ጌሻ ማጻፋ ኢሳያሳ ቲንቢቴ 34

34

ዴሬ ቦላ ያና ፒርዳ

1 ኢንቴኖ ካዎቴꬃቶ ሺቂዲ ሲዪቴ!

ኔኒ ዴሬዚ ኣኬካ!

ቢታይኔ ቢታን ዲዛ ኡባይ፥

ኣላሜይኔ ኣላሜፔ ዪዳ

ኡባይ ሲዮ!

2 ጎዳይ ካዎቴꬅ ኡባ ሃንቄቲዴስ፤

ኢዛ ሃንቆይካ ኢዛ ኦላንቻታ

ኡባ ቦላና።

ኢዚ ኢስታ ሙሌራ ꬋይሳና፤

ሹካስካ ኣꬂ ኢማና።

3 ኢስታፌ ሃይቂዳይቲ ካሬ ኦሌታና፤

ኢስታ ኣሃይ ጺንቃና።

ዙማቲ ሱꬅ ጻላ ጊዳና።

4 ሳሎ ጾሊንቴቲ ኡባይ ሴራና፤

ሳሎይ ጋልባ ማላ ጻጼታና፤

ጮራ ጾሊንቴቲ ኡባይ ሹሊዲ

ቆቆፌቲዛ

ዎይኔ ሃይꬃ ማላኔ

ሜሊዲ ሳኣን ዎꬊዛ

ባላሴ ሃይꬃ ማላ ጊዳና።

5 ታ ጊꬃ ማሻይ

ሳሎታ ጊዶን

ባስ ጊዳና ጋካናስ ኡያዱስ፤

ቤኢቴ፤ ኤዶሜ ቦላ፥

ታኒ ቃንጊዳ ኣሳ ቦላ

ፒርዳናስ ዎꬋዱስ።

6 ጎዳ ጊꬃ ማሻይ

ሱꬅ ማይኣዱስ፤

ሞꬎካ ካላዱስ፤

ዶርሳ ላቃ ሱꬃኒኔ

ዴይሻ ሱꬃን ጎዜታዱስ፤

ꬋርሾ ኪላሆ

ሞꬌን ጎዜታዱስ፤

ጎዳይ ቦጺራ ካታማን ያርሾ፥

ኤዶሜን ዎልቃማ ሹካ

ጊግሲዳ ጊሻሳ።

7 ቃሴ ኢስታራ ሜንꬂ፥

ኮርማይ ዎፋኖራ ኢሲፌ ኩንዳና፤

ቢታያ ሱꬃን ጫጳና፤

ኢስታ ቢታይ ሞꬎን ኣራዳና።

8 ሄሲካ ጎዳይ

ሃሎ ኬሲዛ ጋላሲኔ

ጺዮኔ ጊሻስ

ሞርኬታ ኦሊዛ ላይꬅ ጊዳና።

9 ኤዶሜ ካንቼቲ ሺዳ ጊዳና፤

ኢዚ ቢታይ ጹጌቲዛ

ዲኔ ጊዳና፤

ኢዚ ቢታይ ሺዳ ማላ ኤጻና።

10 ኢዞ ሚዛ ታማይ

ቃማኔ ጋላስ ቶኤና፤

ጩዋይካ ሜርናስ ቱሉ ጋና፤

ዬሌታፔ ዬሌታ ጋካናስ

ካይስ ጊዳና።

ኦኒካ ናምኣንꬆ

ሄራ ኣꬌና።

11 ጺሎይኔ ቁጻርሲ ኢዞ ላታና፤

ጉቶይኔ ቁሮይ

ኢዚን ኬꬅ ኬጻና፤

ጾሲ ኤዶሜ ቦላ

ኢዞ ላላና ዎዶሮኔ

ኢዞ ꬋይሳና ቱምቤ ዬዳና።

12 ኢዚ ዳናቲ

ካዎ ጌቴቲ ጼይጌታናስ

ዳንዳይዛ ሚሺ ዴና፤

ኢዚ ሃላቃቲ

ሙሌራ ፒቴቲ ꬋያና።

13 ጊምቤቲ ዩዪዳ ካታማታ፥

ኢዚ ሚጻታ ዶዮይኔ

ኦካይ ላታና፤

ዎራካናታ ኦላኔ

ጉቶታ ዱሳሶ ጊዳና።

14 ባዞ ዶኣቲ ጎዳሬታራ

ኢሲፌ ዳና፤

ባዞ ዴይሽ ሚሳቲዛ

ዳይዳንꬃቲ

ባንታ ጊዶን ጼይጌታና፤

ኦማርሳ ሜꬌታቲ

ሄን ሼምፓና፤

ባንታስ ዱሳሶ ሄን ዴማና።

15 ጉቶይ ሄ ኬꬃን

ጱጱሌታ ዬጋና፤

ዛራዳካ ጱቂሳና፤

ባ ጪዬታካ ሃጳና፤

ዎሌቲ ዋꬃን ዋꬃን

ሄን ሺቃና።

16 ጎዳ ማጻፋን ጼሊቴ፤ ናባቢቴ።

ሃይታፔ ኢሶይካ ፓጬና፤

ኢሶይ ኢሶይ ባስ

ዋꬃ ላጌ ꬋዬና፤

ሃይሲ ሃ ኣዛዞዚ

ኢዛ ዶናፔ ኬዚዴስ፤

ኢዛ ኣያናይ ኢስታ

ኢሲ ቦላ ሺሻና።

17 ኢስታ ጊሻ ጊሻ ኢስታስ ዎꬃና፤

ኢዛ ኩሼይ ሜዛኔን

ሜዛኔን ጊሻና፤

ኢዛ ሜርናስ ኢስታስ ጊዳና፤

ዬሌታፔ ዬሌታ ጋካናስ

ኢስቲ ኢዚን ዴኣና።

34:5 ኢሳ 63፡1-6፤ ኤር 49፡7-22፤ ሂዚ 25፡12-14፤ 35፡1-15፤ ኣሞ 1፡11-12፤ ኣብ 1-14፤ ሚል 1፡2-5

34:10 ኣጁ 14፡11፤ 19፡3