60
ሲንꬃፌ ያና ጺዮኔ ቦንቾ
1 ጎዳይ፥ «ኔ ፖኦይ ዪዳ ጊሻስ
ዴንዳዳ ፖኢሳ፤
ጎዳ ቦንቾይ
ኔ ቦላ ፖኢዴስ።
2 ቤኣ፥ ꬉማይ ሳኣ ካማና፤
ሳካና ꬉማይ
ዴራ ጎዚ ኦይካና፤
ጊዶ ኣቲን ጎዳይ ኔስ ጋካና፤
ባ ቦንቾካ
ኔ ቦላ ፖኢሳና።
3 ካዎቴꬃቲ ኔ ፖኦኮ፥
ካዎቲካ ኔ ዎንታ
ጻልቄኮ ያና።
4 «ꬎቁ ጋዳ ኔ ዩሾ ጼላ፤
ኢስቲ ኡባይ ኢሲፌ ሺቂዲ
ኔኮ ያና፤
ኔ ኣቱማ ናይቲ ሃሆፔ፥
ኔ ማጫ ናይቲካ
ኢዲሞን ኔኮ ያና።
5 ሄ ዎዴ ኔ ቤኣናኔ ጶላና፤
ኔ ዎዚናይ ኡፋይሳን ኩማና፤
ኣባን ዲዛ ኣቆታይ
ኔኮ ያና፤
ካዎቴꬃታ ዱሬቴꬂ
ኔስ ጊዳና።
6 ጋሜላ ማራቲ፥
ሚዲያሜፔኔ ኤፋፔ ዪዳ
ጋሜላ ማራቲ
ኔ ቢታ ካማና።
ዎርቃኔ ኤጻኔ
ኤኪዲ ሳባፔ ዪዛይቲ
ጎዳ ጋላታ ኣዋጃና።
7 ቄዳሬፔ ዶርሳታ ዉዴይ
ኡባይ ኔኮ ሺቃና፤
ኔባዮቴ ዴሬ ꬋርሾቲ
ኔና ጎኣና፤
ሃይታንቲ ታስ ያርሾ
ያርሺዛሶዛ ቦላ
ኤኬቲዳ ያርሾታ ጊዳና፤
ታኒካ ታ ቦንቾ
ኬꬃ ፑላሳና።
8 «ሃራጴይ ባ ኣቂዛሶ
ቢዛ ማላኔ
ሻራ ማላ
ቢዛይቲ ሃይታንቲ ኦኔ?
9 ቱሙካ ሃሩሮቲ
ታናን ሂዶታ ኦꬄቴስ፤
ኢዚ ኔና ባ ቦንቾ
ማይዚዳ ጊሻስ፥
ጎዳ ኔ ጾሳ ቦንቾስ፥
ኢስራኤሌ ጌሻስ
ሃኮፔ ኔ ኣቱማ ናይታ፥
ኢስታ ቢራራኔ ዎርቃራ
ጋꬂ ኤሃናስ ታርሴሴ ማርካቤቲ
ሲንꬃቲ ኬዛና።
10 «ኣላጋቲ ኔ ጊምቤ ጊምባና፤
ኢስታ ካዎቲ ኔስ ሃጋዛና፤
ታ ሃንቆን ታ ኔና
ሾጪዳ ጊዲኮካ፥
ታ ቃꬌታ ሲቆ ኔና ቤሳና።
11 ኔ ፔንጌቲ ኡባቶ ዶያ ዴኣና፤
ጋላስ ጊዲን ኦማርስ
ሙሌካ ጎርዴቴቴና፤
ሄሲካ ኣሳይ ካዎቴꬃታ
ዱሬቴꬃ
ኔኮ ኤሃናሳ፤
ኢስታ ካዎቲካ
ጾኖን ኔኮ ጌላና ማላሳ። ኣጁ 21፡25-26
12 ኔስ ሃሬቶንታ ካዎቴꬂኔ
ዴሬይ ሙሌካ ዲፒ ጋና።
13 ታ ኬꬃይ ዲዛሶ ኣሌቂሳናስ፥
ሊባኖሴ ቦንቾይ
ጉጋንꬂ፥ ጺዳይኔ
ባርሴኔቴይ ኔኮ ያና፤
ታ ቶሆይ ኤቂዛሶዛ ታ ቦንቻና።
14 ኔና ኡንኤꬂዳይታ ኣቱማ ናይቲ
ዚጊሼ ኔኮ ያና፤
ኔና ካꬊዳ ኡባቲ
ኔ ቶሆ ቦላ ኩንዳና፤
‹ሃኔ ጎዳ ካታማዬ!
