1 ሄ ዎዴ ባቢሎኔ ካዎይ ባሊዳኔ ና፥ ማሮዶኬ-ባልዳኔይ ሂዝቂያሲ ሃርጊ ፓጺዳ ጊሻስ ዳብዳቤኔ ኢሞታ ኢዛስ ዬዲዴስ። 2 ሂዝቂያሲ ኪቴቲዳይታ ኡፋይሳን ሞኪ ኤኪዴስ፤ ሂስቲዲ ካዎ ሚንጃ ኬꬃን ዲዛ ቢራ፥ ዎርቃ፥ ዱማ ዱማ ሳዎታ፥ ዶሬቲዳ ዛይቴ፥ ቃሴ ኦላ ሚሻ፥ ኢዛስ ዲዛ ሚሽ ኡባ ኢሲኖካ ኣሾንታ ዲሼ ቤሲዴስ። ኢዛ ሚንጃ ኬꬃን ዲዛ ሚሽ ጊዲን ኢዛ ካዎቴꬃ ጋርሳን ዲዛ ሚሽ ኡባ ቤሶንታ ኣሺዳ ሚሺ ዴና።

3 ሄሳፌ ጉዬ ናቤ ኢሳያሲ ካዎ ሂዝቂያሳኮ ዪዲ፥ «ሃ ኣሳቲ ኔና ኣይ ጊዶ? ኢስቲ ኔኮ ኣዋፔ ዪዶ?» ጊ ኦይቺዴስ።

ሂዝቂያሲካ ዛሪዲ ኢዛስ፥ «ሃ ኣሳቲ ታኮ ሃኮ ቢታፌ ባቢሎኔፔ ዪዳ» ጊዴስ።

4 ኢሳያሲ ቃሴካ፥ «ኔ ካዎቴꬃ ኬꬃፌ ኣይ ቤኢዶ?» ጊዴስ።

ሂዝቂያሲ፥ «ታ ካዎቴꬃ ኬꬃን ዲዛ ኡባ ቤኢዳ፤ ታ ቤሶንታ ኣሺዳ ኢሲ ሚሺካ ዴና» ጊዴስ።

5 ሄሳፌ ጉዬ ኢሳያሲ ሂዝቂያሳስ፥ «ኡባፌ ዎልቃማ ጎዳይ ጊዛይሳ ሲያ፤ 6 ‹ኔ ካዎቴꬃ ኬꬃን ዲዛ ኡባይ፥ ካሴ ኔ ኣዋቲ ሃች ጋካናስ ሺሺዳ ኡባይ ዲኤቲዲ ባቢሎኔ ባና ዎዴይ ያና፤ ኢሲኖካ ኣሾንታ ማጺ ኤፊዛ ዎዴይ ያና› ጌስ ጎዳይ። 7 ኔፔ ዬሌቲዳይቲኔ ኔ ዜሬꬃፌ ዬሌቲዳይቲ ዲኤቲ ቢዲ ባቢሎኔ ካዎ ኬꬃን ጉንዱላ ጊዲዲ ኦꬃና» ጊዴስ። ዳኔ 1፡1-7፤ 2ካዎ 24፡10-16፤ 2ታሪ 36፡10

8 ሂዝቂያሲ ዛሪዲ፥ «ኔኒ ዮቲዳ ጎዳ ቃላይ ሎኦ» ጊዴስ። ሂዝቂያሲ፥ «ታኒ ዴኢዳ ላይꬃን ታስ ሳሮኔ ዎፓ ጊዶ» ጊ ቆፒዳ ጊሻሳ።