48
ሲሞንታ ኢጺዳ ኢስራኤሌ
1 ጎዳይ፥ «ኢንቴኖ ኢስራኤሌ ሱንꬃን ጼይጌቲዳ፥
ያቆቤሶ ኣሳቶ!
ዩሁዳ ዛሬፔ ቤቲዳይቶ!
ኢንቴኖ ጎዳ
ሱንꬃን ጫቂዛይቶ!
ቱማቴꬃኒኔ
ጺሎቴꬃን ጊዶንታ፥
ኢስራኤሌ ጾሳ ጼይጊዛይቶ!
ሃይሳ ሲዪቴ።
2 ‹ኑኒ ጌሻ ካታማይን
ዲዛይታ› ጊዲ
ኢንቴርካ ኢንቴና ጼይጊዛይቶ!
ኢስራኤሌ ጾሳን
ኣማኔቲዛይቶ!
ጎዳይ ኡባፌ
ዎልቃማ ጾሳይ
ጊዛይሳ ሲዪቴ።
3 «ካሴ ሃኒዳ ሚሻታ
ታኒ ዳሮ ዎዴፔ ሲንꬃን
ዮታ ዎꬃዲስ፤
ታ ዶናፔ ኬዚዴስ።
ኢስቲ ኤሬታና ማላካ
ታኒ ኦꬃዲስ፤
ታ ዲንጋቴ ኦꬂን
ኢስቲካ ፖሌቲዳ።
4 ኔ ኣይ ማላ ሲሞንታ
ኣስ ጊዲዳኮ
ታ ኤራይስ፤
ኔ ሞርጌ ሻያይ ቢራታ ማላ፥
ኔ ኮንኬይ ጻርቂማላ ሚሳቴስ።
5 ሄሳ ጊሻስ ሃይታ ሃ ዮኦታ
ቤኒ ታ ኔስ ዮታዲስ፤
ኢስቲ ፖሌታናፔ ሲንꬃን
ታ ኔና ኤሪሳ ዎꬃዲስ፤
ሄሲካ፥ ‹ታ ኤቃ ጾሳቲ
ሃይሳ ኦꬂዳ፤
ሚꬃፌ ማሴቲዳ ሚስሌቲኔ
ቢራታፔ ኦሴቲዳ ታ ጾሳቲ
ሃይሳ ታስ ኣዛዚዳ›
ጎንታ ማላሳ።
6 «ሃይታ ሃ ዮኦታ
ኔ ሲያዳሳ፤
ኣኔ ኡባካ ጼላ፤
ኢስቲ ሊኬ ጊዲዳይሳ
ኔኒ ኔ ሁኤራ ማርካቲኪ?
ሃኢፔ ዶማዳ
ኦራꬃ ሚሻታ፥
ኔፔ ጌሚዳይታኔ
ኔ ኤሮንታ ዮኦታ
ታ ኔስ ዮታና።
7 ሄይቲ ሃኢ ሜꬌቲዳ ኣቲን
ካሴ ጊዴና፤
ኢስታ ጊሻስ ኔ ሃቺፌ ኣቲን
ካሴ ሲያቤካ፤
ሄሳ ጊሻስ፥
‹ኤ፥ ታ ኢስታ ጊሻስ ኤራይስ›
ጋና ዳንዳያካ።
8 ኔኒ ሲያቤካ ዎይኮ ኤራቤካ፤
ኔ ሃይꬂ ቤኒፔካ
ዶዬቲቤና።
ጋሶይካ ኔኒ ካሴካ
ጪሚዛዴኔ
ናቴꬃፌ ዶማዳ
ኔ ማካላንቻ
ጌቴቲዳይሳ
ታ ኤራዲስ።
9 «ታ ሱንꬃ ጊሻስ ጋዳ
ታኒ ታ ሃንቆ ጋምኢሳና፤
ታ ጋላታ ጊሻስ ጋዳ
ታ ኔፔ ቴቃና፤
ታ ኔና ቃንጾንታ
ኣጋና ማላሳ።
10 ቤኣ ቢራ ማላ ጊዶንታ ኣጊኮካ
ኔና ጋጫዲስ፤
ታማ ማላ ሜቶን ፓጫዲስ፤
11 ታ ጊሻስ ጋዳ፥
ታኒ ታ ጊሻስ ጋዳ ኦꬃይስ።
ታርካ ታና ዎስታ
ካዉሻቴꬃስ
ኣꬃ ኢሞ?
