40
ጾሳ ዴሬ ሚንꬄꬂዛ ቃላ
1 ኢንቴ ጾሳይ፥
«ሚንꬄꬂቴ!
ታ ዴሬዛ ሚንꬄꬂቴ!
2 ዬሩሳላሜስካ ሹጎ
ቃላራ ዮቲቴ፤
ኢዚስ ኣዋጂቴ፤
ኢዛ ኣይሌቴꬃን
ኦꬂዛ ዎዴይ ዉሪዴስ፤
ኢዚ ናጋራ ዋጋይ ጪጌቲዴስ፤
ኢዛ ባ ናጋራ ኡባ ጊሻስ
ጎዳፔ ናምኡ ኩሼ
ቂጻቴ ኤካዱስ» ጌስ።
3 ኣዋጃ ዮቲዛዴ ጬንጉርሲ፥
«ባዞን ጎዳ ኦጌ ጊግሲቴ፤
ኑ ጾሳስ ኣራባ ባዞን
ኣኮ ኦጌ ጊግሲቴ። ማቶ 3፡3፤ ማር 1፡3፤ ዮሃ 1፡23
4 ሾባይ ኡባይ ፑዴ ꬎቁ ጋና፤
ዙማይኔ ዙምቡላይ ዚቂ ጋና፤
ኩንዱኩርጮ ቢታይ
ኢሲ ጊና ጊዳና፤
ኩርፖቲ ዴምባ ጊዳና።
5 ሄ ዎዴ ጎዳ
ቦንቾይ ቆንጫና፤
ኣሾ ማይኢዳ ኡባይ
ሄሳ ሃሳይዴስ» ጌስ። ሉቃ 3፡4-6
6 ጬንጉርሲ ታና፥
«ዋሳ!» ጊዴስ።
ታኒካ፥ «ኣይ ጋ ዋሶ?» ጋዲስ።
ኢዚካ፥ «ኣሲ ኡባይ ማታ ማላ፤
ኢዛ ቦንቾ ኡባይካ
ዴምባ ጪሻ ማላ።
7 ጎዳይ ባ ሼምፖ
ኢዛ ቦላን ሼምፒሺን
ማታይ ሜሌስ፤
ጪሺካ ቆኬስ፤
ቱማፔ ዴሬይ ማታ ማላ።
8 ማታይ ሜሌስ፤
ጪሻይካ ቆኬስ፤
ጊዶ ኣቲን ኑ ጾሳ ቃላይ
ሜርናስ ሚኒ ዴስ»
ጋዳ ዋሳ ጊዴስ። ያቆ 1፡10-11፤ 1ጴጽ 1፡24-25
9 ኔኖ ሚሺራቾ
ጺዮኔስ ዮቲዛይሶ፥
ꬎቃ ዙማ ቦላ ኬዛ፤
ኔኖ ሚሺራቾ
ዬሩሳላሜስ ዮቲዛይሶ፥
ኔ ጬንጉርሳ
ꬎቁ ሂስታ ዋሳ፤
ꬎቁ ሂስታ፥ ባቦፋ፤
ዩሁዳ ካታማታስ፥
«ሄኮ ኢንቴ ጾሳ»
ጋዳ ዮታ።
10 ሄኮ ኡባ ሃሪዛ ጎዳይ
ዎልቃራ ዬስ፤
ኢዛ ቄሴይ ኢዛ ጊሻስ ሃራና።
ቤኢቴ ኢዛ ዎይቶይ ኢዛራ ዴስ፤
ኢዚ ጪጋና ኦሶ ዋጋይካ
ኢዛራ ዴስ። ኢሳ 62፡11፤ ኣጁ 22፡12
11 ኢዚ ባ ዉዴ
ሄንꬃንቻ ማላ ሄሜስ፤
ባ ላቃታካ
ባ ቄሴን ቶኬስ፤
ባ ኪኦንካ ኢዲሜስ፤
ꬋንꬂዛይታካ
ሎዳራ ካሌꬄስ።ሂዚ 34፡15፤ ዮሃ 10፡11
12 ሃꬃታ ባ ኩሼ
ኩጴን ማኪዳይ፥
ሳሎታ ታꬋኪዳይ፥
ባና ዳቾን
ማኪ ኦይኪዳይ፥
ዙማታ ባ ሜዛኔን፥
ዙምቡላታካ ሜዛኔን ዎꬂዳይ ኦኔ?
13 ጎዳ ኣያና ሻኪ ኤሪዳይ፥
ኢዛ ዞሪዛዴ ጊዲ
ታማርሲዳይ ኦኔ?ኦሮ 11፡34፤ 1ቆሮ 2፡16
14 ኤራቴꬅ ዴማናስ ጎዳይ
ኦና ዞሬ ኦይቺዴ?
ሱሬ ኦጌ ኢዛ ታማርሲዳይ ኦኔ?
ኤራቴꬅ ኢዛ ታማርሲዳይ፥
ኣኬካ ኦጌካ ኢዛ ቤሲዳይ ኦኔ?
