55
ጾሳፌ ቤቲዛ ማሮቴꬅ
1 ጎዳይ፥ «ኢንቴኖ ሳሜቲዳይቶ
ኡባይካ ሃ ዪቴ!
ሃꬃኮ ሃ ዪቴ፤
ኢንቴኖ ሚሺ ባይንዳይቶ
ሻሚቴ፤ ሚቴ።
ሃ ዪቴ፤ ሚሺ ባይንዳኔ
ቃንጾንታ ዎይኔ ኡሺኔ
ማꬅ ሻሚቴ። ኣጁ 21፡6፤ 22፡17
2 ጎኦንታ ካꬃስ
ኣይስ ኢንቴ ሚሽ ꬋይሴቲ?
ኢንቴና ካልሶንታ ሚሻስ
ኣይ ኤካናስ
ኢንቴ ዎልቃ ዉርሴቲ?
ሲዪቴ፤ ታ ጊዳዝ ሲዪቴ፤
ሎኦ ጊዲዳዝ ሚቴ፤
ሎኦ ቁማን ኢንቴና ኡፋይሲቴ።
3 ኢንቴ ሃይꬅ ዶይዲ
ሃ ታኮ ሺቂቴ፤
ኢንቴ ሼምፖራ ፓጻ ዳና ማላ
ታ ጊዛ ኤዝጊ ሲዪቴ፤
ካሴ ታ ዳዊቴራ ጫቂዳ
ሚኖ ሲቆን ኢንቴናራካ
ሜርና ጫቆ ጫቄታና። ሃዋ 13፡34
4 ቤኢቴ፥ ታኒ ኢዛ ዴራስ ማርካ፥
ካሌꬂዛዴኔ
ኦላ ጋዳዋ ኦꬃዲስ።
5 ቤኣ፥ ኔኒ ኤሮንታ
ካዎቴꬃታ ጼይጋና፤
ኔና ኤሮንታ ካዎቴꬃቲ
ኔኮ ኤሶን ያና።
ጋሶይካ ጎዳ ኔ ጾሳይ
ኢስራኤሌ ጌሻይ ባ ቦንቾን
ኔና ꬎቁ ꬎቁ
ሂስቲዴስ» ጌስ።
6 ጎዳይ ቤቲዛ ዎዴ
ኢዛ ኮዪቴ፤
ማታን ዲዛ ዎዴ
ኢዛ ጼይጊቴ።
7 ኢታ ኣሲ ባ ኦጌ፥
ቆሂዛይካ ባ ቆፋ ኣጎ፤
ጎዳኮ ሲሞ።
ኢዚካ ኢዛ ማራና፤
ኢዛ ማሮቴꬃይ
ዳሮ ጊዲዳ ጊሻስ
ኢዚ ኑ ጾሳኮ ሲሞ።
8 ጎዳይ፥ «ታ ቆፋይ
ኢንቴ ቆፋ ማላ፥
ኢንቴ ኦጌይካ
ታ ኦጌ ማላ ጊዴና።
9 ሳሎቲ ሳኣፔ ꬎቂዳ ማላ፥
ታ ኦጌይ ኢንቴ ኦጌፔ፥
ታ ቆፋይካ
ኢንቴ ቆፋፔ ꬎቄስ።
10 ኢራይኔ ሻቺ
ሳሎፔ ዎꬊዲ
ቢታ ካልሲዲ፥
ቢታይ ሞኪሳና ማላኔ
ኣይፌ ኢማና ማላ፥
ዜሪዛዴስ ዜሬꬅ፥ ሚዛዴስ ካꬅ
ኢሞንታ ዲሼ
ጉዬ ሲሞንታይሳ ማላ፥ 2ቆሮ 9፡10
11 ታ ዶናፔ ኬዚዛ ቃላይካ
ጮ ሃዳ ሃ ታኮ ሲሜና፤
ጊዶ ኣቲን ኢዚ
ታኒ ኮዪዳይሳ ኦꬄስ፤
ባ ኪቴቲዳ ዋና
ቆፋካ ፖሌስ።
12 ኢንቴ ኡፋይሳን ኬዛና፤
ሳሮን ሞይዜታና።
ዙማቲኔ ዙምቡላቲ
ኢንቴ ሲንꬃን
ኢሊሊሳራ ዬጻና፤
ዴምባን ዲዛ ሚꬃቲ ኡባይካ
ባንታ ኩሼ ባቃና።
13 ኣጉንꬃ ጊሻስ ጺዳይ፥
ኪንዲቾ ጊሻስ ባርሲኔቴ
ጌቴቲዛ ሚꬂ ሞካና፤
ሄሲካ ጎዳ ሃሳኢሲዛ
ሚሺ ꬋዮንታ ማላ
ሜርናስ ማላታ ጊዳና» ጌስ።