ኢስራኤሌስ ጌሻ ሚሽ ጊዲዳ
ጺዮኔ› ጊ ጼይጋና። ኣጁ 3፡9
15 «ሃኔ ኢጼታዳ ዬጌቲዳሬ፥
ኦኒካ ኔ ጊዶራ ካንꬂ
ቢዛሮ ጊዶንታ ኣጊኮካ
ታኒ ኔና ሜርና ጬቆሲኔ
ዬሌታ ኡባስ ኡፋይስ ሂስታና።
16 ኔኒ ካዎቴꬃታ ማꬅ ኡያና፤
ካዎታ ꬋንꬂካ ꬋማና።
ሄሳፌ ጉዬ ታኒ ጎዳይ
ኔና ኣሺዛይሳ፥
ኔና ዎዚዛይሳኔ
ያቆቤ ዎልቃማ ጊዲዳይሳ
ኔኒ ኤራና።
17 ጻርቂማላ ሶሆን ዎርቃ፥
ቢራታ ሶሆን ቢራ ኤሃና፤
ሚꬃ ሶሆን ጻርቂማላ፥
ሹቻ ሶሆን ቢራታ ኤሃና፤
ሳሮቴꬅ ኔና ኣይሲዛዴ፥
ጺሎቴꬂካ ኔስ
ሃላቃ ሂስታና።
18 ሃይሳፌ ጉዬ ኔ ቢታን ሺሮይ፥
ኔ ዛዋንካ ላሌቴꬂኔ
ባሺ ሲዬቴና።
ጊዶ ኣቲን ኔ ዲርሳ
ጊምቤ ኣቶቴꬂ፥
ኔ ፔንጌታካ ጋላታ ጋዳ
ኔ ጼይጋና።
19 «ሄሳፌ ጉዬ ጋላስ
ኣዋ ፖኦይ ኔስ ኮሼና፤
ኦማርሲካ ኣጊናይ ፖኤና፤
ጋሶይካ ጎዳይ ኔስ
ሜርና ፖኦ ጊዳና፤
ኔ ጾሳይ
ኔስ ቦንቾ ጊዳና። ኣጁ 21፡23፤ 22፡5
20 ኔ ኣርሼይ
ሃይሳፌ ጉዬ ጌሌና፤
ኔ ኣጊናይካ
ፖኦ ኢሞ ኣጌና።
ጎዳይ ኔስ
ሜርና ፖኦ ጊዳና፤
ኔ ጬጪዳ ጋላሳቲ ጊዳና።
21 ኔ ኣሳይ ኡባይ
ጺሎ ጊዳና፤
ቢታዮካ ሜርናስ ላታና፤
ኢስቲ ታ ቦንቾ ቆንጪሳናስ
ታኒ ቶኪዳ ፑቴታኔ
ታ ኩሼ ኦሶታ።
22 ኔፔ ካሎዚ ሺ፥
ኡባፌ ዉርሴꬃ ካሎዚ
ዎልቃማ ካዎቴꬅ ጊዳና፤
ታኒ ጎዳ፤
ዎዴይ ጋኪዛ ዎዴ
ታኒ ሄሳ ኤሶን ፖላና» ጌስ።