ጌሻ ማጻፋ ኢሳያሳ ቲንቢቴ 59

ናጋራ ማሬቴꬂኔ ዎዜቴꬅ

1 ሄኮ ጎዳ ኩሼይ ኢንቴና

ኣሻናስ ቃሚቤና፤

ኢዛ ሃይꬂ

ሲያናፔ ቱሊቤና።

2 ጊዶ ኣቲን ኢንቴ ቆሆይ ኢንቴና

ኢንቴ ጾሳፌ ሻኪዴስ፤

ኢንቴ ናጋራይ ኢዛ ኣይፌሶ

ኢንቴፌ ጌንꬂዴስ።

ሄሳ ጊሻስ ኢዚ ሲዬና።

3 ኢንቴ ኩሼይ ሱꬃን፥

ኢንቴ ቢራꬌይካ

ቆሆን ሙሌቲዴስ፤

ኢንቴ ዶናይ ዎርዶ ሃሳይዴስ፤

ኢንጻርሳቲ ኢታ ዮኦ ሲሲዳ።

4 ጺሎቴꬃን ሞቲዛይ ባዋ፤

ቱማቴꬃን ፒርዲዛይ

ኦኒካ ዴና።

ሃዳ ዮኦን ኣማኔቴቴስ፤

ዎርዶ ሃሳዬቴስ፤

ሺሮ ቃንꬃቲዲ ኢታቴꬅ ዬሊዳ።

5 ኢስቲ ሾሻ

ጱጱሌ ሃጵዳ፤

ኣቻሮ ኬꬅ ኬጺዳ፤

ኢስታ ጱጱሌታ

ሚዛ ኣሲ ሃይቄስ፤

ኢስታፌ ኢሶይ ሜቂኮ

ፑኪዛ ሾሺ ኬዜስ።

6 ኢስታ ቃጪናይ ማይኦ ጊዴና፤

ኢስቲ ኦꬂዳይሳን ባንታ ቦላ

ካማና ዳንዳዬቴና፤

ኢስታ ኦሶይ ኢታ፤

ኢስታ ኩሼታን

ማካላ ኦሶይ ኩሚዴስ።

7 ኢስታ ቶሆቲ ናጋራኮ ዎጼቴስ፤

ጺሎ ሱꬅ ጉሳናስ ኤሶቴቴስ፤

ኢስቲ ኢታ ቆፋ ቆፔቴስ።

ባሺኔ ቆሆይ

ኢስቲ ኣꬊዳ ኦጌ ኡባስ ማላታ።

8 ኢስቲ ሳሮቴꬃ ኦጌ ኤሬቴና፤

ኢስቲ ቢዛ ኦጌን

ሱሬ ፒርዳይ ባዋ፤

ኢስቲ ባንታ ኦጌ ጌላሲዳ፤

ሄ ኦጌራ ቢዛይ ሳሮ ዴሜና።

9 ሄሳ ጊሻስ ሱሬ ፒርዳይ ኑፔ ሃኪዴስ፤

ጺሎቴꬂካ ኑኮ ጋኬና።

ኑኒ ፖኦ ኮዪዶስ፤

ጊዶ ኣቲን ኡባይ ꬉማ ጊዲዴስ፤

ዋጋጋ ፖኦ ኮዪዶስ፤

ጊዶ ኣቲን ሳካና

ꬉማ ጊዲዴስ።

10 ቆቄ ማላ

ጊምቤዛ ቦላ ጋንዲጋርዶስ።

ኑ ሄሜታይ ኣይፌይ ባይንዳ

ኣሳ ማላ ታታፌቴꬅ ጊዲዴስ፤

ኣርሼይ ዉሊሺን ሃኒዛ

ሴታ ጋላስ ꬉጴቲዶስ።

ቃሴ ሚኖ ኣሳታ ጊዶን ኑኒ

ሃይቂዳ ኣሳ ማላ ጊዲዶስ።

11 ኑኒ ኡባይ ዛርዶ ማላ ላዎስ፤

ሃራጴታ ማላካ

ጬጪሼ ጉጉሞስ፤

ኑኒ ሱሬ ፒርዳ ኮዪዶስ፤

ጊዶ ኣቲን ዴሚቤኮ፤

ኣታና ኮዪዶስ፤

ጊዶ ኣቲን ኢዚ ኑፔ ሃኪዴስ።

