ቦላራ ጫርኮን ቢዛ
ጉዱላ ማላ
ጎቴ ጫርኮይ ላሊዛ
ሃፓ ማላ ላሌታና።
14 ሄኮ ሳኣይ ቃሚሺን
ቆፋይ ባይንዳ
ሺሮ ጊዲዴስ፤
ሳኣይ ዎንታናፔ ካሴቲዲ
ኦኒካ ቤቲቤና።
ኑ ኣቆታ ቦንቂዳይታ፥
ኡባ ዎልቃን ኤኪዛይታ
ቃዳይ ሄሳ።