42
ጎዳ ኣሽካራ
1 ጎዳይ፥ «ታኒ ካ
ኦይኪዳ ታ ኣሽካራይ፥
ታ ኢዛን ኡፋዬቲዛ
ሙሩታይ ሃይሳ፤
ታኒ ታ ኣያና
ኢዛ ቦላ ዎꬃዲስ፤
ኢዚ ካዎቴꬃታስ
ሱሬ ፒርዳ ኤሃና። ማቶ 17፡17፤ 17፡5፤ ማር 3፡22፤ 9፡35
2 ዋሴና፤ ባ ቃላ ꬎቂሴና፤
ባ ጬንጉርሳካ
ኦጌ ቦላ ኬሂ ሲሴና።
3 ዲንጬቲዳ ማቃ ኢዚ
ሜንꬄና፤
ጩዋቲዛ ሙቃዳ ኢዚ ቶይሴና፤
ኣማኔቴꬃን ኢዚ
ሱሬ ፒርዳ ኤሃና።
4 ኢዚ ቢታ ቦላ ሱሬ ፒርዳ
ኤሃና ጋካናስ ዳቡሬና፤
ሂዶታካ ቃንጼና፤
ሃሩሮቲ ኢዛ ዎጋን
ኣማኔታና» ጌስ። ማቶ 12፡18-21
5 ሳሎታ ሜꬊዳይ፥
ኢስታ ሚጪዳይካ፥
ሳኣኔ ኢዚን ዲዛ ኡባ ጊግሲዳይ፥
ባ ዴሬስ ፔኖ
ኢዚን ዴኢዛ ኣሳታስ ሼምፖ
ኢሚዛ ጎዳ ጾሳይ፥ ሃዋ 17፡24-25
6 «ታኒ ጎዳይ
ኔና ጺሎቴꬃን ጼይጋዲስ፤
ታ ኔ ኩሼ ኦይካና፤
ታ ኔና ናጋና።
ታኒ ኔና ካዎቴꬃስ
ጫቆ ቃላ፥
ኣይዛቤታስካ ፖኦ ሂስታና
7 ኔ ቆቄታ ኣይፌ ዶይኣና፤
ዲኤቲዳይታ ቃሾ
ኬꬃፌ ቢርሻና፤
ꬉማን ኡቲዳይታካ
ካርቻሌፌ ኬሳና። *ካርቻሌ ጉሲ ቃሾ ኬꬃ ዎይኮ ዎይኔ ኬꬃ።
8 «ታኒ ጎዳ፤ ሃይሲ ታ ሱንꬃ፤
ታ ቦንቾ ሃራስ
ኣꬃ ኢሚኬ፤
ታ ጋላታካ
ኤቃ ጾሳታስ ሼꬊኬ።
9 ቤኢቴ ቤኒ ዮኦቲ ፖሌቲዳ፤
ሃኢ ታኒ ኦራꬃ
ሚሽ ኣዋጃይስ፤
ኢዚ ሞካናፔ ሲንꬅ
ታ ኢንቴስ ዮታይስ» ጌስ።
ጋላታ ማዛሙሬ
10 ኢንቴኖ ዱጌ ኣባን ዎꬊዛይቶ፥
ሄን ዲዛ ኡባቶ!
ኢንቴኖ ሃሩሮቶ!
ሄንካ ዲዛ ኡባቶ!
