28
ኤፍሬሜስ ኢሜቲዳ ሴራ
1 ኤፍሬሜን ዲዛ ማꬆቲዛይታስ፥
ኦቶሬቴꬃስ፥
ካላቻ ጊዲዳሪስ፥
ጪሊላ ሾባ ሁኤን
ኪፒ ጋ ኡቲዳ፥
ኢዛስ ቦንቾ ሴሎ ጊዲዳ
ሹላ ጪሻይስ፥
ዎይኔ ኡሻይ ኢስታ ዜሬꬃስ
ኦቶሬቴꬃስ ጊዲዳ ካታማይስ
ኣዬ ኣና!
2 ቤኢቴ፥ ጎዳስ ዎልቃማኔ
ሚኖ ጊዲዳ ኢሶይ ዴስ፤
ሄሲካ ሻቻ ኡሾ ማላ፥
ꬋይሲዛ ጎቴ ጫርኮ ማላ፥
ዎልቃማ ዳምባላ ማላኔ
ዎልቃማ ኢራ ማላ
ዎልቃን ኢዚ ኢዞ
ዱጌ ቢታን ዬጋና።
3 ማꬆቲዛ ኤፍሬሜ ኣሳታ
ኦቶሮ ካላቻይ
ቶሆን ዬꬌታና።
4 ጪሊላ ሾባ ሁኤን ኪፒ ጋ ኡቲዳ
ኢዛስ ቦንቾ ሴሎ ጊዲዳ
ሹላ ጪሻያ፥
ካꬃ ሺሾፔ
ሲንꬃን ጋኪን
ኣሲ ቤኢዳ ማላ ጹጲ ኤኪዲ
ሄራካ ሚቲዛ
ባላሴ ማላ ጊዳና።
5 ሄ ጋላስ ኡባፌ
ዎልቃማ ጎዳይ
ባ ኣሳፔ ጫሻ ኣቲዳይታስ
ቦንቾ ካላቻኔ
ፑላ ኣኪሊሌ ጊዳና።
6 ኢዚ ፒርዲዛይታስ
ሱሬ ፒርዳ ፒርዲዛ ኣያና
ኦላ ካታማ ፔንጌፌ ዛሪዛይታስ
ዎልቃ ጊዳና።
ማꬆቲዛ ዩሁዳ ናቤታኔ ቄሴታ፥
7 ሃይቲ ዎይኔ ኡሹ
ኡዪዲ ዪጮቴቴስ፤
ማꬆሲዛ ኡሻን
ጋንዲጋሬቴስ።
ቄሴቲኔ ናቤቲ ማꬆሲዛ
ኡሻን ጋንዲጋርዳ፤
ዎይኔ ኡሻ ጋሶን
ዮኦይ ኢስታፌ ባሌቲዴስ፤
ማꬆሲዛ ኡሻን ጋንዲጋርዳ፤
ኣጁታ ሊኬራ ቤኤቴና፤
ፒርዳ ፒርዲሼ ꬉጴቴቴስ።
8 ኢስታ ማዳ ኡባይ ጮሽ ጻላ፤
ጮሻን ሞሬቶንታሶይ
ዴና።
9 ኢስቲ፥ «ኢዚ ኦና ታማርሲዜ?
ኪታካ ኦስ ቆንጪሲዜ?
ማꬅ ኣጊዳ ናይታሴዬ
ꬋንꬃ ዱሶ ናይታሴ?
10 ኣዛዞ ቦላ ኣዛዞ፥ ኣዛዞ ቦላ ኣዛዞ
ዎጋ ቦላ ዎጋ፥
ዎጋ ቦላ ዎጋ፥
ሃንካ ጉꬃራ፥
ሄንካ ጉꬃራ
ኦꬄስ» ጋና።
11 ሂስቲኮ ሲንꬃፌ
ጾሳይ ኣላጋታ ቃላኒኔ
ኢማꬃታ ዶናን
ሃ ኣሳስ ሃሳያና።
12 ኢዚ ኢስታስ፥ «ሃና ሼምፖሶ፤
ዳቡርዳይ ሼምፖ፤
ሃና ሼምፖሶ»
ጊዳይ ኦናሴ?
ኢስቲ ጊዲኮ
ሲያና ኮዪቤቴና። 1ቆሮ 14፡21
13 ሄሳ ጊሻስ ጎዳ ቃላይ
ኢስቲ ቢዲ ጉዬ ኩንዳና ማላ፥
ማዱንጻና ማላኔ
ዎጺማዴን ኦይኬታና ማላ፥
ዲኤታና ማላ
ኣዛዞ ቦላ ኣዛዞ፥
ኣዛዞ ቦላ ኣዛዞ፥
ዎጋ ቦላ ዎጋ፥
ዎጋ ቦላ ዎጋ ጊዲዲ፥
ሃን ጉꬃራ፥
ሄን ጉꬃራ ሃናና።
ጺዮኔን ጉላ ሹች
14 ሄሳ ጊሻስ
ኢንቴኖ ዬሩሳላሜን
ዲዛ ኣሳ ሃሪዛ ቂልጪዛይቶ!
