56
ኣዛዜቲዛ ኡባስ ኢሜቲዳ ኣቶቴꬅ
1 ጎዳይ፥ «ቱሙ ፒርዳ ናጊቴ፤
ሎኦ ኦꬂቴ፤
ጋሶይካ ታ ኣቶቴꬃይ
ማታን ዴስ፤
ታ ጺሎቴꬃይካ
ኤሶን ቆንጫና።
2 ሳምባታ ቱኒሶንታ ቦንቺዛይ፥
ኢታ ኦሶፔ ባ ኩሼ
ሺሺዛይኔ ናጊዛይ፥
ሃይታንታ ፖሊዛይ
ኣንጄቲዳዴ» ጌስ።
3 ጎዳኮ ሺቂዳ ቤቴይ፥
«ጎዳይ ታና ባ ኣሳፔ
ቱሙ ሻካና» ጎፖ።
ጉንዱላይካ፥
«ታኒ ሜሊዳ ሚꬃ» ጎፖ።
4 ጎዳይ፥ «ታ ሳምባታታ
ቦንቺዛ ጉንዱላታስ፥
ታና ኡፋይሲዛ ሚሽ ዶሪዛይታስ፥
ታ ጫቆ ቃላ ናጊዛይታስ፥
5 ታ ኬꬃኒኔ
ታ ጊምቤታ ጊዶን
ኣቱማ ናይታፔኔ
ማጫ ናይታፔ ኣꬊዛ
ሃሳኢሲዛ ሚሺኔ
ሱንꬅ ኢስታስ ኢማና፤
ሜርናስ ꬋዮንታ ሱንꬅ
ታ ኢስታስ ኢማና።
6 ጎዳስ ሃጋዛናስ፥
ባና ጎዳራ ጋꬂ
ዋጺዳ ቤቴ ኣሳታ
ጎዳ ሱንꬅ ሲቂዛይታኔ
ኢዛስ ጎይኒዛይታ፥
ሳምባታ ቱኒሶንታ
ቦንቺዛ ኡባታኔ
ጫቆ ቃላ ናጊዛይታ፥
7 ታኒ ታ ጌሻ ዙማ ቦላ
ኢስታ ኤሃና፤
ታ ዎሳ ኬꬃ ጊዶን
ታ ኢስታ ኡፋይሳና።
ታስ ያርሾ ያርሺዛሶዛ ቦላን
ኢስቲ ሺሺዛ
ጹጌቲዛ ያርሾኔ
ሃራ ያርሾታ ታ ኤካና፤
ጋሶይካ ታ ኬꬃይ
ኡባ ኣሳ
ዎሳ ኬꬅ ጌቴታና» ጌስ። ማቶ 21፡13፤ ማር 11፡17፤ ሉቃ 19፡46
8 ላሌቲዳ ኢስራኤሌ ሺሺዛ፥
ኡባ ሃሪዛ ጎዳይ፥
«ሺቂዳይታ ቦላ ጉጃ፥
ታኒ ሃራታካ ዛራ ሺሻና» ጌስ።
ኢታታ ቦላ ጾሳ ዋላሴ
9 ኢንቴኖ ዶኣቶ፥
ኢንቴኖ ዎራ ዶኣቶ
ኡባይካ ሃ ዪቴ፤
ኢንቴ ኣቻራካ
ፑዜሬꬂቴ።
10 ኢስራኤሌ ኣሳ ናጊዛይቲ ቆቄ፤
ኢስታስ ኤራቴꬂ ዴና
ኢስቲ ኡባይ ቦጮንታ ካና ማላ፤
ቦጫናስ ዳንዳዬቴና፤
ኢስቲ ኢቺዲ ኣጉሜቴቴስ፤
ኢስቲ ꬊስካንቻ።
11 ኢስቲ ጋንጃማ ካና ማላ፤
ሚዲ ካሊ ኤሬቴና።
ኢስቲ ኣኬካይ ባይንዳ
ሄንꬃንቻታ፤
ኢስቲ ኡባይ
ባንታ ኦጌ ኦጌ ቤቴስ፤
ኢሶይ ኢሶይ ባ ጎኣ ጻላ ጼሌስ።
12 ኢስቲ ኢሶይ ኢሳራ፥
«ሃ ዪቴ፤
ዎይኔ ኡሹ ኣኔ ኡዮስ።
ኣኔ ማꬆታና
ጋካናስ ኡዮስ!
ዎንቶይካ ሃቻ ማላ ጊዳና፤
ዎይኮ ሃቺፌካ ኣꬊ
ሎኦ ጊዳና» ጌቴታና።