25
ጾሳስ ሺቂዛ ጋላታ
1 ኣቤት ጎዳዉ!
ኔኒ ታ ጾሳ።
ታኒ ኔና
ꬎቁ ꬎቁ ሂስታና፤
ኔ ሱንꬃካ ሳባና።
ጋሶይካ ቤኒፔ ቆፌቲዳይሳ
ማላሊሲዛ ሃኖ ኩሜꬃ
ኣማኔቴꬃን ኦꬃዳሳ።
2 ኔኒ ካታማዮ
ሹቻ ዶሬ ኦꬃዳሳ፤
ጊምቤቲዳ ካታማዮካ
ላላዳሳ፤
ሃይሳፌ ሲንꬃን ጊምቤቲዳ
ኣላጋታ ካታማቲ ዴቴና፤
ሲሚዲ ሙሌካ ኦሴቴቴና።
3 ሄሳ ጊሻስ ሚኖ ዴሬቲ
ኔና ቦንቻና፤
ሜንጼ ኢታ ካዎቴꬃቲ
ኔስ ያያና።
4 ኔኒ ሂዬሳታስ ዜምፖ፤
ሜቶታንቻታስ ሜቶ ዎዴ
ኔኒ ዜምፖ፤
ጎቴ ጫርኮፌ ጌሚ ኣቲዛሶ፤
ኣዋ ሴላፔ
ኩዋቲዛሶ ጊዳዳሳ።
ጋሶይካ ሜንጼ ኢታታ ፔኖይ
ኬꬃ ጎዳራ ኢጬቲዛ
ጎቴ ጫርኮ ማላ።
5 ባዞ ቢታ ሴላ ማላ።
ኣላጋ ኦቶሬቴꬃ ዋሶ
ጮኡ ኦꬃሳ።
ኣዋ ሴላይ ሻራ ኩዋን
ኢርጺዛ ማላ
ሜንጼ ኢታታ
ማዛሙሬ ሲርጲ ጋና።
6 ጎዳይ ኡባፌ ዎልቃማ ጾሳይ
ሃይሳ ዙማ ቦላ ዴሬ ኡባስ
ጊዲዛ ጊታ ጊቢራ፥
ሎኢ ካጺዳ ዎይኔ ኡሹ፥
ሎኦ ኣሾኔ ዶሬቲዳ
ዎይኔ ኡሹ ጊጊሳና።
7 ሃይሳ ሃ ዙማን
ዴሬ ኡባ ቦላን
ዎꬊዳ ማጋላሻ፥
ካዎቴꬃታ ኡባ ጎዚ
ኦይኪዳ ጎሳ ኢዚ ꬋይሳና።
8 ሃይቆ ኢዚ ሜርናስ ሚታና፤
ኡባ ሃሪዛ ጎዳይ
ኣሳ ኡባ ኣይፌፔ
ኣፉንꬁ ቁጫና፤
ባ ዴራ ካዉሻቴꬅ
ቢታ ኡባፌ ዲጋና።
ሃይሳ ጎዳይ ሃሳይዴስ።
9 ሄ ጋላስ ኢስታስ፥ «ቤኢቴ
ኑ ጾሳይ ሃይሳ፤
ኑኒ ኢዛን ኣማኔቲዶስ፤
ኢዚካ ኑና ኣሺዴስ፤
ሃይሲ ጎዳ፤
ኑኒ ኢዛን ኣማኔቲዶስ፤
ኢዚ ኣሺዳይሳን ኡፋዬቶስ፤
ኡፋይሳን ሆምቦጮስ» ጋና።
ሞኣቤ ቃጻዬቴꬅ
10 ጎዳ ኩሼይ
ሃ ዙማ ቦላ ሼምፓና።
ጊዶ ኣቲን ኡቱላይ
ኡርቃን ዬꬌቲዛ ማላ
ሞኣቤይካ ዬꬌታና።
11 ሃꬃ ዋꬊዛይ
ባ ኩሼ ሚጪዛ ማላ
ኢዛ ጊዶን ዲዛይቲ
ባንታ ኩሼ ሚጫና፤
ጾሲ ኢስታ ጌኔ ኦሶ ባሌቶንታ
ኢስታ ኦቶሬቴꬃ ካዉሻና።
12 ኢስቲ ꬎቁ ሂስቲ ጊምቢዳ ጊምቤዛ
ኢዚ ዱጌ ዚቂ ሂስታና፤
ዱጌ ዎꬃና፤
ካዉሺዲ ዱጌ
ሳኣን ዎꬂዲ
ጉዱላ ቦላ ዬጋና።