33
ማዶ ዴማናስ ዎሲዳ ዎሳ
1 ኔስ ꬋዮንታ ዳሼ
ሃራ ꬋይሲዛይሶ!
ኔስ ኣዬ ኣና!
ኔና ኣꬂ ኢሞንታ ዲሺን
ሃራ ኣꬃ ኢሚዛይሶ!
ኔስ ኣዬ ኣና!
ኔኒ ꬋይሶ ኣጊዳ ዎዴ
ኔ ꬋያና፤
ኔኒ ኣꬃ ኢሞ ኣጊዳ ዎዴ
ኔና ኣꬂ ኢማና።
2 ኣቤት ጎዳዉ! ኑና ማራ፤
ኑኒ ኔና ሂዶታ ኦꬂዶስ፤
ማላዶ ማላዶ ኑስ
ዎልቃ ጊዳ፤
ሜቶ ዎዴካ
ኑና ኣሺዛዴ ጊዳ።
3 ኔ ጬንጉርሳይ ዳዳ ማላ
ጉሚዛ ዎዴ ዴሬይ ባቃቴስ፤
ኔኒ ዴንዳ ኤቂዛ ዎዴ
ካዎቴꬃቲ ላሌቴቴስ።
4 ካዎቴꬃቶ!
ቦሌይ ሺቂዛ ማላ
ኢንቴፌ ዲኤቲዳይሲ ሺቃና፤
ጉምባሮይ ጉፒዛ ማላ
ኣሳይ ኢዛ ቦላ ዲርባታና።
5 ጎዳይ ቦላ ሳሎን ዴኢዛ ጊሻስ፥
ꬎቁ ꬎቁ ጊዴስ፤
ኢዚ ጺዮኖ ሱሬ ፒርዳኒኔ
ጺሎቴꬃን ኩንꬃና።
6 ኢዚ ኔ ዲዛ ላይꬅ ኡባን
ኣማንꬂዛ ዮች፥
ኣቶቴꬅ፥ ኣꬎ ኤራቴꬂኔ
ኤራቴꬅ ጊዳና፤
ጎዳስ ያሻቴꬂ
ሃይሳ ሃ ኣቆታታስ
ቁልፔ ጊዳና።
7 ቤኢቴ፥ ኢስታ ጎባ ኣሳቲ
ኦጌታን ዋሴቴስ፤
ሲጋቴꬃስ ኪቴቲዳይቲካ
ጫሞ ዬሆ ዬኬቴስ።
8 ዎጋ ኦጌቲ ሳሚዳ፤
ኦጌራ ካንꬂዛይ ዴና።
ቃቺዳ ቃላይ ላሌቲዴስ፤
ዞሪዛይቲ ካꬌቲዳ፤
ቦንቼቲዛይካ ዴና።
9 ቢታያ ዬካዱሲኔ ጊልቃዱስ፤
ሊባኖሴይ ዬላቲዲ ሹሊዴስ፤
ላሻሮኔይ ኣራቤ ማላ
ባዞ ጊዳዱስ፤
ባሳኔይኔ ቃርሜሎሴይ
ባንታ ሃይꬅ ቆቆፊዳ።
ጾሳ ኢጺዛይታስ ኢሜቲዳ ሴራ
10 ጎዳይ ካዎቴꬃታሲ፥
«ሃኢ ታኒ ዴንዳና፤
ሃኢ ታኒ ቦንቼታና፤
ሃኢ ታኒ ꬎቁ ꬎቁ ጋና።
11 ኢንቴ ኡቱላ ሻሪዲ ሱላ ዬሊዴታ።
ኢንቴ ሼምፒዛ ሼምፖይ
ኢንቴና ሚዛ ታማ።
12 ዴሬይ ቦቂንታ ኬዚዛ ሹቻ ማላ
ታማን ጹጌታና፤
ቃሴካ ኣጉንꬃ ቱሻ ማላ
ታማን ኤጻና።
13 ኢንቴኖ ሃኮን ዴኢዛይቶ!
ታኒ ኦꬂዳይሳ ሲዪቴ፤
ማታን ዲዛይቶ!
