47
ባቢሎኔ ቦላ ያና ፒርዳ
1 ጎዳይ፥ «ሃኔ ባቢሎኔ ጌላኦዬ፥
ጉዱላ ቦላ ዎꬋ ኡታ፤
ሃኔ ባቢሎኔታ ናዬ፥
ኔ ኣራታፔ ዎꬋ፤
ቢታን ኡታ፤
ሃይሳፌ ጉዬ
ኔኒ ማላ ሎኦኔ ዳልቂዳልቃ
ጌቴታ ጼይጌታካ። ኢሳ 13፡1—14፡23፤ ኤር 50፡1—51፡64
2 ዎጻ ኤካዳ ካꬅ ጋጫ፤
ኔ ጎሳ ቃራ፤
ኔ ቃሚሳዛ ቃራ፤
ኔ ጺፋ ቤሳ፤
ጋዲጋዳሼ ሻፋ ፒና።
3 ኔ ካሎቴꬂ ቆንጮ፤
ዬላቺዛ ኔ ካሎይ ቤቶ፤
ታኒ ሃሎ ማካና፤
ታ ኦናካ ኣጊኬ» ጌስ።
4 ኑና ዎዚዛ
ኢስራኤሌ ጌሻስ፥
ሱንꬃይ ጎዳ ኡባፌ
ዎልቃማ ጾሳ።
5 «ሃኔ ባቢሎኔታ ናዬ፥
ꬉማሶ ጌላዳ ጮኡ ጋ ኡታ፤
ሃይሳፌ ጉዬ ኔ ካዎቴꬃታ
ጎዳቴዮ ጌቴታ ጼይጌታካ።
6 ታኒ ታ ዴራ ሃንቄታዲስ፤
ታኒ ጺንጾዛካ ቱኒሳዲስ፤
ታኒ ኢስታ ኔ ኩሼን
ኣꬃ ኢማዲስ።
ኔኒ ጊዲኮ
ኢስታስ ቃꬌታቤካ፤
ጪሚዳይታ ቦላካ
ኬሂ ዴጾ ቃምባራ
ዎꬃዳሳ።
7 ኔኒ፥ ‹ታኒ ሜርናስ
ጎዳቶ ጊዳና› ጋዳሳ።
ጊዶ ኣቲን ሃይታንታ
ኣኬካቤካ፤
ኢስታ ዉርሴꬂ
ኣይ ጊዳናኮ ቆፓቤካ።
8 «ሃኔ ኢሻሎ ዱስ ዲዛሬ!
ኔርካ ኔናን
ኣማኔታ ኡቲዳሬ!
ኔ ዎዚናን፥ ‹ታና፤
ታፔ ኣቲን ሃራይ ባ።
ሃኒፌ ጉዬ ታኒ ኣምኦ ጊዲኬ፤
ዬላዳ ꬎሚዳሮ ጊዲኬ›
ጊዛሬ ሲያ!
9 ሃ ናምኡ ዮኦቲ፥
ኣምኤቴꬂኔ ዬሊ ꬎንꬂ
ቆፋይ ባይንዳ ኢሲ ጋላስ
ኔ ቦላ ጋኪ ዎꬋና፤
ኔ ኣይ ኬና ቢቲኮካ፥
ኔ ኣይ ኬና ሙሬኒኮካ
ኢስቲ ኔ ቦላ
ኩሜꬃ ዎልቃራ ያና። ኣጁ 18፡7-8
10 ኔኒ ኔ ኢታቴꬃን ኣማኔታዳ፥
‹ታና ኦኒኔ ቤኤና› ጋዳሳ።
ቃሴ፥ ‹ታና፤
ታፔ ኣቲን ሃራይ ዴና
ኔ ጊዳ ዎዴ
ኔ ኣꬎ ኤራቴꬃይኔ
ጪንጫቴꬂ
ኔና ባሌꬂዳ› ጋዳሳ።
11 ባሺ ኔ ቦላ ያና፤
ኔኒ ዎስታ ሙሬና
ዛራናኮ ኤራካ፤
ኔ ቃንጾ ኢማዳ
ኔ ዳንዳዮንታ ቆሆይ
ኔ ቦላ ጋካና።
ኔ ቆፖንታ ሜቶይ
ኔ ቦላ ዲንጋቴ ያና።
12 ሄኮ ቤኣ፤
ኔኒ ናቴꬃፌ ዶማዳ
ኦꬃሼ ዳቡርዳ ቢታታኔ
ዳሮ ሙሬኖታ
ጉጃ ጉጃ ኦꬃ፤
ኦኔ ኤሪዛይ ኔስ ሃናናኮ፥
ኦኔ ኤሪዛይ ኔኒ
ኔ ሞርኬታ ሺሮሳናኮ?
13 ኔ ኤኪዳ ዞሬ ኡባይ
ኔና ዳቡራራ ኣሺዴስ፤
ኣጊናፔ ኣጊና ጋካናስ
ጾሊንቴ ጼሊ ካዪዛይቲ፥
ጾሊንቴ ታይቢዛይቲ
ኣኔ ሃ ዬቶ፤
ኔና ጋኪዛ ሜቶፔ
ኣኔ ኢስቲ ኔና ኣሼቶ።
14 ሄኮ ኢስቲ ሃፓ ማላ፤
ታማይ ኢስታ ማና።
ታማ ላጮፔ ዴንዲዳይሳን
ባና ኣሻናስ
ዳንዳዬቴና።
ኣሲ ሆኣና ቦንቆይ ዴና፤
ኡቲዲ ሆኣና
ታማይካ ዴና።
15 ናቴꬃፌ ዶማዳ
ኔ ኢስታራ ዳቡርዳይቲ፥
ኔ ኢስታራ ዛልኢዳይቲ፥
ኢስቲ ኦꬃና ዳንዳይዛይ
ሃይሳ ጻላ፤
ኢሶይ ኢሶይ ባ ሞሮ
ጉጂ ጉጂ ባና፤
ጊዶ ኣቲን ኔና
ኣሻናይ ዴና» ጌስ።