49
ጎዳ ኦሳንቻ
1 ኢንቴኖ ሃሩሮቶ፥
ታ ጊዛይሳ ሲዪቴ።
ኢንቴኖ ሃሆን ዲዛ
ካዎቴꬃቶ፥
ሃይሳ ኤዝጊቴ።
ታኒ ታ ኣዪ ኡሎን ዲሺን
ጎዳይ ታና ጼይጊዴስ፤
ታ ዬሌቶንታ ዲሺን ታና
ታ ሱንꬃን ጼይጊዴስ። ኤር 1፡5
2 ታ ኢንጻርሳ
ጊꬃ ማሻ ማላ ቃራሲዴስ፤
ባ ኩሼ ኩዋን
ታና ጌንꬂዴስ፤
ኢዚ ታና ሆጼ
ዪሻ ማላ ኦꬂዴስ፤
ሂስቲዲ ባ ኮሆ ጊዶን
ታና ቆቲዴስ። ኢብ 4፡12፤ ኣጁ 1፡16
3 ኢዚ ታና፥ «ኢስራኤሌ
ኔ ታ ኣይሌ፥
ታኒ ታ ቦንቾ
ኔናን ቆንጪሳና» ጊዴስ።
4 ጊዶ ኣቲን ታኒ፥
«ታኒ ሜላ ጮ ዳቡራዲስ፤
ጎኣይ ባይንዳ
ጮ ሃዳ ሚሻን
ታ ዎልቃ ዉርሳዲስ፤
ጊዲኮካ ታ ኦሶዛስ
ኩሼ ዛራናይ ጎዳ፤
ታ ዋጋይካ
ታ ጾሳ ማታና» ጋዲስ።
5 ሃኢ ታኒ ጎዳ ኣይፌ
ሲንꬃን ቦንቼታዲስ፤
ጾሳይ ታስ ዎልቃ ጊዲዴስ፤
ታኒ ያቆቤ
ኢዛኮ ዛራና ማላ፥
ኢስራኤሌ ኢዛኮ ሺሻና ማላ
ኦꬂዳ ጎዳይ
ሃኢካ ዛሪዲ፥
6 «ኔኒ ታስ ኦሳንቻ ጊዴꬂ፥
ያቆቤ ቆሞታ
ኔ ዛራናይሲኔ
ታ ናጊዳ ኢስራኤሌ ዛራዳ
ኔ ኤሃናይሲ
ሄሲ ኔና ዴጼና፤
ቃሴካ ታ ኣቶቴꬃ
ቢታ ጋጻ ኔ ጋꬃና ማላ፥
ታኒ ኔና ካዎቴꬃታስ
ፖኦ ሂስታና» ጌስ። ኢሳ 42፡6፤ ሉቃ 2፡32፤ ሃዋ 13፡47፤ 26፡23
7 ካꬌቲዳይሳሲኔ
ካዎቴꬃን ኢጼቲዳይሳስ፥
ዴሬ ሃሪዛይታ
ኣሽካራ ጊዲዳ ኔስ፥
ጎዳይ፥ ኢስራኤሌ
ኣሺዛ ጌሻይ፥
«ካዎቲ ኔና ቤኢዲ ዴንዲ ኤቃና፤
ካዎ ናይቲ ኔና ቤኢዲ
ኔስ ዚጋና፤
ጋሶይካ ኔና ዶሪዳ ጎዳይ፥
ኢስራኤሌ ጌሻይ
ኣማኔቲዳዴ» ጌስ።
ኢስራኤሌ ዛሪ ኤሶ
8 ጎዳይ፥ «ታኒ ዶሪዳ ዎዴ
ኔ ኦይሻ ዛራና፤
ኣቶቴꬃ ጋላስ
ታኒ ኔና ማዳና፤
ዴራስ ጫቆ ቃላ ጊዳና ማላ፥
ቢታዮካ ኔ ዛራ ኤሳና ማላ፥
ካሴ ቢታ ዬጊ ꬋይዳይታስ
ኢስታ ጺንጾ
ኔ ዛራ ኢማና ማላ፥
ታ ኔና ማዳና፤
ታ ኔስ ኦꬃና።2ቆሮ 6፡2
9 ኔኒ ዲኤቲዳይታ፥
‹ሃ ኬዚቴ!›
ꬉማን ዲዛይታ፥
‹ፖኦን ኬዚቴ›
ጋና ማላ ታ ኦꬃዲስ።
ኢስቲ ኦጌይ ዲዛሶን ዲዛሶን
ካꬅ ማና፤
ኣይኮይ ባይንዳ ዙምቡላ ቦላ
ሄሜቲዛሶ ዴማና።
10 ኢስቲ ጋፌቴቴና
ዎይኮ ሳሜቴቴና፤
ኢስታ ባዞ ቢታ ሴላይ
ዎይኮ ኣዋ ሴላይ ቆሄና።
ኢስታስ ቃꬌቲዛይ
ኢስታ ካሌꬃና፤
ሃꬃ ፑልቶይ ዲዛሶን
ኢስታ ሄማና። ኣጁ 7፡16-17
11 «ታ ዙማታ ኡባ
ኦጌ ኬሳና፤
ታ ዎጋ ኦጌቲካ ꬎቁ ጋና።
12 ሄኮ ኢስቲ ሃሆ ዴሬፔ ያና፤
ኢሲ ኢሲኔቲ ፑዴሃፔ፥
ባጋይቲ ኣርሼይ ዉሊዛ ባጋፌ፥
ሃንኮ ኣቲዳይቲ ሲኒሜፔ
13 ሳሎቶ ኢንቴ፥ ኢሊሊ ጊቴ፤
ቢታዬ ኔኒ ኡፋዬታ።
ኢንቴኖ ዙማቶ ኡፋይሳን ዬጺቴ፤
ጋሶይካ ጎዳይ
ባ ዴራ ሚንꬄꬄስ፤
ሜቶታንቻታስ ቃꬌቴስ።
14 ጺዮና ጊዲኮ፥
«ጎዳይ ታና ኣጊዴስ፤
ጎዳይ ታና ባሊዴስ» ጋዱስ።
15 ጎዳይ፥ «ኣያ ባ ꬋንꬂዛ ና
ባላናስ ዳንዳያዜ?
