35
ዎዜቲዳ ዴሬ ኡፋይስ
1 ባዞይኔ ሜላ ቢታይ ኡፋዬታና፤
ኣይኮይ ባይንዳ
ባዞይ ኡፋዬታና፤
ጪሻ ማላካ ጪያና።
2 ኢዚ ዳሮ ኡፋዬታናኔ ሚጫና፤
ሊባኖሴ ቦንቾይ
ኢዛስ ኢሜታና፤
ቃርሜሎሴኔ ላሻሮኔ
ቴማ ኢዚ ማይኣና፤
ኑ ጎዳ ቦንቾኔ
ጾሳ ጊታቴꬃ ኢስቲ ቤኣና።
3 ዳቡርዳ ቄሴታ ሚንꬂቴ፤
ኣርጋጪዳ ጉልባታታ ሚንꬂቴ።ኢብ 12፡12
4 ዎዚናን ያሻይ ዲዛይታ
«ሚኒቴ! ያዮፍቴ!
ኢንቴ ጾሲ ዪዲ ሃሎ ኬሳና፤
ኢዚ ኢንቴና ኣሻናሲኔ
ሃሎ ኬሳናስ ያና» ጊቴ።
5 ሄ ዎዴ ቆቄታ ኣይፌይ ጼላና፤
ቱሌታ ሃይꬂ ሲያና።
6 ዎቤይ ጌኔሳ ማላ ጉፓና፤
ዱዴ ዶናይ ኡፋይሳን ዬጻና፤
ባዞፌ ሃꬂ ኬዛና፤
ፑልቶይ ባዞ ቢታፌ ፑልታና። ማቶ 11፡5፤ ሉቃ 7፡22
7 ጹጊዛ ቢታን
ኤሌ ሃꬂ ኩማና፤
ሜላ ቢታቲ ሃꬅ ፑልታና፤
ዎራካናቲ ኣቂዛ ኦላን
ማታይ፥ ማቃይኔ
ሻጫይ ሞካና።
8 ሄን ዎጋ ኦጌይ ኦሴታና፤
ኢዚካ፥ «ጌሻቴꬃ
ኦጌ» ጌቴታና።
ቱናቲ ሄ ኦጌራ ቤቴና፤
ኦጌዚ ሄ ኦጌራ ቢዛይታስ
ጻላ ጊዳና፤
ጌላቲ ሄ ኦጋራ
ባና ዳንዳዬቴና።
9 ሄን ጋሞይ ዴኤና፤
ዳፊ ሚዛ ዶኣይካ ኢዛን ኬዜና፤
ሄይታንቲ ሄን ቤቴቴና፤
ዎዜቲዳይቲ ጻላ ሄራ ባና።
10 ጎዳይ ማዲዳይቲ ሲማና፤
ኢስቲ ዬጺሼ ጺዮኔ ጌላና፤
ሜርና ኡፋይሳ
ካላቻ ማላ ጎጻና፤
ኢንጄኔ ኡፋይስ ዴማና፤
ጬጬይኔ ካዮይ
ሄፔ ባቃታና።