ታ ዎልቃ ኤሪቴ» ጌስ።
14 ጺዮኔን ዲዛ
ናጋራንቻቲ ዳጋሚዳ፤
ጾሲ ኢስታስ ባይንዳይቲ ባቢዲ፥
«ኑ ጋርሳፌ ጹጊዛ ታማራ
ዳና ዳንዳይዛይ ኦኔ?
ሜርና ታማራ
ዳና ዳንዳይዛይ ኦኔ?» ጊዳ።
15 ጺሎቴꬃን ሄሜቲዛይ፥
ሱሬ ሃሳይዛይ፥
ባሌꬆን ቤቲዛ
ዎꬌ ካꬊዛይ፥
ጉቦ ኤኬናፔ
ባ ኩሼ ሺሺ ኤኪዛይ፥
ኣስ ዎꬋና ዙፔቲዛይታ ዞሬ
ሲያናፔ ባ ሃይꬅ ቱጪዛይ፥
ኢታ ቤያናፔ
ባ ኣይፌ ቂሊምኢዛይ፥
16 ሄሳዴይ ꬎቃሶሆን ዳና፤
ዙማ ሚጻይ ኢዛስ ሺቂ
ኣቲዛሶ ጊዳና፤
ኢዛስ ቁማይ ኢሜታና፤
ሃꬂካ ኢዛስ ፓጬና።
ቦንቾይ ኩሚዳ ሲንꬃራ ያና ላይꬅ
17 ኔ ኣይፌቲ ካዎዛ ፑላቴꬅ ቤኣና፤
ሃኮን ሚጬቲ ዲዛ
ቢታካ ቤኣና።
18 ቤኒ ዋዬይ ኔስ ቆፌቲሺን ኔኒ፥
«ዋና ሃላቃዚ ኣዋ ቢዴ?
ጊራ ኤኪዛይሲ ኣዋ ቢዴ?
ሻኮዛ ኣላፌዚ
ኣዋን ዲዜ» ጋና።
19 ሄይታንቲ ቃꬌታይ ባይንዳ ኣሳ፤
ኢስታ ሃሳያይ
ኣሳስ ጌሎንታይታኔ
ኢስታ ኢንጻርሲ ዴዶቲዛይታ፤
ሃይሳፌ ጉዬ
ኢንቴ ኢስታ ቤዬኬታ።
20 ኑ ባኣሌታ ኢዚን ቦንቺዛ
ጺዮኔ ካታማዮ ቤኢቴ!
ሳሮን ዲዛሶሆዮ፥
ቃጾንታ ዱንካኔ ጊዲዳሮ፥
ኢዚ ቶሌይ ሾዴቶንታሮ፥
ኢዚ ዎዶሮታፔ
ኢሲናካ ዱጾንታሮ
ዬሩሳላሜ ካታማዮ
ኔ ኣይፌይ ቤኣና።
21 ሄን ጎዳይ ኑስ ዎልቃ ጊዳና፤
ሄ ሶሆይ ዳልጋ ሻፋኔ
ካንቼ ጊዳና፤
ዎጎሎይ ኢዛ ቦላራ
ባናስ ዳንዳዬና፤
ጊታ ማርካቤቲካ
ኢዛ ቦላራ ቤቴና።
22 ጎዳይ ኑስ ፒርዲዛ ዳና፤
ጎዳይ ኑስ ዎጋ ኢሚዛዴ፤
ጎዳይ ኑስ ካዎ፤
ኑና ኣሻናይካ ኢዛ።
23 ኔ ቶሌ ዎዶሮይ ሌፒዴስ፤
ቱሳይ ሚኒ ኤቂቤና፤
ሻራዚ ቶሌቲቤና፤
ሄ ዎዴ ዲኤቲዳ
ጊታ ሚሺ ጊሼታና፤
ዎቤይካ ኣቶንታ ዲኦ ኤካና።
24 ጺዮኔን ዲሼ፥ «ታ ሳኬታዲስ»
ጋና ኣሲ ዴና፤
ሄን ዴኢዛ ኣሳታ ናጋራይ
ኣቶ ጌቴታና።