15 ቤኢቴ ካዎቴꬃቲ ጎምቦ ጊዶን
ጾኪዳ ሃꬃ ማላ፤
ኢስቲ ሜዛኔ ቦላ ዲዛ
ጉዱላ ማላ ቆዴቴቴስ፤
ሃሩሮታ ሊቆ
ቢታ ማላ ጌዳሬስ።
16 ሊባኖሴይ ያርሾሶሆ
ታማስ ጊዱኩ፤
ኢዚ ሜዶሳታ ቆዳይካ
ጹጌቲዛ ያርሾስ ጉꬃ።
17 ካዎቴꬃቲ ኡባይ ኢዛ ሲንꬃን
ኣይኮካ ጊዴቴና፤
ኢስቲ ኣይኮራካ
ጋኪ ቆዴቶንታ
ሃዳ ሚሻ ማላ።
18 ሂስቲን ኢንቴ ጾሳ
ኦናራ ጊኒሴቲ?
ኣይ ሚስሌራ ጋꬂ ጊኒሴቲ?
19 ኤቃ ሚስሌይ ጊዲኮ
ሂላ ኩሼን ማሴቲዴስ፤
ሄሳ ዎርቃ
ኦꬂዛዴይ ቦላራ
ዎርቃን ሜሼስ፤
ቢራ ሳንሳላታካ ኢዛስ ጊጊሴስ። ሃዋ 17፡29
20 ሄሳ ማላ ያርሾ
ሺሻናስ ዳንዳዮንታ
ማንቆ ኣሲ ሙሶንታ
ሚꬅ ዶሬስ፤
ኩንዶንታ ሚስሌ ኤሳናስ
ኤሬቲዳ ሂላ ኮዬስ።
21 ኢንቴ ሄሳ ኤሬኬቲ?
ዎይኮ ሲዪቤኬቲ?
ቤኒ ቤኒ ኢንቴስ ዮቴቲቤኔ?
ሳኣይ ሜꬌቶሶፌ ዶሚን
ኢንቴ ኣኬኪቤኬቲ?
22 ኢዚ ቢታ ዩሾፔ ቦላራ
ባ ኣራታን ኡቴስ፤
ቢታ ቦላ ዲዛ ዴሬይ
ቦሌ ማላ፤
ሳሎታ ማጋላሻ ማላ ሚጬስ፤
ዱሳሶ ዱንካኔ ማላ ቶኬስ።
23 ሃላቃታ ሃዳ ሂስታና፤
ሃ ቢታ ኣይሲዛይታካ
ፒቲ ꬋይሴስ።
24 ኢስቲ ቶኬቲዲ ጋምኦንታ ዲሺን፥
ዜሬቲዲ ታኮንታ ዲሺን፥
ቡሮ ጻጶ ዬዶንታ ዲሺን
ኢስታ ቦላ ጫርኮ ዬዲን ሜሊዳ፤
ጎቴይ ኢስታ ሱላ ማላ
ፒቲ ኤፊዴስ።
25 ጌሻዚ ኢስታስ፥
«ታና ኦናራ ጊኒሴቲ?
ታናራ ጊናቲዛይ ኦኔ?» ጌስ።
26 ኢንቴ ኣይፌ ꬎቁ ሂስቲዲ
ፑዴ ሳሎ ጼሊቴ፤
ሃይታንታ ኡባ
ሜꬊዳይ ኦኔ?
ሳሎ ጾሊንቴታ
ኢሳ ኢሳ ኬሲዛይ፥
ኢስታ ሱንꬃን ሱንꬃን
ጼይጊዛይ ኢዛ።
ኢዚ ባ ጊታቴꬃኒኔ
ባ ኤራቴꬃ ሚኖቴꬃፌ
ዴንዲዳይሳን
ኢስታፌ ኢሶይካ ꬋዬና።
27 ያቆቤ ኔ ኣይስ ሄሳꬆ ጋይ?
ኢስራኤሌ ኔ ኣይስ ሄሳꬆ ሃሳያይ?
«ታ ኦጌይ ጎዳፔ ጌሚዴስ፤
ታ ፒርዳይ ጾሳ ኣቻን
ዉዱ ጌቴቲቤና» ኣይስ ጋይ?
28 ኔ ኤራቤኪ?
ኔ ሲያቤኪ?
ጎዳይ ሜርና ጾሳ፤
ኢዚ ቢታ ኡባካ ሜꬊዳይሳ።
ኢዚ ዳቡሬና፤ ኣዛሌና፤
ኢዛ ኣኬካይካ
ኦናንካ ፒልጌቴና።
29 ሚኖቴꬂ ባይንዳዴስ
ሚኖቴꬅ ኢሜስ፤
ዳቡርዳይሳስ ዎልቃ ጉጄስ።
30 ዬላጋቲካ ዳቡሬቴሲኔ
ኣዛሌቴስ፤
ናቴꬃቲካ
ꬉጴቲዲ ኩንዴቴስ፤
31 ጊዶ ኣቲን ጎዳ
ሂዶታ ኦꬂዛይቲ
ባንታ ዎልቃ ኦራጺሴቴስ፤
ኢስቲ ጎሌ ማላ ፒራꬋና፤
ኢስቲ ዳቡሮንታ ዎጻና፤
ኢስቲ ባና፤ ኣርጋጬቴና።