ጎዳሲ ኦራꬃ ማዛሙሬ ዬጺቴ፤
ቢታ ጋጻፔ ዶሚዲ
ኢዛስ ጋላታ ማዛሙሬ ሺሺቴ።
11 ባዞይኔ ካታማቲ
ባንታ ጬንጉርሳ
ꬎቁ ሂስቴቶ፤
ቄዳሬይ ዴኢዛ ጉታይ ኡፋዬቶ፤
ሴላ ዴሬ ኣሳቲ
ኡፋይሳን ዬጼቶ፤
ዙማ ጼራንካ ኢሊሌቶ።
12 ኢስቲ ቦንቾ ጎዳስ ኢሜቶ፤
ኢዛ ጋላታይካ
ሃሩሮታን ኣዋጄቶ።
13 ጎዳይ ኦላ ቃራ ማላ ኬዛና፤
ኦላንቻ ማላ ሆኤቲ ዴንዳና።
ጬቄቴꬃ ጋይሮ ሲሳና፤
ባ ሞርኬታካ ኦሊ ጾናና።
ጎዳይ ባ ዴራ ማዳና ኢሚዳ ሂዶታ
14 ጎዳይ፥ «ታኒ ኣዱሳ ዎዴሶፌ
ጮኡ ጋዲስ፤
ሲርጲ ጋዲስ፤
ታና ቁምኣ ኦይካዲስ፤
ሃኢ ጊዲኮ ሚጻ ኦይኬቲዳ
ማጫሳ ማላ ዋሳይስ፤
ሼኖታይሲኔ ባናካይስ።
15 ታኒ ዙማታኔ
ዙምቡላታ ዎዲሳና፤
ዶዛታ ኡባ ሜሊሳና።
ሻፋታ ሃሩሮ ቢታ ኬሳና፤
ኤሌ ሃꬃታካ
ሚጪንቻና።
16 ታኒ ቆቄታ ኢስቲ ኤሮንታ
ኦጌ ካሌꬃና፤
ኢስቲ ሜዜቶንታ ኦጌራካ
ታ ኢስታ ኤፋና፤
ꬉማዛ ታ ኢስታ
ሲንꬃን ፖኢሳና፤
ኩንዱኩርጮ ሶሆታ ታ ጊጊሳና፤
ሃይታንታ ኡባ
ታ ኦꬆንታ ኣጊኬ።
17 ኤቃ ጾሳታን
ኣማኔቲዛይቲ ጊዲኮ
ሚስሌታካ፥ ‹ኢንቴ ኑ ጾሳታ›
ጊዛይቲ ጉዬ ሲማና፤
ኢስቲ ሙሌራ ካዉያና» ጌስ።
ኢስራኤሌ ኣሳ ቆቄቴꬂኔ ቱሌቴꬅ
18 ጎዳይ፥ «ኢንቴኖ ቱሌቶ ሲዪቴ!
ኢንቴኖ ቆቄቶ
ቤኢቴኔ ጼሊቴ!
19 ታ ኣሽካረራ
ታኒ ኪቲዳዴፌ ኣቲን
ሃራ ቱሌይ ኦኔ?
ታስ ኣማኔቲዳዴ ማላ
ቆቄይ፥
ጎዳ ኣሽካራ ማላ
ቆቄይ ኦኔ?
20 ዳሮ ሚሽ ቤኢዴታ ሺን
ኣኬኪቤኬታ፤
ኢንቴ ሃይꬃይ ዶያ ዴስ ሺን
ሲዬኬታ» ጌስ።
21 ጎዳይ ባ ጺሎቴꬃ ጊሻስ ጊዲ፥
ባ ዎጋ ጊታኔ
ቦንቾ ኬሲዳ ጊሻስ ኡፋዬቲዴስ።
22 ሃ ዴሬይ ቦጌቲዳኔ ቦንቄቲዳ፥
ኦላ ጊዶን ዎꬊዳ፥
ዎይኔ ኬꬃይ ኢዛ ቦላ
ጎርዴቲዳ ዴሬ፤
ኢስቲ ቦጌቲዳ፤
ኢስታ ኣሺዛዴይ ዴና፤
ኢስቲ ዲኤቲዳ፤
«ኢስታ ዛሪቴ» ጊዛይካ ባዋ።
23 ኢንቴ ጊዶፌ ሃይሳ ሲዪዛይ፥
ሲንꬃፌ ያና ዎዴስ
ኣኬኪ ሲዪዛይ ኦኔ?
24 ያቆቤይ ቦጌታና ማላ፥
ኢስራኤሌይ ዲኤታና ማላ
ኦꬂዳይ ኦኔ?
ናጋራ ኦꬂዲ
ኑ ቆሂዳ ጎዳ ጊዴኔ?
ኢስቲ ኢዛ ኦጌ ካላናሲኔ
ኢዛ ዎጋስ ኣዛዜታና ኮዮንታ
ኣጊዳ ጊሻሳ።
25 ሄሳ ጊሻስ ኤጺዛ ባ ሃንቆዛ፥
ኢታ ኦላ ኢስታ ቦላ ዬዲዴስ፤
ታማ ላጮን ኢስታ ጊዶꬂዴስ፤
ኢስቲ ጊዲኮ ሄሳ ኣኬኪቤቴና፤
ኢስታ ጹጊዴስ ሺን
ኢስቲ ዎዚናን ዎꬂቤቴና።