54
ጺዮኔስ ሲንꬃፌ ያና ቦንቾ
1 ጎዳይ፥ «ሃኔ ማይኔ ማጫሳዬ፥
ና ዬላ ኤሮንታሬ ዬጻ፤
ኢሊሊ ጋዳ ኡፋይሳን ዋሳ፤
ሃኔ ሚጻታ ኤሮንታሬ፥
ባ ኣዚናራ ዲዛሪ ናይታፔ
ኣዚናይ ኣጊዳሪ
ናይቲ ዳራና» ጌስ። ጋላ 4፡27
2 ኔ ዱንካኔ ኤሳናሶ ኣሳ፤
ኔ ዱንካኔ ማጋላሻታካ
ኣሳ ቶላ፤ ጹንꬆፋ፤
ኔ ዎዶሮታ ኣዱሳ፤
ꬊሽኬታካ ሚንꬃ ኤሳ።
3 ኔኒ ኡሻቻ ባጋራኔ
ሃዲርሳ ባጋራ ኣካና፤
ኔ ዛሬቲ ካዎቴꬃታ ላታና፤
ሂስቲዲ ኣይኮይ ባይንዳ
ኢስታ ካታማታን ኢስቲ ዳና።
4 «ኣይኮይ ባ ባቦፋ፤
ኔ ዬላታካ፤
ሂርጎፋ፤ ኔ ካዉያካ፤
ኔ ዬላጋቴꬃ ዬላ
ኔኒ ዶጋና፤
ኔ ኣምኤቴꬃ ቦሮካ
ሃይሳፌ ሲንꬃን ሃሳኣካ።
5 ኔና ሜꬊዳይሲ ኔስ ኣዚና፤
ኢዛ ሱንꬃይካ ኡባፌ
ዎልቃማ ጎዳ።
ኔና ዎዚዳይ
ኢስራኤሌ ጌሻ፤
ኢዚ ቢታ ኡባ ጾሳ ጌቴቴስ።
6 ናቴꬃን ኤኪዲ
ካꬊዳ ማቺ ማላ፤
ኔኒ ዎዚና ሜቂዳኔ
ካꬌቲዳ ማቺ ማላ፤
ጊዶ ኣቲን ጎዳይ
ኔና ጉዬ ዛሪ ጼይጋና»
ጌስ ጾሳይ።
7 «ጉꬃ ዎዴ ታኒ ኔና ኣጋዲስ፤
ጊዶ ኣቲን ጊታ ቃꬌታን
ታ ኔና ዛራ ሺሻና።
8 ታ ጉꬃ ዎዴስ
ኬሃ ሃንቄቲዳ ጊሻስ፥
ታ ኣይፌሶ ኔፔ ጌንꬃዲስ፤
ጊዶ ኣቲን ታ ሜርና
ኪያቴꬃን ኔስ ቃꬌታና»
ጌስ ኔና ዎዚዛ ጎዳይ።
9 «ሃይሲ ታስ ኖሄ ዎዴ ሃꬂ
ቢታ ዛሪ ꬋይሶንታ ማላ
ታ ጫቆይሳꬆ
ሃኢካ ኔ ቦላ ዛራዳ
ሃንቄቶንታ ማላኔ
ሴሮንታ ማላ ታ ጫቃዲስ። ሜꬌ 9፡8-17
10 ዙማቲ ቃጺኮ፥
ዙምቡላቲ ባ ዲዛሶፔ
ኪቺኮካ፥
ኔስ ዲዛ ታ ሲቆይ ቃጼና፤
ኔናራ ታ ጫቂዳ
ሳሮቴꬃ ቃላይ ላሌቴና»
ጌስ ኔና ማሪዛ ጎዳይ።
11 ጎዳይ፥ «ሃኔ
ኡንኤቲዳ ካታማዬ!
ጎቴ ጫርኮን ሾጬቲዳሬ!
ሚኔቶንታሬ! ቤኣ፥
ታኒ ኔና ቦንቼቲዳ
ሹቻታን
ኣሌቂሳ ኬጻና፤
ሴምፔሬ ሹች ኔስ
ዮች ዬጋና።
12 ታኒ ኔ ቁስቴ ዞኦ ኢንቁን፥
ኔ ፔንጌታ ጾልቂዛ ኢንቁታን፥
ኔ ዲርሳታ ቦንቼቲዳ
ሹቻታን ኦꬃና።ኣጁ 21፡18-21
13 ኔ ኣቱማ ናይቲ ኡባይ
ጎዳፔ ታማርዳይታ ጊዳና፤
ኔ ናይታ ሳሮቴꬂካ ዳራና። ዮሃ 6፡45
14 ኔኒ ጺሎቴꬃን ሚና ኤቃና፤
ጌኔ ኦጌራ ኣይሶይ
ኔፔ ሃካና።
ኔና ባቢሲዛ ሚሺ ዴና፤
ሺሮቴꬂ ኔፔ ሃካና፤
ኔ ማታካ ሺቄና።
15 ኦኒካ ኔና ቆሂኮ፥
ሄሲ ታፔ ጊዴና፤
ኔና ቆሂዳይ ዲኮ
ኔ ሲንꬃን ኩንዳና፤
16 «ቤኣ፥ ጺፋይ ታማን ቦንቃና ማላ
ዎምፒና ፑኒዛይሳ፥
ኦላ ሚሽ ቆጺዛ ዎጋጬ
ሜꬊዳይ ታና።
ቃሴ ባሽ ጋꬃና ማላ
ሜꬊዳይካ ታና፤
ባሺዛይሳ
ሜꬊዳይካ ታና።
17 ኔና ቆሃናስ ኦሴቲዳ
ሚሺ ኦꬄና።
ኔና ሞቲዛ ኢንጻርስ ኡባ
ኔ ላꬃና፤
ሄሳ ጊሻስ ጎዳ ኣይሌታ
ጺንጾይ ሃይሳ፤
ኢስቲ ታፔ ዴማና
ኣንጆይ ሄሳ» ጌስ።