29
ዳዊቴ ካታማስ ኣዬ ኣና
1 ሃኔ ዳዊቲ ኔናን ዴኢዳ
ኣርኤሌ ካታማዬ!*ኢብራዌታ ቃላራ ኣርኤሌ ጉሲ ጾሳ ያርሾሶሆ ጉሳ።
ኔና ኣዬ ኣና!
ላይꬃ ቦላ ላይꬅ ጉጃ፤
ባኣሌታካ ዛራ
ዛራዳ ቦንቻ።
2 ጊዶ ኣቲን ታኒ
ኣርኤሌ ካታማዮ ጊዶꬃና፤
ኢዛ ዬካናኔ ዋሳና፤
ኢዛ ታስ ያርሾ
ያርሺዛሶ ጊዳና።
3 ታኒ ኔ ዩሾን ዱንካናና፤
ታ ኔ ዩሾን ጊምቤ
ዩሻ ኣꬃና፤
ኔ ዩሾን ሻኮ ኦꬃዳ
ታ ኔና ኡንኤꬃና።
4 ኔኒ ዱጌ ዎꬋና፤
ቢታ ጋርሳፌ ፑዴ ሃሳያና፤
ኔ ሃሳያይ ጉዱላ
ጊዶፌ ኬዛና፤
ኔ ጬንጉርሲ
ሞይቲሌ ጬንጉርሳ ማላ
ቢታ ጋርሳፌ ፑዴ ኬዛና፤
ኔ ሃሳያይካ
ጉዱላ ጊዶፌ ሳሱኬታና።
5 ጊዶ ኣቲን ዳሮ ኔ ሞርኬቲ
ጉዱላ ሱላ ማላ፥
ሜንጼ ኢታቲ ጫርኮን ቢዛ
ሃፓ ማላ ጊዳና፤
ቆፋይ ባይንዳ ዲሺን፥
6 ኡባፌ ዎልቃማ
ጎዳይ ዳዳን፥
ቢታ ቃꬃን፥
ጊታ ጬንጉርሳን፥
ጎቴ ጫርኮኒኔ ዎልቃማ
ኣባ ዳምባላን
ኡባ ሚዛ ታማ ላጮን ያና።
7 ኣርኤሌ ኦሊዛ ካዎቴꬃታ
ኡባ ዉዴይ
ኢዚ ቦላኔ ኢዚ ሻኮ ቦላ
ዳፋ ዬጊዛይቲኔ ዶዲዛይቲ፥
ኣጉሞ ማላኔ ኦማርስ ቤቲዛ
ኣጁታ ማላ ጊዳና።
8 ጋፊዳ ኣሲ ኣጉሞራ ሚሼ ኣቄስ፤
ጊዶ ኣቲን ኢዚ
ꬊስኮፌ ዴንዲሺን
ጋፋይ ኣጎንታይሳ ማላ፥
ሳሜቲዳ ኣሲ
ኣጉሞራ ኡዪሼ ኣቄስ፤
ጊዶ ኣቲን ቤጊሺን
ዳቡራይኔ ሳሞይ
ኢዛ ኣጎንታይሳ ማላ
ጺዮኔ ዙማ ኦሊዛ
ካዎቴꬃታ ኡባ ዉዴይ
ሄሳꬆ ሃናና።
ጾሳ ኣዛዞ ኢጾይ ኤሂዛ ቂጻቴ
9 ዳማቲዲ ማላሌቲቴ፤
ኢንቴና ኢንቴርካ ቆቂሲዲ
ቆቄ ጊዲቴ።
ጊዶ ኣቲን ዎይኔ ኡሹ
ኡዮንታ ጮ ማꬆቲቴ፤
ማꬆሲዛ ኡሹ ኡዮንታ
ዲሼ ጋንዲጋርቴ።
10 ጎዳይ ኢንቴ ቦላ ዎልቃማ
ꬊስኮ ዬጊዴስ፤
ኢንቴ ናቤታ ኣይፌ ጎዚዴስ፤
ኣጁታ ቤኢዛይታ
ሁኤ ጉሉንቲሲዴስ። ኦሮ 11፡8
11 ሃ ኣጁታይ ኢስታስ ጻꬃ ማጻፋ ጊዶን ጎርዴቲ ዲዛ ቃላ ማላ ጊዲዴስ። ሃ ጻꬃ ማጻፋ ናባባናስ ዳንዳይዛ ኣሲ፥ «ሾቤ ኑስ ናባባ» ጊዲ ኢንቴ ኢሚኮ፥ ኢዚ ኢንቴስ፥ «ጎርዴቲዳ ጊሻስ ታኒ ናባባናስ ዳንዳይኬ» ጋና። 12 ቃሴ ጻꬃ ማጻፋ ናባቦ ዳንዳዮንታ ኣሳስ፥ «ሾቤ ኑስ ናባባ» ጊዲ ኢንቴ ኢዛስ ኢሚኮ ኢዚ ኢንቴስ፥ «ታ ናባቦ ዳንዳይኬ» ጋና።