ባ ዬሊዳ ናስ ቃꬌቴኬ?
ኦኔ ኤሪዛይ
ኢዛ ባላና ዳንዳያዉስ፤
ታኒ ጊዲኮ ኔና ባሊኬ።
16 ሄኮ ታኒ ኔና
ታ ኩሼ ቃኣን ጻፋዲስ፤
ኔ ዲርሳ ጊምቤቲካ ኡባቶ
ታ ሲንꬃን ዴቴስ።
17 «ኔ ኣቱማ ናይቲካ
ኤሶን ሲማና፤
ኔና ላሊዳይቲ ኔፔ ባቃታና።
18 ኣኔ ꬎቁ ጋዳ
ኔ ዩሾ ጼላ፤
ኔ ናይቲ ኡባይ ኢሲፌ ሺቂዲ
ኔኮ ያና።
ታኒ ጎዳይ ታ ዴኦን ጫቃይስ፤
ኔኒ ኢስታ ኡባ
ኣሌቆ ማላ ማይኣና፤
ኔ ኢስታ ሚሺራ ማይኦ ማላ
ማይኣና» ጌስ።
19 «ኔ ላሌታዳ ቡላ ጊዲኮካ፥
ኔ ቢታይ ሙሌራ ꬋይኮካ፥
ሃች ኔኒ ኔ ዴሬዛስ
ጹንꬅ ጊዲኮካ፥
ኔና ሚቲዳይቲ
ኔፔ ሃካና።
20 ጬጬ ዎዴ ኔ ዬሊዳ ናይቲ፥
ኔ ሃይꬂ ሲዪሺን፥
‹ሃይሲ ጋዴይ
ኑስ ኬሂ ጹሚዴስ፤
ኑ ዳናስ ኑስ
ጊዲዛሶ ኢማ› ጋና።
21 ኔኒ ኔ ዎዚናን፥
‹ሃይታ ታስ ዬሊዳይ ኦኔ?
ታኒ ጬጪዛዴኔ ማይኔ፤
ታኒ ጎዴቲዳዴኔ
ኢጼቲዳዴ ጊዳ ዲሺን
ሃይታንታ ዲቺዳይ ኦኔ?
ታኒ ታርካ ኣታዲስ ሺን
ሂስቲን ሃይታንቲ
ኣዋፔ ዪዶ?› ጋሳ» ጌስ።
22 ኡባ ሃሪዛ ጎዳይ፥ «ቤኣ፥
ታኒ ካዎቴꬃታ
ማላታን ጼይጋና፤
ታኒ ታ ባንዲራ ኣሳስ
ꬎቁ ሂስታ ኤሳና፤
ኔ ኣቱማ ናይታ
ኢስቲ ኢዲሚ ኤሃና፤
ኔ ማጫ ናይታካ
ባንታ ሃሼን
ቶኪዲ ኤሃና።
23 ካዎቲ ኔና ዲቺዛ
ኣዋታ ጊዳና፤
ኢስታ ማቼቲ ኔና ዲቺዛ
ኣዬታ ጊዳና፤
ኢስቲ ጉፋኒዲ ኔስ ጎይናና፤
ኔ ቶሆ ቦላፌ
ባናካ ላጫና፤
ኔካ ታኒ ጎዳ
ጊዲዳይሳ ኤራና፤
ታናን ሂዶታ ኦꬂዛይቲ
ዬላቴቴና» ጌስ።
24 ዲኢ ኤኪዳ ሚሽ ኦላንቻታፔ
ጉዬ ዛራናስ፥
ዲኤቲ ቢዳይታ
ሜንጼ ኢታታ ኩሼፔ
ኣሻናስ ዳንዳዬቲዜ?
25 ጊዶ ኣቲን ጎዳይ፥
«ቱሙካ ኦላንቻቲ
ዲኢ ኤፊዳ ሚሽ
ኬሲ ኤካናስ፥
ሜንጼ ኢታታ ኩሼፔ
ዲኤቲዳይታ ኣሻናስ
ዳንዳዬቴስ፤
ኔናራ ኦሌቲዛይታራ ታ ኦሌታና፤
ኔ ናይታካ ታኒ ኣሻና።
26 ኔና ኡንኤꬂዛይቲ
ባንታርካ ባ ኣሾ ማና፤
ዎይኔ ኡሻን
ማꬆቲዛ ማላ
ባንታርካ ባ ሱꬃን
ማꬆታና፤
ሄሳፌ ጉዬ ኣሳ ዜሬꬅ ኡባይ፥
ታኒ ጎዳ፥ ኔና ኣሺዛይሳ፥
ኔና ዎዚዛይሳኔ
ያቆቤ ዎልቃማ ጊዲዳይሳ
ሄሳን ኤራና» ጌስ።