44
ዶሬቲዳ ኢስራኤሌ
1 ጎዳይ፥ «ጊዶ ኣቲን
ታ ኣሽካራ ያቆቤ፥
ታ ዶሪዳ ኢስራኤሌ፥ ሲያ።
2 ኔና ሜꬊዳይ፥
ኔ ኣዬይ ኡሎን ኦꬂዳይ፥
ኔና ማዲዛ ጎዳይ፥
‹ታ ኣሽካራ ያቆቤ!
ታኒ ዶሪዳ ዪሹሩኔ! ያዮፋ።
3 ታኒ ሳሜቲዳ ቢታን
ሃꬅ ጉሳና፤
ሜላ ቢታንካ ሻፋ ጎጊሳና።
ታኒ ታ ኣያና ኔ ዜሬꬃ ቦላ፥
ታ ኣንጆ ኔስ
ና ና ቦላ ጉሳና።
4 ኢስቲ ዴምባን ጪሊላ ማታ ማላ፥
ሻፋ ዶናን ዲዛ ሚꬃ ማላ
ሞካና› ጌስ።
5 ኢሶይ፥ ‹ታኒ ጎዳሳ› ጋና፤
ሃራይ ባና ያቆቤ
ሱንꬃን ጼይጋና፤
ሃራይ ቃሴ ባ ኩሼ ቦላ፥
‹ታኒ ጎዳሳ› ጊ ጻፋና፤
ኢዚ ባና ኢስራኤሌ ሱንꬃን
ጼይጋና» ጌስ።
ጎዳፔ ኣቲን ሃራ ጾሲ ዴና
6 ኢስራኤሌ ካዎይኔ ኢስታ ዎዚዛይ፥
ጎዳይ ኡባፌ
ዎልቃማ ጾሳይ፥
«ኮይሮይ ታና፤ ዉርሴꬂካ ታና።
ታፔ ሃራ ጾሲ ባዋ። ኢሳ 48፡12፤ ኣጁ 1፡17፤ 22፡13
7 ታ ማላይ ኦኒ ዲዜ? ኣኔ ዮቶ፤
ኮይሮ ታ ዴራስ ታ ዮች ዬጊሺን
ኣዚ ሃኒዳኮ፥
ሲንꬃፌካ
ኣዚ ሃናናኮ ዮቶ፤
ኣኔ ታስ ቆንጪሶ፤
ቡሮ ሃናና ሚሻ ጊሻስ
ሲንꬃቲ ዮቶ፤
ቡሮ ያናይሳ ካሴቲ ዮቶ።
8 ያዮፍቴ፤ ዳጋሞፍቴ።
ሃይሳ ታኒ ኢንቴስ
ዮታቤኪና?
ቤኒሶፌ ታ ኢንቴና
ኤሪሳቤኪና?
ሄሳስ ኢንቴ ታ ማርካታ።
ታፔ ኣቲን ሃራ ጾሲ ዲዜ?
ሙሌካ ዴና፤
ዎይኮ ሃራ ዛላይ ዲዜ?
ዴና፤ ታ ኦናካ ኤሪኬ» ጌስ።
9 ኤቃ ሚስሌታ ሜꬊዛይቲ
ኡባቲ ሃዳ፤
ሚስሌታ ኢስታፌ
ኦꬂዛ ሚሻቲካ ሃዳ፤
ኢስታስ ዮቲዛይቲካ ቆቄ፤
ኢስታስ ኤራቴꬂ ዴና፤
ኢስቲ ዬላታና።
10 ኣይኮካ ጎኦንታ ኤቃ ጾሳ
ማሲ ጊግሲዛይ ኦኔ?
11 ኤቃ ጾስ ሜꬊዛይ ኣስ ኣቲን
ሃራ ጊዴና፤
ኢዚኔ ኢዛ ሚሳቲዛይቲ ዬላታና፤
ኡባይካ ሺቂዲ
ኢሲ ቦላ ኤቄቶ፤
ኢስቲ ዳጋማናኔ ዬላታና።
12 ቢራታ ቆጺዛይ ናሪቃ ኦይኬስ፤
ጺፋ ቦንቆ ቦላ
ዎꬂ ኦꬄስ፤
ኤቃ ጾስ ናሪቃን ቆጺዲ
ሚስሌ ጊጊሴስ፤
ባ ሚኖ ቄሴን ጊጊሴስ።
ሄሳፌ ጉዬ ጋፌስ፤
ዎልቃ ꬋዬስ፤
ሃꬅ ሳሜቴስ፤ ዳቡሬስ።
13 ማሲዛይ ዎዶሮን ዋꬌስ፤
ቾኬን ማላታ ዎꬄስ፤
ማርሳራ ዎጬስ፤
ኢርሳሴን ኢዛ ቦላ
ማላታ ዎꬄስ፤
ኣሳ ሚሳቲሲ ጊጊሴስ፤
ኣሳ ማላ ፑላሴስ፤
ጎይኖሶን ኤፊ ዎꬄስ።
14 ዚጋ ሚꬅ ቃንጼስ፤
ዎላ ዎይኮ ሞቆꬃ ዶሬስ፤
ዎራን ዲዛ ሚꬃታራ
ኢሲፌ ዲጫና ማላ ኣጌስ፤
ዎይኮ ጺዳ ቶኬስ፤
ኢዛካ ኢራይ ዲቼስ።
15 ኣሲ ኤሶስ ጎኤቴስ፤
ኢዛፔ ጉꬅ ኤኪዲ
ታማን ኤꬂ ሆኤስ፤
ኡኬꬂካ ኢዛን ኡኬስ፤
