58
ቱሙ ጾማ
1 ጎዳይ፥ «ኔ ቃላ
ꬎቁ ሂስታ ዋሳ፤
ኣይኮካ ኣሾፋ።
ኔ ጬንጉርሳ ዛዬ ማላ ሲሳ።
ታ ዴራስ ኢስታ ማካላቴꬃ፥
ያቆቤ ኬꬃ ኣሳሲካ
ኢስታ ናጋራ ዮታ።
2 ኢስቲ ታና ሃች ሃች ኮዬቴስ፤
ታ ኦጌዛ ኤራናስ
ላሞቲዛ ሚሳቴቴስ።
ሱሬ ሚሽ ኦꬂዳ
ካዎቴꬃ ማላኔ
ባ ጾሳ ኣዛዞ ዬጊ
ኣጎንታ ዴሬ ማላ፥
ኢስቲ ታና
ሱሬ ፒርዳ ኦይቼቴስ፤
ጾሲ ኢስታኮ ሺቃናይሳ
ኢስቲ ዶሲዛ ሚሳቴስ» ጌስ።
3 ኢስቲ ሺቂዲ፥ «ኔ ኤኮንታሺን
ኑ ኣዛስ ጾሚዶኒ?
ኔ ዉዱ ጎንታሺን ኣይስ ኑና
ካዉሺዶኒ?» ጋና።
ጎዳይ ዛሪዲ ኢስታስ፥
«ጊዲኮካ ኢንቴ ጾሚዛ ጋላስ
ኢንቴ ዎዚና ቆፋ ማላ ኦꬄታ፤
ኢንቴስ ኦꬂዛይታፔ
ቦንቄታ።
4 ኢንቴ ጾማይ
ኦሻኒኔ ፓላማን፥
ጌኔ ኦሶኒኔ ዋꬌታን ፖሌቴስ፤
ሃይሳፌ ሲንꬃን
ኢንቴ ጾሚዛይሳ ማላ
ሃቺፌ ጉዬ ኢንቴ ዎሳይ
ሳሎን ሲዬታና ጊዲ
ሂዶታ ኦꬆፍቴ።
5 ታኒ ዶሪዳይ ሃይሳ ማላ ጾማ?
ኣሲ ባና ካዉሻናይ
ሃይሳ ማላ
ጋላስ ጻላ?
ሻጫ ማላ ባና
ዚቂ ሂስቴꬄ?
ዎይኮ ማቃ ማይኢዲ
ቢዲንꬃ ቦላ ቡሉሌቴꬄ?
ሂስቲን ኔ ጾማ ጋ
ጼይጊዛይሲ ሃይሴ?
ጎዳይ ሄሳ ማላን ኡፋዬቲዜ?
6 «ቤኢቴ ታኒ ዶሪዳ ጾማይ፥
ኡንኤቲዳይታ ሳንሳላታ
ኢንቴ ዱꬃና ማላ፥
ቃምባራ ዎዶሮ
ኢንቴ ቢርሻና ማላ፥
ኡንኤቲዳይታ ኢንቴ
ላኣ ዬዳና ማላ፥
ቶሆ ጊዲዳ ቃምባራ ኢንቴ
ሜንꬃና ማላ ጊዴኔ?
7 ቃሴካ ኔ ቁማፔ
ጋፊዳዴስ ሻካናስ፥
ቶይላቲዳ ማንቆዛ
ኔሶ ጌልꬃናስ፥
ካሎቲዳ ቤኣዳ ማይዛናስ፥
ኔስ ኣሾ ዳቦዛስ ኔ ሲንꬂ
ኔ ቱኮንታ ማላ ጊዴኔ?ማቶ 25፡35
8 ኔ ሄሳꬆ ኦꬂኮ ኔ ፖኦይ
ዎንታ ጻልቄ ማላ ጫራና፤
ፓጻቴꬂ ኔስ ኤሶን ጋካና፤
ጺሎቴꬂ ኔፔ
ሲንꬃራ ባና፤
ጾሳ ቦንቾይ
ኔና ጋራዳና።
9 ሄ ዎዴ ኔኒ ጼይጋና፤
ጎዳይካ ኔስ ኮያና።
ኔኒ ማዶ
ዴማናስ ዋሳና፤
ኢዚካ፥ ‹ታ ኔስ ዳይስ› ጋና።
«ኔ ኔፔ ሜቶꬂዛ ቃምባራ፥
ኢታ ሃሳያኔ
ቢራꬌን ማላታ
ቤሲዛይሳ ኣጊኮ፥
10 ጋፊዳዴስ ኔ ቃꬌቲኮ፥
ቆሄቲዳይቲ ካላና ማላ
ኔ ሂስቲኮ
ኔስ ፖኦይ ꬉማ
ጊዶን ፖኣና፤
ኔስ ꬉሚዳይሲካ
ሴታ ጋላሳ ማላ ጊዳና።
11 ጎዳይ ኔና ኡባቶ ካሌꬃና፤
ኣዋይ ጹጊዳ ቢታን
ኔ ኣሞ ኢዚ ኩንꬃና፤
ኔ ሜቄꬃታካ
ኢዚ ሚንꬃና።
ኔኒ ሃꬅ ኣላዳ ኣታኪልቴሶሆኔ
ሙሌካ ቶኦንታ
ፑልቶ ማላ ጊዳና።
12 ኔ ዳቦቲ ቤኒ ዮቻታ ዬጋና፤
ካሴ ላሌቲዳይታ ዛሪ ኬጻና፤
ኔኒ ላሌቲዳ ጊምቤ
ዛሪ ኦራጺሲዛዴ፥
ዎጋ ኦጌቲ ዲዛ ካታማታ
ዛሪ ጊግሲዛዴ ጌቴታና» ጌስ።
ሳምባታ ቦንቾን ቤቲዛ ጎኣ
13 ቃሴካ፥ «ኔ ቶሆቲ
ሳምባታ ሻሮንታ ማላ
ኔ ሼምፒሲኮ ዱማቲዳ
ታ ጋላሳን
ኔ ዎዚና ቆፋ ኦꬆንታ ኣጊኮ፥
ሳምባታ ጋላሳ ኡፋይስ፥
ጎዳስ ዱማቲዳ ጋላሳ
ኔኒ ቦንቾ ጋላስ
ጋ ጼይጊኮ፥
ኔ ሼኔ ማላ
ኔ ኦꬂዛይሳፌኔ
ሃዳ ዮኦፔ ኔ ናጌቲኮ፥
14 ሄ ዎዴ ኔ ጎዳን ኡፋዬታና።
ቢታ ቦላን ꬎቃሶሆታን
ታ ኔና ቶጊሳና፤
ኔ ኣዋ ያቆቤ ጺንጾ
ኔ ካላ ማና ማላ ኦꬃና»
ጊዲ ጎዳይ ሃይሳ
ባ ዶናን ሃሳይዴስ።