12 ጋሶይካ ኑ ቆሆይ

ኔ ሲንꬃን ዳሪዴስ፤

ኑ ናጋራይካ

ኑ ቦላ ማርካቲዴስ።

ኑ ሞሮይ ኑፔ

ሻኬቲቤና፤

ኑ ማካላቴꬃካ

ኑኒ ኤሮስ።

13 ኑኒ ጎዳ ቦላ ማካሊዲ

ዎርዶ ሃሳይዶስ፤

ኑ ጾሳ ካሎ ኣጊዲ

ሼርኢ ጊዶስ፤

ማካላቴꬂኔ

ጌኔ ዮኦ ሃሳይዶስ።

ኑ ዎዚናይ ሻሪ ኡቲዳ

ዎርዶ ሃሳይዶስ።

14 ሄሳ ጊሻስ ሱሬ ፒርዳይ

ጉዬ ሱጌቲዴስ፤

ጺሎቴꬂካ ኑፔ ሃኪዴስ፤

ቱማቴꬂ ኦጌ ቦላ

ꬉጴቲዴስ፤

ሱሬቴꬂካ ጌላናስ

ዳንዳይቤና።

15 ቱማቴꬂ ኣዋንካ ቤቴና፤

ኢታቴꬃፌ ሃኪዛይ

ቆሄቴስ፤

ጎዳይ ቤኢዲ ሱሬ ፒርዳይ

ꬋይዳ ጊሻስ ጬጪዴስ።

16 ኦኒካ ባይንዳይሳ ቤኢዴስ፤

ኢዛኮ ጋናቲዛይ ባይንዳይሳ

ቤኢዲ ማላሌቲዴስ፤

ሄሳ ጊሻስ ኢዛ ቄሴይ

ኢዛስ ኣቶቴꬅ ኤሂዴስ፤

ኢዛ ጺሎቴꬂ ኢዛ ካፊ ኦይኪዴስ።

17 ኢዚ ጺሎቴꬃ ጹሩሬ ማላ

ቲራን ማይኢዴስ፤

ኣቶቴꬃ ቢራታ ቆቤ ማላ

ባ ሁኤ ቦላ ዎꬂዴስ።

ማይኦ ጋርሳራ ማይኢዛ ማላ

ሃሎ ኬሶ ማይኢዴስ፤

ማይኦ ጎጲ ማይኢዛ ማላ

ቃናቴ ቦላራ ጎጲዴስ።

18 ኢስታ ኦሶ ማላ

ሃንቆ ባ ባልጋራታስ፥

ፒርዳ ባ ሞርኬታስ ኢዚ ቃንጻና።

ሃሩሮ ቢታታስ ኢስታ

ኦሶ ኦሶ ማላ ኢማና።

19 ጎዳ ፔኖይ ሱጊ ኤኪ ቢዛ

ዎልቃማ ዲኦ ማላ ያና።

ሄሳ ጊሻስ ኣርሼይ

ዉሊዛ ባጋራ ዲዛይቲ

ጎዳ ሱንꬃስ ያያና፤

ኣርሼይ ሞኪዛ ባጋራ ዲዛይቲ

ኢዛ ቦንቾስ ሃሬታና።

20 ጎዳይ፥ «ዎዚዛዴይ ጺዮኔሲኔ

ያቆቤ ዛሬታን ባንታ ናጋራ

ፓጺዳይታኮ ያና» ጌስ።

21 ቃሴካ ጎዳይ፥ «ታ ባጋራ ታሲኔ ኢስታስ ዲዛ ጫቆ ቃላይ ሃይሳ፤ ኢንቴ ቦላ ዲዛ ታ ኣያናይኔ ታኒ ኢንቴ ዶናን ዎꬂዳ ታ ቃላይ ሃቺፌ ዶሚዲ ሜርና ጋካናስ፥ ኢንቴ ዶናፔ፥ ኢንቴ ናይታ ዶናፔኔ ኢንቴ ዜሬꬃ ዶናፔ ሻኬቴና» ጌስ።

59:8 ኦሮ 3፡15-17

59:16 ኢሳ 63፡5

59:17 ኤፌ 6፡14፥17፤ 1ታሶ 5፡8

59:20 ኦሮ 11፡26