ታ ቦንቾ ኦናስካ ኢሚኬ።
ጾሲ ዶሪዳ ኦሳንቻ
12 «ኔኖ ያቆቤ፥
ታኒ ጼይጊዳ ኢስራኤሌ
ታኒ ጊዛ ሲያ።
ታኒ ኢዛ፤
ኮይሮይካ ታና፤
ዉርሴꬃይካ ታና። ኢሳ 44፡6፤ ኣጁ 1፡17፤ 22፡13
13 ቢታስ ዮች ዬጊዳይ
ታ ኩሼ፤
ሳሎታ ሚጪዳይ
ታ ኡሻቻ ኩሼ።
ታ ኢስታ ጼይጊዛ ዎዴ
ኢስቲ ኡባይካ
ኢሲ ቦላ ኤቄቴስ።
14 «ኢንቴ ኡባይካ
ኢሲ ቦላ ሺቂዲ ሲዪቴ፤
ኤቃ ጾሳታፔ ካሴ
ሃይታንታ ዮቲዳይ ኦኔ?
ጎዳስ ዶሬቲዳ ላጌይ
ኢዚ ባቢሎኔ ቦላ
ሃልቺዳይሳ ፖላና፤
ኢዛ ቄሴይካ
ባቢሎኔታ ቦላ ጊዳና።
15 ታኒ ታርካ ዮታዲስ፤
ቱሙካ ታ ጼይጋዲስ፤
ታ ኢዛ ኤሃና፤
ኢዛ ኦሶይካ ኢዛስ ፖሌታና።
16 «ታኮ ሃ ሺቂዲ ሃይሳ ሲዪቴ፤
ታኒ ኮይሮፔ ዶማዳካ
ጌማን ሃሳያቤኬ፤
ኢዚ ፖሌቲሺን
ታ ሄን ዳይስ» ጌስ።
ሃኢካ ኡባ ሃሪዛ
ጎዳይኔ ኢዛ ኣያናይ
ታና ኪቲዳ።
17 ጎዳይ ኔና ዎዚዳ
ኢስራኤሌ ጌሻይ፥
«ታኒ ጎዳ ኔ ጾሳይ፥
ኔና ጎኢዛዝ ታማርሲዛይሳ፥
ባናስ ቤሲዛ ኦጌራ
ኔና ካሌꬂዛይ ታና።
18 ኔኒ ታ ኣዛዞ ሲዪዳ ጊዲዳኮ፥
ኔስ ሳሮቴꬂ ሻፋ ማላ፥
ኔስ ጺሎቴꬂካ
ኣባ ዳምባላ ማላ ጊዳናሺን።
19 ኔ ዜሬꬂ ኣባ ሻሚንታ ማላ፥
ኔ ናይቲካ ቆዳይ ባይንዳ
ጉዱላ ማላ ጊዳናሺን፤
ኢስታ ሱንꬂ ቁጬቴና፤
ታ ሲንꬃፌ
ꬋዬቴናሺን» ጌስ።
20 ባቢሎኔ ቢታፌ ኬዚቴ፤
ባቢሎኔ ኣሳፔ ባቃቲቴ!
ሃይሳ ኢሊሊሳን ኤሪሲቴ፤ ኣዋጂቴ፤
ቢታ ጋጻ ጋካናስ ዮቲቴ፤
«ጎዳይ ባ ኣሽካራ
ያቆቤ ዎዚዴስ» ጊቴ። ኣጁ 18፡4
21 ኢዚ ኢስታ ባዞ ቢታራ
ካሌꬂሺን
ኢስቲ ሳሜቲቤቴና።
ኢዚ ኢስታስ ዛላፌ
ሃꬅ ፑልቲሲዴስ፤
ኢዚ ዛላ ጳልቂዴስ፤
ሃꬂካ ꬉቂ ኬዚዴስ።
22 «ኢታታስ ሳሮይ ባ» ጌስ ጎዳይ። ኢሳ 57፡21