ጎዳ ቃላ ሲዪቴ።
15 ኢንቴ፥ «ኑኒ ሃይቆራ ጫቄቲዶስ፤
ዱፎራካ ሲጌቲዶስ፤
ዎርዶ ኑስ ዜምፖሶኔ
ቆቴቲዛሶ ኦꬂዶስ፤
ዎልቃማ ቦሻይ ፒቲ ኤኪ ቢሼ
ኑና ቦቻናስ ዳንዳዬና»
ጊ ኦቶሬቲዴታ።
16 ሄሳ ጊሻስ ኡባ
ሃሪዛ ጎዳይ፥
«ቤኢቴ! ታኒ ጺዮኔን
ፓጬቲዳ ሹች፥
ዮቻ ሹች፥
ሚኖ ዮቻስ ጊዲዛ
ቦንቼቲዳ ጉላ
ሹች ዎꬃና፤
ኢዛን ኣማኒዛይ ዬላቴና። ማዛ 118፡22-23፤ ኦሮ 9፡33፤ 10፡11፤ 1ጴጽ 2፡6
17 ታኒ ሱሬ ፒርዳ ዋꬋ ዎዶሮ፥
ጺሎቴꬂካ
ቱምቤ ማላ ኦꬃና፤
ኢንቴ ዎርዶ ዜምፖሶ ኦꬂዳይሳ
ሻቻ ኢራይ ሜጫና፤
ኢንቴ ቆቴቲ ኣቲዛሶዛካ
ሃꬂ ሚታና» ጌስ።
18 ኢንቴ ሃይቆራ ጫቄቲዳ
ጫቆይ ኣታና፤
ኢንቴ ዱፎራ ሲጌቲዳ
ሲጋይ ላሌታና፤
ዎልቃማ ቦሻይ ፒቲ ኤኪ ቢሼ
ኢንቴናካ ፒቲ ኤኪ ባና።
19 ኢዚ ዪዳ ዎዴ ዎዴ
ኢንቴና ኤኪ ባና፤
ማላዶ ማላዶ፥
ቃማኔ ጋላስ
ኢንቴና ፒቲ ኤፋና፤
ሃ ቃላ ኢንቴ ኣኬኪዛ ጊዲኮ
ሺሮ ቦላ ሺሮ ኤሃና።
20 ቶሆ ጮጎቲ ኢቾንታ ማላ
ሂጻይ ቃንꬃ፤
ጋꬂ ማይኣናስ
ኣፋላይካ ጉꬃ።
21 ጎዳይ ፓራጺሜ ዙማን
ኦꬂዳ ማላ፥
ባ ኦሶ፥ ባ ኢማꬃ ኦሶ፥
ሄሲካ ባ ኦራꬃ
ኦሶ ኦꬃናስ ዴንዳና።
ቃሴ ጌባኦኔ ዙሌን
ኦꬂዳ ማላካ ኦꬃና።ኢያ 10፡10-12፤ 2ሳሜ 5፡20፤ 1ታሪ 14፡11
22 ጎዳይ፥ ኡባፌ ዎልቃማ ጎዳይ
ኢዚ ቦሻ ቢታ ኡባ ቦላ
ኤሃናስ ኣዋጂዳይሳ
ታኒ ሲዪዳ ጊሻስ
ሃኢ ኢንቴ ቂልጪዛይሳ ኣጊቴ፤
ኣካይ ጊኮ ኢንቴ ቦላ
ቃሾይ ሚናና።
ጾሳ ኣꬎ ኤራቴꬅ
23 ኤዝጊዲ ታ ዮቲዛይሳ ሲዪቴ፤
ኣኬኪዲ ታ ቃላ ሲዪቴ።
24 ጎሻንቻይ ካꬅ ዜራናስ
ኡባ ዎዴ
ሄ ሶሆ ጎዪሼ ዴኢዜ?
ቃሴ ኢዚ ሄምኤ ሊቂሲሼኔ
ኡባቶ ፒጺሼ ዴኢዜ?
25 ጎሻ ሊቂሲዲ ኣሱታኔ
ኣኑጋ ዜሬኔ?
ጊስቴዛ ኢዛስ ጊጊዳሶሆን፥
ባንጋ ኢዛስ ጊጊዳሶሆን
ኣርዳ ኢዛስ
ጊጊዳሶሆን ዜሬኔ?
26 ኢዛ ጾሳይ ኢዛ ታማርሴስ፤
ሱሬ ኦጌካ ኢዛ ቤሴስ።
27 ኣሱታይ ሎዳን ቡኬቴና፤
ኣኑጋይ ፓራ-ጋሬን ቡኬቴና፤
ኣሱታይ ጉፌን፥
ኣኑጋይ ቄሪ ሎዳን ቡኬቴስ።
28 ሶሎ ኡካናስ
ካꬂ ጋጬቴስ፤
ሄሳ ጊሻስ ኢሲ ኣሲ
ሜርናስ ካꬅ ቡኬና፤
ካꬅ ቡኪዛ ፓራ-ጋሬታ
ኢዛ ቦላራ ላጊኮካ
ካꬃ ጋጬቴና።
29 ሃይሲ ኡባይ ባ ዞሬን ማላሊሲዛዝ፥
ባ ኣꬎ ኤራቴꬃን
ማላሊሲዛዝ ጊዲዳ
ኡባፌ ዎልቃማ
ጎዳፔ ሃኔስ።