ኢዛፔ ማሲዲ
ኤቃ ጾስ ጊጊሴስ፤
ኢዛስካ ጎይኔስ።
ኤቃ ጾስ ኦꬄስ፤
ኩንዲዲካ ኢዛስ ዚጌስ።
16 ባጋ ሚꬃ ኤꬄስ፤
ኢዛ ቦላካ ቁማ ካꬄስ፤
ኣሾ ኢዛን ጺጺዲ ካሊ ሜስ፤
ታማዛ ሆኢሼ፥
«ኤሮሾ ታና ሆኢዴስ፤
ታማዚካ ታስ ቤቴስ» ጌስ።
17 ቃሴ ኣቲዳ ሚꬃዛ
ባስ ኤቃ ጾስ ጊጊሴስ፤
ሆኪዲ ኢዛስ ዚጌስ፤
ኢዛካ ጎይኔስ፤
ኢዛ ዎሲሼ፥
«ኔኒ ታ ጾሳ ጊዲዳ ጊሻስ
ታና ኣሻ» ጌስ።
18 ኢስቲ ኣይኮካ ኤሬቴናኔ
ኣኬኬቴና፤
ኢስቲ ጼሎንታ ማላ
ኢስታ ኣይፌይ ጎዜቲዴስ፤
ኢስቲ ዩሺ ቆፖንታ ማላ
ኢስታ ዎዚናይ ጎርዴቲዴስ።
19 ኦኒካ ታኪ ጊ ቆፒቤና፤
ኤራቴꬂ ዎይኮ
ኣኬካይ ባይንዳ ጊሻስ፥
«ባጋ ታማን ኤꬃዲስ፤
ኢዛ ቦንቆን ካꬅ ካꬃዲስ፤
ኢዛን ኣሾ ጺጻዳ ማዲስ፤
ሂስቲን ኣቲዳይሳን ዎስታዳ
ታኒ ሃራሲዛ ሚሽ ኦꬃኔ?
ሚꬃ ኣኖስ ታኒ
ጎይናና ቤሲዜ?»
ጋናስ ዳንዳይቤና።
20 ኤያ ዎዚናይ ኢዛ ባሌꬂን
ኢዚ ቢዲንꬅ ቃምኤስ፤
ባና ኣሻና ዳንዳዬና፤
«ሃይሲ ታስ ኡሻቻ ኩሼን
ዲዛይ ዎርዶ ጊዴኔ?
ጋናስ ዳንዳይቤና።»
21 ጎዳይ፥ «ኢስራኤሌ ኔኒ
ታ ኣሽካራ ጊዲዳ ጊሻስ፥
‹ያቆቤ ሃይሳ ቆፓ፤
ታኒ ኔና ኦꬃዲስ፤
ኔኒ ታ ኣሽካራ።
ኢስራኤሌ ታኒ ኔና ዶጊኬ።
22 ታኒ ኔ ሞሮ ሻራ ማላ፥
ኔ ናጋራካ ማላዶ ቱላላ ማላ
ቁጫ ꬋይሳዲስ፤
ታኒ ኔና ዎዚዳ ጊሻስ
ሃ ታኮ ሲማ› » ጌስ።
23 ጎዳይ ሃይሳ ኦꬂዳ ጊሻስ
ሳሎቶ ዬጺቴ፤
ጪማ ቢታቶ ኡፋይሳን ኢሊሊቴ።
ኢንቴኖ ዙማቶ፥
ኢንቴኖ ዎራቶ፥
ሚꬃቶ ኡባይ ኢሊሊቴ፤
ጋሶይካ ጎዳይ
ያቆቤ ዎዚዴስ፤
ባ ቦንቾ
ኢስራኤሌ ቦላ ቆንጪሲዴስ።
ዬሩሳላሜይ ኣሳ ዱሳሶ ጊዳና
24 ኔና ኣዪ ኡሎን ሜꬊዲ
ዎዚዳ ጎዳይ፥
«ኡባ ሜꬋዳ
ሳሎታ ታርካ ፒዲሲዳይ፥
ሳኣካ ሚጪዳይ ታና ጎዳ።
25 ታኒ ዎርዶ ናቤታ ማላታ
ሃዳ ኦꬃና፤
ቢቲዛይታካ ኤያ ኬሳና።
ታኒ ኣꬎ ኤራንቻታ
ሺራ ዬጋና፤
ኢስታ ኤራቴꬃካ
ሃዳ ኦꬃና።1ቆሮ 1፡20
26 ታ ኣሽካራዛ ቃላ ታ ፖላና፤
ታ ኪቲዳይታ ዞሬ ታ ሚንꬃና፤
ታኒ ዬሩሳላሜ፥
‹ኔኒ ኣሲ ዲዛሶ ጊዳና›፥
ዩሁዳ ካታማታካ፥
‹ኢስቲ ኬጼታና›፥
ኢስታ ላሌꬃካ፥
‹ታኒ ኦራጺሳና› ጋና።
27 ታኒ ጪማ ሃꬃካ፥
‹ኔ ሜላ ጊዳ!
ኔ ሻፋታካ
ታ ሜሊሳና› ጋና።
28 ቂሮሴካ፥
‹ኢዚ ታ ሄንꬃንቻ፤
ኢዚ ታ ሼኔ ፖላና› ጋና፤
ዬሩሳላሜይካ፥
‹ሲማ ኤቁ› ጋና፤
ጾሳ ኬꬃስ፥
‹ኢዛ ዮቺ ዬጌቶ› ጋና» ጌስ። 2ታሪ 36፡23