26
ጋላታ ማዛሙሬ
1 ሄ ጋላስ ሃ ዬꬃይ ዩሁዳ ቢታን ዬጼታና።
ኑስ ሚኖ ካታማይ ዴስ፤
ጾሲ ኢዛ ጊምቤታኔ
ሚጻታ ኣቶቴꬃስ ኦꬂዴስ።
2 ባ ኣማኖ ናጊዳ፥
ጺሎ ካዎቴꬃቲ
ጌላና ማላ ፔንጌታ ዶይቴ።
3 ኔናን ኣማኔቲዳ ጊሻስ
ኔናን ዜምፒዳ ሼምፖዮ
ኔኒ ኩሜꬃ
ሳሮቴꬃን ናጋሳ።
4 ሜርናስ ጎዳን ኣማኔቲቴ፤
ጎዳይ ኑስ ሜርና ዛላ።
5 ꬎቃሶሆን ዲዛይታ
ዚቂ ኦꬃና፤
ꬎቁ ጊዳ ካታማ
ካዉሻና፤
ዱጌ ቢታን ኦላና፤
ጉዱላራ ዋላካና።
6 ቶሆን ዬꬌታና፤
ኡንኤቲዳይታ ቶሆይኔ
ማንቆታ ቶሆይ ኢዛ ዬꬋና።
7 ጺሎታ ኦጌይ ሞሌ።
ኔኖ ሱሬዞ፥
ኔኒ ጺሎታ ኦጌ ሞሊሳሳ።
8 ኣቤት ጎዳዉ!
ኔ ዎጋ ኦጌራ ሄሜቲሼ
ኑኒ ኔና ሂዶታ ኦꬂዶስ፤
ኔ ሱንꬂኔ ኔ ጊታቴꬂ
ኑ ዎዚናስ ኣሞ።
9 ታ ሼምፖያ
ኦማርሲ ኔና ላሞታዉስ፤
ታ ኣያናይ ማላዶ
ኔና ኮያዉስ፤
ኔ ፒርዳይ ቢታ ቦላ ዪዳ ዎዴ
ሳኣን ዴኢዛ ኣሳይ
ጺሎቴꬅ ታማሬስ።
10 ኢታ ኣሳታስ ኪያ ኦꬂኮካ፥
ኢስቲ ጺሎቴꬅ ታማሬቴና።
ሱሬ ቢታን ኢታ ኦꬄቴስ፤
ጎዳ ጊታቴꬃካ
ኣኬኬቴና።
11 ኣቤት ጎዳዉ!
ኔ ቄሴይ ꬎቁ ꬎቁ ጊዴስ።
ኢስቲ ጊዲኮ ቤኤቴና፤
ኔ ኣሳስ ኔ ሚሼቲዛይሳ
ቤኤቶኔ ዬላቴቶ፤
ኔ ሞርኬታስ ጊጊዳ
ታማይ ኢስታ ሞ። ኢብ 10፡27
12 ኣቤት ጎዳዉ!
ኔኒ ኑስ ሳሮቴꬅ
ዮች ኦꬃዳሳ፤
ኑ ኦሶ ኡባ ኔኒ ኦꬃዳሳ።
13 ኣቤት ጎዳዉ ኑ ጾሳዉ!
ኔፔ ሃራ ኣላጋ ጾሳቲ
ኑና ሃሪዳ፤
ኑኒ ጊዲኮ ኔ ሱንꬃ
ጻላ ቦንቾስ።
14 ኢስቲ ሃይቂዳ፤
ሲሚዲ ሼምፖራ
ፓጻ ዴኤቴና፤
ኢስታ ሼምፖይ ሲሚ ዬና፤
ኔኒ ኢስታ ቃጻያዳሳኔ
ꬋይሳዳሳ፤
ኢስታ ሃሳኢሲዛ ሚሽ ኡባ
ፒታ ꬋይሳዳሳ።
15 ኣቤት ጎዳዉ!
ኔኒ ካዎቴꬃ ዳርሳዳሳ፤
ኔኒ ዴራ ዳርሳዳሳ።
ኔኒ ቦንቼታዳሳ፤
ቢታ ዛዋ ኡባካ ኣሳዳሳ።
16 ኣቤት ጎዳዉ!
ኢስቲ ሜቶቲዳ ዎዴ ኔኮ ዪዳ፤
ኔኒ ኢስታ ሴሪዳ ዎዴ፥
ሳሱኪ ኔና ዎሴቴስ።
17 ኣቤት ጎዳዉ! ሻራ ማጫሲ
ሚጻን ሜቶቲዛ ማላኔ
ዋሲዛ ማላ
ኑኒካ ኔ ሲንꬃን
ሜቶቲዲ ዋሶስ።
18 ኑኒ ሻሪዶስ፤
ሚጻንካ ኡንኤቲዶስ፤
ጊዶ ኣቲን ጫርኮ ዬሊዶስ።
ኑኒ ሳኣስ ኣቶቴꬅ ኤሂቦኮ፤
ሳኣን ዲዛ ዴራካ ዬሊቦኮ።
19 ጊዶ ኣቲን ሃይቂዳ
ኔ ኣሳይ ፓጻና፤
ኢስታ ኣሃይካ ዴንዳና።
ኢንቴኖ ቢታ ጋርሳን ዲዛይቶ!
ዴንዲቴ ኡፋይሳን ዬጺቴ፤
ኔ ጻዛይ ቢታ ያኪሲዛ
ማላዶ ጻዛ ማላ
ሳኣይ ሚቲዳይታ ዛራ ጩታና። ዳኔ 12፡2
20 ታ ዴሬዞ! ባ ኔ ኬꬅ ጌላ፤
ኔ ፔንጌ ኔ ቦላ ጎርዳ፤
ኢዛ ሃንቆይ ኣꬋና ጋካናስ
ጉꬃ ዎዴስ ቆቴታሻ።
21 ቢታ ቦላን ዲዛ ኣሳ
ኢስታ ናጋራ ጊሻስ
ቃጻያናስ፥
ጎዳይ ባ ዴኢዛሶፔ ኬዚዲ ዬስ።
ቢታይካ ባ ቦላን ጉኪዳ
ሱꬃ ቆንጪሳና፤
ሃይቂዳይታካ
ሃይሳፌ ጉዬ ቆቱኩ።