13 ጎዳይ፥
«ሃይሲ ዴሬይ ዶናን ጻላ
ታኮ ሺቄስ፤
ባ ሜቴርሻን ጻላ
ታና ቦንቼስ፤
ጊዶ ኣቲን ኢዛ ዎዚናይ
ታፔ ሃኮን ዴስ።
ኢስቲ ኣሲ ታማርሲዳኔ
ኣሲ ዎꬂዳ ዎጋን
ታስ ጎይኔቴስ። ማቶ 15፡8-9፤ ማር 7፡6-7
14 ሄሳ ጊሻስ ታኒ ሃ ኣሳ ቦላ
ማላሊሲዛ ሚሻ ቦላ
ማላሊሲዛ ሚሽ ኦꬃሼ
ዛራ ዛራ ኢስታ ማላሊሳና፤
ኣꬎ ኤራንቻታ
ኤራቴꬂ ꬋያና፤
ኣኬካንቻታ ኣኬካይካ
ፔንቲ ባና» ጊዴስ። 1ቆሮ 1፡19
ሲንꬃፌ ያና ሂዶታ
15 ባንታ ሃልቾ
ጎዳፔ ጌንꬃናስ
ዱጌ ጪማ ኦላን
ዎꬊዛይታስ
ባንታ ኦሶ ꬉማን
ኦꬂዛይታስ
«ኑና ኦኒ ቤኣኔ?
ኑና ኦኒ ኤራኔ?»
ጊዛይታስ ኣዬ ኣና!
16 ኢንቴ ዮኦታ ላሚ ዬጌታ፤
ማናታ ኡርቃ ማላ ጼሌታ!
ሜꬌቲዳይሲ
ሜꬊዳይሳ፥
«ኢዚ ታና ሜꬊቤና» ጊዜ?
ማና ሚሺ ባና ሜꬊዳይሳ፥
«ኢዚ ኣይኮካ ኤሬና» ጊዜ?ኢሳ 45፡9
17 ሊባኖሴይ ላሜቲዲ
ኣራዳ ጋዴ ጊዳናስ፥
ኣራዳ ቢታይ ላሜቲዲ
ዎራ ጊዳናስ
ጉꬃ ዎዴይ
ኣቲዴስ ጊዴኔ?
18 ሄ ጋላስ ቱሌይ
ጻꬃ ማጻፋ ቃላ ሲያና፤
ቆቄ ኣይፌቲካ ሻሩማፔኔ
ꬉማፔ ሻኬቲዲ ጼላና።
19 ኣሽኬቲ ጎዳን፥
ሂዬሳቲ ኢስራኤሌ ጌሻን
ዛሪ ዛሪ ኡፋዬታና።
20 ሜንጼ ኢታቲ ኡባይ ዉራና፤
ቂልጪዛይቲ ቲምኢ ጋና፤
ኢታ ኦꬃናስ
ዛማዲ ኡቲዳይቲ ꬋያና።
21 ኣስ ዮኦን ሞራንቻ ኬሲዛይቲ፥
ሺሎታን ሞቴቲዛይሳ ቦላ
ዎጺማዴ ዋጺዛይቲ፥
ዎርዶ ማርካን ቱማቴꬃ
ጺሎታፔ ቦንቂዛይቲ ꬋያና።
22 ሄሳ ጊሻስ ኣብራሃሜ ዎዚዳ
ጎዳይ ያቆቤሶስ፥
«ያቆቤይ ሃይሳፌ
ጉዬ ዬላቴና፤
ኢዛ ሲንꬂካ ላሜቴና።
23 ባንታ ጊዶን ታ ኩሼ ኦሶ ጊዲዳ
ባንታ ናይታ ቤኢሼ
ታ ሱንꬃ
ጌሻቴꬃን ናጋና፤
ኢስቲ ያቆቤ ጌሻዛ
ጌሻቴꬅ ኤራና፤
ኢስራኤሌ ጾሳ ሲንꬃን
ያሻቴꬃን ኤቃና።
24 ኣያናን ባሊዳይቲ
ሲሚዲ ኣኬካና፤
ዙዙሚዛይቲካ
ቲሚርቴ ኤካና» ጌስ።